Isaya 23 - Livulu lya Shukulu Kalunga

Majwi aa Tile

¹ Awa akewo majwi aa Tile. Tambekeni nakuviilila, yeni vaka-kujavula mato akama a mu mema a kalunga! Limbo lyeni lya mu cikuma ca Tile vanalinyongesa, vinjuvo na cikuma calyo vinaviya. Mwakuziva muzimbu omo mato eni akeluka ku Sepulasi.

² Teteni, yeni vaka-kulandesa va mu Sindone! Mwatumine vanu

³ musambwa ya mema a kalunga mukulanda nakulandulula tiliku ije mwatejele mu Ingito nakukalinga nganyo na miyati yoshe.

⁴ Nganda ya Sindone, inashauka! Mema a kalunga na vukama vwa vinzinga vyakulova manene vinakuvyana, co vinendeka ngwavyo, “Kunjakele na vana, nalumo lwai njalelele vana va vanalume nambe va vanakazi.”

⁵ Nameme vaka-Ingito vakasikoka nakuzeya omo vakaziva ngwavo Tile vanainyongesa.

⁶ Lileni nakuviilila, yeni vanu va mu Tile! Esekeni kutewela ku Sipeini!

⁷ Kuma eyi ikeyo nganda yeni yakuvwaelela ya Tile, ije ivatungile ku san̄ulu ndi? Kuma eyi ikeyo nganda yatumine tunganda kukatunga mu mafuti a musambwa ya ndonga ya mema a kalunga ndi?

⁸ Iyajo watumbile vutumbe vwoshe ovu a Tile, nganda ije ya vumwene, vaka-kulandeselamo vapwile vana va vimyene, vaje vapwile vanu va vulemu ano asi?

⁹ Shukulu Kalunga Muka-nzili yoshe ikeye watumbile vutumbe mukumanesa nakushaula kulyalesa kwa vanu voshe vaje vavasingimikile ano asi.

¹⁰ Yeni vanu va mu mitambela ya Sipeini, yeni mukalime mu lifuti! Kukwesi umo aminyunga lalo wai.

¹¹ Shukulu Kalunga nolwela livoko lyendi a mema a kalunga, mukukaluwisa vumwene. Nashika ngeci vinganda vya vimpaka vya mu lifuti lya Kanana vavinyongese.

¹² Nganda ya Sindone, kuvwaelela kwove kunahu, co vanu vove valinakuvayandesa. Nameme vatewela ku Sepulase kuvakawana kwoloka.

¹³ Kengeni vije vanalingi vaAsilya ku Mbambilone! Vanalwisa nakunyongesa mapela oshe a mu lifuti. VaAsilya vazengelekele tuposhi, nakusiwula vimpaka vya Mbambilone nakuseza nganda yamupulungwa.

¹⁴ Lileni nakuviilila, yeni vaka-kujavula mato akama a mu mema a kalunga! Nganda ije mwakulaelele vanainyongesa.

¹⁵ Simbu ilinakwija omo Tile vakaivala a myaka makumi atanu na avali, ikeyo vene simbu yakuyoya kwa mwene. Omo myaka ije inahu, Tile ikapwa ngwe munakazi wa cikwizi ivakembi mu mwaso ngwavo,

¹⁶ “Ambata kalyalya kove, ya nakulizenga mu nganda, yove cikwizi wakuutwa ivanevala! Imba myaso yove mwamuvwa, ngeci vakwanuke lalo.”

¹⁷ Omo myaka makumi atanu na avali inahu, Shukulu Kalunga akelwisila lalo Tile mu vipangi vyayo vyalaja vyakulandulula, co ikapwa ngwe munakazi uje alandesa muvila wendi ku munu woshe-iwoshe wa ano asi.

¹⁸ Vimbongo vyakawana akulandulula vakavikundika kuli Shukulu Kalunga. Kuvakavitulikila mu nganda embwe, oloni vaje vaka-kulemesa Shukulu Kalunga vakapangesa vimbongo evi mukulanda vyakulya na vuzalo.