Isaya 24 - Livulu lya Shukulu Kalunga

Shukulu Kalunga akahisa kaye

¹ Shukulu Kalunga akanyongesa ano asi, co akapwa amupulungwa. Akafulumika kaye nakushandola vanu vao.

² Cikafwa mumolika ku voshe, ku vaka-kukombelela na vanu vangoco, vindungo na vashukulu vavo, vaka-kulanda nakulandulula, na vaka-kukumwisa, na vaka-kukumuna, vaka-kufuka na tuutu.

³ Ano a kaye akakala amupulungwa, kwakakala cuma cimo. Shukulu Kalunga nendekamo, co cikalingiwa.

⁴ Kaye kauma nakujujwama, nakuzeya, kaye na lilu vikanyongolokota.

⁵ Vanu vanajwalesa kaye omwo vanapokola mashiko a Njambi, nakupokola cikumiiyo cije calikumiiye navo ca ku myaka yoshe.

⁶ Ngecivene, Njambi natumbwila kaye cisingo. Co vanu vao valinakutsa omwo vuvi vwavo. Vavandondo-ndondo lika vanasalao vaciyoya.

⁷ Mikolovozi ya vushuka vwa vinyu inajujwama, co vinyu vinapu vyavindondo, munu woshe uje wakele nakuvwaelela ololo naviilila,

⁸ na myaso yavo yakujolela ya a tulyalya na a vingoma inahu.

⁹ Kukwesi kwimba nakuvwaelela lalo omo vanwa vinyu, naumo wai avwaelela akumakela vinyu.

¹⁰ Vyuma vyoshe mu nganda vili mu citanga, co vanu valinakulishokeyeya mu vinjuvo vyavo ngeci vakale mwamuvwa.

¹¹ Vanu vatambeka mu vitapalo omwo kukwesi lalo vinyu. Kujolela kunahu, kuvwaelela kwaimo mu lifuti.

¹² Nganda inasala yamupulungwa, co vikolo vyayo vanavisiwula.

¹³ Miyati ya vanu vanavanyeka vyuma vyavo vyoshe, vanapu ngwe miti ya olive nambe mikolovozi ya vushuka vwa vinyu a simbu yakumanesa kuteja.

¹⁴ Vaje vakasalao vakaimba nakujolela. Vaje vali mu kangombe ka yambi vakambulula vukama vwa Shukulu Kalunga,

¹⁵ co vaje vali mu ngangela vakamushangazala. Vanu vaje vakala a man̄anda a mu mema a kalunga vakashangazala Shukulu Kalunga, Njambi ya Isalele.

¹⁶ Tukaziva myaso yakutunda ku mitambela yakulyala ya ano asi yakushangazala Isalele, muyati wa vushunga. Oloni kunjesimo na cinyangavili! Njinanyongo! Vaka-makuli valinakulinga vungungu, co makuli avo anaama manene.

¹⁷ Munu woshe atolilile kuli yange! Kuli lyova, na viteke, na myeto vije vinavandamena munu woshe.

¹⁸ Munu woshe uje atewa lyova akawila mu citeke, co munu woshe uje atewa citeke akatsa mu mweto, omwo vinjanena vya mwilu vyashokoloka, co luvula lwa kaye lujaja.

¹⁹ Kaye kakatavuka nakushokoloka.

²⁰ Kaye kakatalyangela ngwe muka-kupenda vwala, nakuninganga ngwe kanjuvo kaninganga na lihunzi lyakama. Kaye kanalemuwa na vuvi vwako, kakawa, co kukakenduka lalo.

²¹ Simbu ilinakwija omo Shukulu Kalunga akahisa vaka-nzili ya a mukambwila na vaka-kushwana va ano asi.

²² Njambi akaka mbunga ya vimyene mu citeke ngwe vinzinda. Akavashokela mu kamenga noo simbu ya kusompa kwove inete.

²³ Ngonde ikatsitsivala, co litangwa kulikatu ceke, Shukulu Kalunga Muka-nzili yoshe ikeye akapwa mwene. Akashwana mu Yelusalema a Munkinda wa Siyone, co vantwama va vanu vakamona vumpau vwendi.