Isaya 22 - Livulu lya Shukulu Kalunga

Majwi aa Yelusalema

¹ Awa akewo majwi aa Cimbongo ca Vimona. Vikajo vilinakulingiwa? Omwo vikajo vanu voshe va mu nganda valinakulisambela akamwa ya vinjuvo?

² Nganda yoshe ilinakutambeka, inashulu na muyoyo nakutangalala. Vanu vaje vanalala mu vitapalo omwo yakupenda kuvavatsiile mu nzita.

³ Vantwama veni voshe vatewele, oloni vavafungulwile simbu kanda vacilwe nzita.

⁴ Ngecivene, njisezeni ange lika njilile manene vanu vange voshe vaje vanatsi. Kesi munjizembeleke embwe.

⁵ Eyi ikeyo simbu ya kuuya-uya nakufunguluka na vitanga vije vinashulu mu Cimbongo ca Vimona, co Shukulu Kalunga wa Akamwa ya Vyoshe Muka-nzili yoshe navitumu ali yetu. Vivumbe vya nganda yetu vanavisiwila asi, co mitambi yakutukwasa inete mukati ka malundu.

⁶ Mashwalale va ku lifuti lya Elame vezile oku vanalondo a tuvalu, vambatele mata a lusipa na mikili. Co mashwalale va ku lifuti lya Kile valivwaeselele cimweja vintelo vyavo.

⁷ Vimbongo vya vwilo vya mu Yunda vyashulile na matemba, co mashwalale vakulonda a tuvalu valitakalekele kulutwe lwa vikolo vya mu Yelusalema.

⁸ Vimpaka vyoshe vya Yunda vaviwisilile asi. A litangwa lije mwakulaelele vitwa vije vyakele mu njuvo yavutulikilo,

⁹ co mwamwene ngeci civumbe ca Yelusalema cakele na myanzi.

¹⁰ Mwalavele vinjuvo vyoshe vya mu Yelusalema, co mwavisiwile ngeci muwaneko mamanya akutungulwisa vivumbe, ngeci munyunge mema,

¹¹ mwapangele lishali mukati ka vivumbe vya nganda ngeci munyungilemo mema. Oloni kumwombile vimbunge vyeni kuli Njambi, uje watumbile vutumbe vwoshe ovu ku san̄ulu, co kumwasingimikile uje watavele ngeci vilingiwe.

¹² Shukulu Kalunga wa Akamwa ya Vyoshe Muka-nzili yoshe wamilekele ngeci mulile na kusikoka, nakuteula mitwe yeni nakuzala vikeleya.

¹³ Oloni yeni mwavwaelelele, co mwalisambele. Mwatsiile vimanga na vingombe, co mwalile nakunwa vinyu. Mwendekele ngweni, “Tunapande kulya nakunwa! Imene tutsa.”

¹⁴ Shukulu Kalunga wa Akamwa ya Vyoshe Muka-nzili yoshe wendekele kuli yange ngwendi, “Mwa vushunga vuvi ovu kunjikavasambesavwo mukuyoya kwavo kwoshe. Yange Kalunga wa Akamwa ya Vyoshe Muka-nzili yoshe, njinendekamo.”

Kunangula Shembena

¹⁵ Shukulu Kalunga wa Akamwa ya Vyoshe Muka-nzili yoshe wanjilekele kuya kuli Shembena, mukulunu wa ku njuvo ya mwene, njikendeke nendi ngwange,

¹⁶ “Yove wayongola ngwove yove iyajo? Uli na moko mukajo yakulicokwela mbumbo kumukulo wa lilundu lya mamanya?

¹⁷ Unasa kukala na nzili, oloni Shukulu Kalunga akakwambata nakukumbila kuti.

¹⁸ Akakwambata ngwe mbunje, co akakumbila mu lifuti lyakama ngeci ukatsileko, co matemba ove aje awalyalesele nawo vakawanyongesa. Unalingisa shwamwa njuvo ya shukulu yove!

¹⁹ Shukulu Kalunga akakunyeka vipangi vyove.”

²⁰ Shukulu Kalunga wendekele kuli Shembena ngwendi, “Omwo vyuma evi vilingiwa, co njikatuma ngamba yange Elyakime muna Hilikiya.

²¹ Co njikamuzika cikoveyo cove cacilaja ca vukulunu nakumwana lalo nzili ya vipangi vyove. Ikeye akapwa cisemi ca vanu va mu Yelusalema na mu Yunda.

²² Njikamwana sapi ya vumwene vuje vwakundama ku naanga ya Mwene Ndaviti. Naumo wai akashokolola cije cashoka, co lalo naumo wai akashoka cije ashokolola.

²³ Njikamukolesa mu mwela mbe ngwe pampalingo, co Elyakime akapwa nsina ya kasingimiko ku naanga yendi yoshe.

²⁴ “Vavushoko vwendi na vana vendi vakawana vukwasi kuli ikeye. Vakakakateya kuli ikeye ngwe vindeo na malonga akakateya ku pampalingo!

²⁵ Omo vije vikalingiwa, co ije pampalingo vakolesele mbe vakaishomona nakuyiwisa. Co vyoshe vije vyakakateyeyeko vikanyonga.” Shukulu Kalunga nendekamo.