Isaya 25 - Livulu lya Shukulu Kalunga

Mwaso wakushangazala

¹ Yove Shukulu Kalunga, yove wapwa u Njambi yange, njikakulemesa, nakushangazala lizina lyove. Omwo unalingi vyuma vyakukomokesa, a kulongwa kwove unamanesa matumbe awayongwele laja.

² Unatengulula vinganda vya vitozi vetu kupwa vingundu, nakunyongesa vimpaka vyavyo vyakukola. Mapela avatungile vitozi vetu oshe ananyongo.

³ Vanu vaka-mafuti a nzili vakakushangazala, vakakukomoka mu vinganda vya miyati ya vaka-muuka.

⁴ Tuutu na vaka-kujeneka vatewelele kuli yove, co vanakala mwamuvwa a simbu ya tuyando. Wavanene mwakuvandela lihunzi, na munzinze ngeci vavande ntwima ya litanya. Vaka-muuka vakalu ngwe lihunzi lya cisika,

⁵ ngwe lilanga mu lifuti lyakujeneka nyonzi. Oloni yove Shukulu Kalunga, unolwesa vitozi vetu, ukolwesa mitambi ya vaka-muuka ngwe lishelwa lije lifwika a litangwa.

Njambi avwaesa ciwano

⁶ Aa vene a Munkinda wa Siyone, Shukulu Kalunga Muka-nzili yoshe akavwaeselao miyati yoshe ya mu kaye ciwano ca vyakulya vyavivwa na vinyu vyavivwa.

⁷ A munkinda ou, Shukulu Kalunga akatundisa nanga ya vusiwa ije yafwikile miyati yoshe ya ano a kaye.

⁸ Shukulu Kalunga wa Akamwa ya Vyoshe akanyongesa nzili ya kutsa nakusikumuna misozi ku mesho a munu na munu, co vanu vendi kuvakazivi shwamwa kwoshe-ikwoshe muno mu kaye mwoshe. Shukulu Kalunga vavenya nendekamo.

⁹ A litangwa lije vanu vakendeka ngwavo, “Mwa vushunga ou wapwa Njambi yetu! Twakulaela muli ikeye, co natwovola. Ou ikeye Shukulu Kalunga! Twakulaela muli ikeye, tujoleleni nakuvwaelela omwo ikeye natwovola.”

Njambi akahisa Mowavi

¹⁰ Shukulu Kalunga akanyunga Munkinda wa Siyone, oloni vanu va Mowavi vakavalyatangela ngwe muje vakalyatangela vishati ngeci vipwe vwilo.

¹¹ Vakeseka na nzili yavo yoshe ngeci vaputumuke, oloni Njambi akavazivisa shwamwa, nameme vene veseka vati ngeci vaputumuke.

¹² Njambi akanyongesa vimpaka vya Mowavi vyakukola na vivumbe vyavyo vyavilaja, nakuvilundumwina asi.