Isaya 16 - Livulu lya Shukulu Kalunga

Kalesi yaivi ya Mowavi

¹ Mu nganda ya Sela mu mambo vanu va ku Mowavi, vatume vwana vwa vana va vimanga kuli muka-kushwana mu Yelusalema.

² Co vavandamene ku ngenge ya Ndonga ya Alenone nakwendangana noku-noku, ngwe tuzila vaje vavanasheke a mashwa avo.

³ Miluwa va Mowavi vendekele ku vanu va ku Yunda ngwavo, “Tulingeni mwamuvwa nakutukwasa. Tunyungeni, ngwe munzinze wa muti wakutonola a simbu ya litanya, tuhwimine mu munzinze weni. Tunapu tu vaka-kwija, tushwekeni kuje naumo wai asa kutuwanako.

⁴ Tutaveni ngeci tukale mu lifuti lyeni. Tunyungeni kuli vaje vashaka kutunyongesa.” (Kuyandesa na mapakeso vikahwa, na vaje valinakuviisa lifuti vakaya.

⁵ Asinoni umo wa ku vatekulwila va Ndaviti akapwa mwene, akashwana vanu na kulongwa na cizemo. Co ikeye akalinga vyuma vije vya vushunga, akamona ngeci vushunga vulinakulingiwa vwasi-vwasi).

⁶ Vanu va Yunda vendeka ngwavo, “Tunazivi kulyalesa kwa vanu va Mowavi. Tunazivuka ngeci vakevo vaka-kulishasha, oloni kulishasha kwavo kunapu kwangoco.”

⁷ Vanu va Mowavi vakalila omwo tuyando tuje valinatwo. Voshe vakalisimoka omo vakanuka vyakulya vije valile mu nganda ya Kile Helese. Co vakavasheka kujeneka cinyangavili.

⁸ Mahya a muyehi na Heshevone na vitungu vya mikolovozi ya vushuka vwa vinyu ya ku Simbema vanainyongesa, vitungu vya mikolovozi ya vushuka vwa vinyu vene ije vinyu vyayo vyakele nakupendesa vaka-kushwana mafuti. A simbu imo mikolovozi ya vushuka vwa vinyu yashalavelele nakweta ku nganda ya Njazele, co yetele na mu ngangela mu mambo, na mu kangombe ka yambi ku mutambela ukwavo wa Mema a Kalunga a Kutsa.

⁹ Njililila mikolovozi ya vushuka vwa vinyu ya ku Simbema ngwe munjililila ya ku Njazele. Njililila Heshevone na Elyale, omwo vanu kuvakateje nakujolela.

¹⁰ Naumo wai alinakuvwaelela mu mahya a vwilo. Naumo wai alinakutambeka nambe kwimba myaso mu vitungu vya mikolovozi ya vushuka vwa vinyu, naumo wai alinakulyatangela vushuka vwakulivanga vwa vinyu, Njambi namanesa mitambi yakujolela yoshe.

¹¹ Ngecivene, mbunge yange ilinakulinyenga a Mowavi, nakulinyenga a Kile Helese.

¹² Vanu va Mowavi valinakulijukisa ngoco kuya ku munkinda wavo wa tuzangu na ku vinjuvo vyakulemesela vinjambi vavo nakulombela, oloni nacimo cai civakwasa.

¹³ Eli likelyo lijwi lije Shukulu Kalunga wendekele a Mowavi.

¹⁴ Co Shukulu Kalunga nendeka ngwendi, “Mwa vushunga vene a myaka itatu vufuko vwavungi vwa Mowavi vukahwa. Akati ka vanu vamwo vavangi, vavandondo lika vakasalao, vakapwa va seo.”