Isaya 21 - Livulu lya Shukulu Kalunga

Cimona cakuwa kwa Mbambilone

¹ Awa akewo majwi aa Mbambilone. Ngwe kankumba akomba mu mambo, tuyando tukaija ngacije vene kutunda mu lifuti lyakutewesa.

² Vanjimwesele cimona cakutewesa, cimona ca vungungu na kunyongesa. Mbunga ya mashwalale va Elame, na mbunga ya mashwalale va Mendiya, vazengelekeni nakulwisa vaMbambilone. Njambi akamanesa tuyando tuje tuvalingile vaMbambilone.

³ Vije vinjamwene nakuziva mu cimona vyanjizivisile lyova nakuvinja, ngwe munakazi alinakukita.

⁴ Mutwe wange wavinjile, co njajajele nakuziva lyova. Cingwezi cinjashungwiiye cinanjizivisa lyova.

⁵ Mu cimona, njamwene ciwano cakuvwaesela cimweja, vanajala tumbilititi ngeci vangenzi vatumbameo. Co vakele nakulya nakunwa. Vwasi-vwasi kwezile lishiko ngwavo, “Vamyata ambateni vintelo vyeni vwasi!”

⁶ Asinoni Shukulu Kalunga wendekele kuli yange ngwendi, “Ya ukaake muka-kunyunga, muleke ambulule vyoshe vije vyamona.

⁷ Nga amona vanalume vanalondo a tuvalu valinakwija, vavali-vavali, na vanalume vanalondo a vimulu na a tumelo, napande kulivwaesela cimweja.”

⁸ Muka-kunyunga wendekele ngwendi, “Mwane, njinemana simbu yoshe nakunyunga mutanya na vutsiki.”

⁹ Kengeni, vaka-kulonda a tuvalu valinakwija! Vavali-vavali. Co muka-kunyunga watambekele ngwendi, “Mbambilone inau! Na tumponya twoshe tuje vakele nakulemesa vanashandokela mu livu.”

¹⁰ Vanu vange va Isalele, munayanda manene-nene, oloni ololo njimileka muzimbu wauvwa uje unatundu kuli Shukulu Kalunga Muka-nzili yoshe, Njambi wa Isalele.

Majwi aa Endome

¹¹ Awa akewo majwi aa Endome. Kuli munu umo alinakutambeka kuli yange mu Endome ngwendi, “Muka-kunyunga, simbu mukajo kukya? Njileke nga kukya vwasi.”

¹² Njamukumbulwile ngwange, “Kulinakukya, oloni vutsiki vukaija lalo. Nga ushaka kwihula lalo, yokeluke nakwihula.”

Majwi aa Alambiya

¹³ Awa akewo majwi aa Alambiya. Yeni vanu va mu Ndendane, vaje va matemba avo akatulila mu cilombo calaja mu lifuti lya Alambiya,

¹⁴ aneni mema kuli vanu vaje vali na lihwila. Yeni vanu va mu lifuti lya Tema, aneni vyakulya kuli vaka-kwija vaje vali na njala.

¹⁵ Vanu ava vanajuka mukutewa ku mikwale, na ku mata a lusipa a vitozi vavo vaje valinakuvasheka.

¹⁶ Asinoni Shukulu Kalunga wendekele kuli yange ngwendi, “Mwa vushunga vene a mwaka umolika vukama vwa muyati wa Kendale vukahwa.

¹⁷ Vanalume vaka-mata a lusipa va mu Kendale vakasalao lika vavandondo. Yange Kalunga Njambi ya Isalele, njinendekamo.”