Isaya 19 - Livulu lya Shukulu Kalunga

Njambi akahisa Ingito

¹ Awa akewo majwi aa Ingito. Shukulu Kalunga aija ku Ingito, nalondo a lishelwa aija lumbisi. Vanu vanazeye omwo lyova. Co tumponya twavo vanalijujukila.

² Shukulu Kalunga endeka ngwendi, “Njikashangumuna nzita mu Ingito, co vakalitengulukile nakulilwisa ndolome na ndolome, mundambo na mundambo. Nganda na nganda ikalilwisa imo na ikwavo, co vumwene vukalilwisa na vukwavo.

³ Njikatanganesa matumbe na viyongola vya vaka-Ingito, Vakehula tumponya twavo ngeci vavakwase, vakaya nakwihula kuli vaka-kwendeka na vakulu, nakwihula lalo ku minzinzime ya vatsi ngeci ivanangule.

⁴ Njikana vaka-Ingito ku mavoko a mwene wa vukalu na muuka, Yange Kalunga Muka-nzili yoshe, njinendekamo.”

⁵ Mema akatepuluka mu Ndonga ya Nailo, co ndonga ikauma cau.

⁶ Vana vavindonga vakanika omo vakauma. Co mahongo na mateve akajujwama,

⁷ vimbuto vyoshe vije vakunine ku ngenge ya Nailo vikauma cau, co vikapekumuka.

⁸ Munu woshe uje wayoyela akulovela visi mu Nailo, akakemanga nakulila, tulovo twavo na manda avo vikapwa vyangoco.

⁹ Vaka-kutonga vinanga vyavivwa vya linyu vakajeneka vyakulinga.

¹⁰ Vaka-kwosha na vanu vaka-kupanga vya vutongwe vakapokoka vimbunge.

¹¹ Vantwama va mu nganda ya Zoane vanapu vilema! Vanalume vakamana va mu Ingito vakanangula vya vukolokomba! Vatijo valeka mwene wa Ingito ngwavo, vakevo vapwa vanu va mana manene, co naanga yavo yapwa naanga ya vimyene va ku san̄ulu?

¹² Mwene wa Ingito, vali kulijo vaje vaka-kunangula vove vakunyanyama? Amo vasa kukulekako vutumbe vwalinavwo Shukulu Kalunga Muka-nzili yoshe a Ingito.

¹³ Vantwama va Zoane na Mefise vanapu vikolokomba. Vanapandele kutwamenena lifuti mwamuvwa, oloni vanalisevwisa.

¹⁴ Shukulu Kalunga naaka muli vakevo munzinzime wakuvatanganesa. Vantwama va Ingito vanalingisa lifuti eli ngeci lipelyangele nakulishanjela ngwe muka-kupenda.

¹⁵ Naumo wai mu Ingito asa kulinga cuma, nambe muka-kufuka nambe kautu, nambe muka-vulemu, nambe munu uje kuvamuzivuka.

Ingito vakalemesa Shukulu Kalunga

¹⁶ Omo Shukulu Kalunga Muka-nzili yoshe akolola livoko lyendi lya nzili mukuhisa Ingito, vaka-Ingito vakazeya manene-nene nakulijajela na lyova.

¹⁷ Vanu va mu Ingito vakaziva lyova lya Yunda visimbu vyoshe omo vakanuka luvinda luje lwanenele Shukulu Kalunga Muka-nzili yoshe ali vakevo.

¹⁸ Omo simbu ije iketa, kukakala vinganda vitanu mu Ingito vakendeka ndaka ya ciHevelu. Co vanu va muje vakakavangeya Shukulu Kalunga Muka-nzili yoshe. Nganda imo ku vinganda vije vakaitumbula ngwavo, “Nganda ya Litangwa.”

¹⁹ Omo simbu ije iketa, kukakala mutula wa Shukulu Kalunga mu lifuti lya Ingito, co na manda ya limanya vakaikundika kuli ikeye ku nginga ya vaka-Ingito mukusingimika Shukulu Kalunga.

²⁰ Vyuma evi vikapwa vimweso kuli vanu va mu Ingito ngeci Shukulu Kalunga Muka-nzili yoshe ali amo navo. Omo vanu vaIngito vakakala mu vukalu, co vakatambeka kuli Shukulu Kalunga ngeci avakwase, co ikeye akatuma umo mukuvapatula ku vitozi vavo.

²¹ Shukulu Kalunga akalisholola ikeye vavenya kuli vaka-Ingito, co vakamuzivuka nakumulemesa, vakamukombelela nakumulambwila. Vakalisinga cikulaeso ca cikumiiyo kuli ikeye nakulinga vije vivanakulaesa.

²² Omo Shukulu Kalunga namanesa kunyanyamesa vaka-Ingito, co vakatengulukila kuli ikeye. Akaziva malombelo avo, nakuvakangwisa.

²³ Omo simbu ije iketa, kukakala tapalo yakama mukati ka Ingito na Asilya. Vaka-Ingito na vaAsilya vakalyendela, co vakalemesela amolika.

²⁴ Lifuti lya Isalele likalipandakana na Ingito na Asilya, co mafuti awa atatu akapwa civezikiso mu kaye mwoshe.

²⁵ Asinoni Shukulu Kalunga Muka-nzili yoshe akavavezikisa nakwendeka ngwendi, “Njikamivezikisa vanu vange vaka-Ingito, yeni vaAsilya vaje njatangele, neni vaIsalele vanu vange vakwangula.”