Isaya 17 - Livulu lya Shukulu Kalunga

Njambi akahisa Silya na Isalele

¹ Shukulu Kalunga wendekele ngwendi, “Ndamasiku kuyikapu lalo nganda, oloni ikapwa nganda yakusiwuka.

² Vinganda vya Silya vikapwa vingundu vya myaka yoshe. Vikapwa vulilo vwa vimanga na vingombe, co naumo wai akavashekamo.

³ Isalele kuyikakala na cimpaka cakuyinyunga, co Ndamasiku vakainyongesa. Va Asilya vaje vakasalao vakaziva shwamwa ngwe vanu va Isalele. Yange Kalunga Muka-nzili yoshe, njinendekamo.”

⁴ Shukulu Kalunga wendekele ngwendi, “Litangwa lilinakwija omo vukama vwa Isalele vukahwa, mu vufuko vwendi vakengisamo vuutu.

⁵ Isalele ikapwa ngwe lihya lya mu cimbongo ca Lefaime lije vateje laja vimbuto.

⁶ Kuvanga vanu vavandondo lika vakasalao, co Isalele ikapwa ngwe muti wa olive uje uvanavuyu vushuka vwoshe kuvanga vuvali nambe vutatu lika vwa ku shongo-shongo vunasalako, nambe vwavundondo lika vunasala kwisi ya minango. Yange Kalunga Njambi ya Isalele, njinendekamo.”

⁷ Omo litangwa lije likaija, vanu vakatenguluka nakukulaela Ishamatanga yavo, Njambi wakujela wa Isalele.

⁸ Vanatungu mitula na mitambela yakwenyekela insense kuli Ashela njambi wa munakazi, vanashimbika vimanda vyakujela vya Ashela. Oloni vakalikela kulemesa ku mitambela eyi.

⁹ Omo litangwa lije likaija, vinganda vije vakele nakunyunga mwamuvwa vikapwa vingundu, co vikasiwuka ngwe vinganda vije vivasezele vaHivi, na vaAmoli omo vatewele kuli vanu va Isalele.

¹⁰ Isalele, munevala Njambi uje wamipatwile nakuminyunga, ikeye limanya lya nzili. Oloni mukuna mahya akujela ngeci mulemese njambi weka.

¹¹ Vimbuto vije mukuna vyasa kujovelela nakushamwina vishani mutondo uje vene muvikuna, oloni nacimo cai mukateja. Kukakala lika tuyando nakukemanga.

Mafuti a vitozi vaafungulula

¹² Miyati ya nzili yakama vali mu vukalu na muyoyo ngwe cikumo ca mema a kalunga, ngwe kungwanjanga kwakama kwa mankimba a mema a kalunga.

¹³ Nameme miyati ya vanu valinakushwenya kulutwe ngwe livazi lyakujujwisa, oloni Njambi akashika ngeci veluke, vapekumukila kulyala ngwe likungu lya kumukulo wa munkinda, ngwe cishati cipekumuka na kankumba.

¹⁴ A simbu ya cingwezi kulwa kwavo kuzivisa lyova, oloni ku mutondo voshe vavanyongesa. Eci cikeco cikalingiwa kuli vanu vaje vakatambula lifuti lyetu nakupukula vufuko vwetu.