Isaya 2 - Livulu lya Shukulu Kalunga

Kwoloka kwa myaka yoshe

¹ Awa akewo majwi aanene Njambi kuli Isaya muna Amoze a Yunda na Yelusalema.

² Ku matangwa a kulutwe a munkinda aje ali Njuvo ya Shukulu Kalunga, ukapwa waulaja manene kutuvakana minkinda yoshe, ukapwa kaposhi ka malundu oshe. Co miyati yoshe ya vanu vakakungulukilako.

³ Vanu vavangi vakendeka ngwavo, “Tulamateni a lilundu lya Shukulu Kalunga, ku Njuvo ya Shukulu Kalunga Njambi ya Yakomba, akatulongese vije ashaka ngeci tuvilinge, ngeci twende mu vingila vyendi. Omwo vilongesa vya Shukulu Kalunga vitundilila ku Yelusalema, Shukulu Kalunga akendeka ku vanu vendi kutundilila ku Siyone.”

⁴ Ikeye akasompa vin̄anda akati ka miyati yakama. Vakafula mikwale yavo kuyipwisa matemo, co makunga avo vakaapwisa vimoko vyakunongesa minango ya miti. Miyati ya vanu kuvakalilwisa umo na mukwavo lalo na vimoko vya mikwale, co kuvakalivwaesela lalo kulwa nzita embwe.

⁵ Eni vatekulwila va Yakomba, tuyoyeni mu ceke ca Shukulu Kalunga.

Kulyalesa vakacinyongesa

⁶ Yove Njambi unavyana vanu vove, vatekulwila va Yakomba! Lifuti lyavo linashulu na vilinga vya manseno vya ku ngangela na ku Filisitiya. Vanu valinakukava futisi ya vangenzi.

⁷ Lifuti lyavo linashulu na siliva na ngolinde, co vufuko vwavo kuvwesi kuhwa. Lifuti linashulu lalo na tuvalu, na matemba a nzita aje kuwesi kuhwa.

⁸ Mu lifuti mwoshe munashulu na tumponya, co valinakulemesa vyuma vije vivanapanga na mavoko avo.

⁹ Ngecivene, vanu voshe vakakala na shwamwa na vunyengwe. Kesi uvasambese, Shukulu Kalunga.

¹⁰ Vakavanda mu manzenzengoma mu malundu a mamanya, nambe kwinda viteke mu livu nakuvanda ku vukalu vwa Shukulu Kalunga nakuvanda ku nzili ya vumpau vwendi!

¹¹ A litangwa lije vaka-kulyalesa vakaziva shwamwa, co vaka-vukama vakavakeesa. Asinoni vakashangazala lika Shukulu Kalunga.

¹² A litangwa lije, Shukulu Kalunga Muka-nzili yoshe akakeesa munu woshe, munu woshe uje muka-kulyalesa nakulijundula.

¹³ Akanyongesa miti yailaja ya kendale ya ku Lembanone, na miti yoshe ya oke ya mu lifuti lya Mbashane.

¹⁴ Ikeye akalambesa minkinda na malundu amalaja,

¹⁵ na tuposhi twoshe twatulaja, na vivumbe vyoshe vya vimpaka.

¹⁶ Akazuvika nameme mato akama manene na mato aje amavwa a mu mema a kalunga.

¹⁷ Kulyaka ku vukama na kulyalesa kwa vanu kukahwa,

¹⁸ co vinjambi va tumponya vakahwa, co a litangwa lije, vakashangazala lika Shukulu Kalunga.

¹⁹ Omo Shukulu Kalunga akaija nakuningangesa kaye, vanu vakavanda mu manzenzengoma mu malundu a mamanya, nambe kwinda viteke kutewa vukalu vwa Shukulu Kalunga nakuvanda ku nzili ya vumpau vwendi.

²⁰ Omo litangwa lije lyeta, vanu voshe vakombila kuti tumponya twa ngolinde na tumponya twa siliva tuje tuvanalingi, co vakavisezela vin̄olo na vindima-ndima.

²¹ Omo Shukulu Kalunga akaija nakuningangesa kaye, vanu vakavanda mu viteke na mu manzenzengoma mu malundu a mamanya, kutewa vukalu vwa Shukulu Kalunga nakuvanda ku nzili ya vumpau vwendi.

²² Kesi mukulaele vanu, omwo simbu ilinakwija omo vakatsa, co vasa kumikwasa vatijo?