Isaya 13 - Livulu lya Shukulu Kalunga

Njambi akahisa Mbambilone

¹ Awa akewo majwi aa Mbambilone, aje atambwile Isaya muna Amoze kuli Njambi.

² Jundula pandelo ya nzita a lilundu lya miti! Tambekeni ku mashwalale, co vashovweyeni na livoko ngeci valwise vikolo vya nganda ya vanu va kulyalesa.

³ Shukulu Kalunga nashiki mashwalale vendi vakwanguka nakusimpa kulwa nzita yakujela nakuhisa vanu vaje vanaluvalela.

⁴ Tolilileni muyoyo a minkinda, muyoyo wa mbunga yakama ya vanu, muyoyo wa miyati na vumwene vanakunguluka. Shukulu Kalunga Muka-nzili yoshe alinakukungulula mashwalale vendi va nzita.

⁵ Valinakutunda ku mafuti a kulyala a ku shongo ya asi. Co Shukulu Kalunga akamwesa vukalu vwendi mukunyongesa lifuti.

⁶ Lileni, nakukangoka! Litangwa lili muyehi, omo Shukulu Kalunga Muka-nzili yoshe akaija mukunyongesa.

⁷ Mavoko a vanu akazeya, nakusimpa kwavo kukahwa.

⁸ Vanu voshe vakalijujukila, vakakemanga ngwe munakazi akita mwana. Vakalikenga shwii umo na umo na lyova, co vihanga vyavo vikakala na shwamwa.

⁹ Kenga, litangwa lya Shukulu Kalunga lilinakwija, litangwa lya vukalu vwendi vwakama nakuluvala kwendi. Mukuluvala kwendi Shukulu Kalunga akapwisa lifuti mupulungwa, nakunyongesa vaka-vuvi vamwo.

¹⁰ Vingongonosi na mulalavizi wavyo kuvikatu ceke, litangwa likatsitsivala omo lituuka, co ngonde lalo kuyikatu ceke.

¹¹ Shukulu Kalunga endeka ngwendi, “Njikahisa kaye omwo vuvi vwako, nakuhisa lalo vaka-vuvi omwo vuvi vwavo. Njikanyongesa kulyalesa kwa vaka-muuka.

¹² Vaje voshe vakasalao vakakaluwa kuvawana kutuvakana ngolinde yakujela.

¹³ Ngecivene, njikajajesa melu, na asi lalo akajaja, co akatunda a mitambela yao a litangwa lije omo yange Kalunga Muka-nzili yoshe njikamwesa vukalu vwange.

¹⁴ “Vaka-kwija vaje vali mu Mbambilone vakatewela kulyala ku mafuti avo, nakulishandoka ngwe vishonge vatewa ciyambi, ngwe vimanga vakujeneka kanyungi.

¹⁵ Woshe uje ivakafungulula vakamutsiya na moko ya mukwale.

¹⁶ Vakamonako omo vakatsena vimbututu vavo a mamanya, vinjuvo vyavo vakavipukula, co vanakazi vavo vakavalinga vyuma vya shwamwa.”

¹⁷ “Njilinakushangumuna vaMende kulwisa Mbambilone, VaMende vaje kuvesi kuvalanda na siliva, nambe na ngolinde.

¹⁸ VaMende vakatsiya vakwenje na mata avo a lusipa. Kuvakazivila vimbututu mema ku mbunge, nambe kuzivila vanike lalo mema ku mbunge.

¹⁹ Vumwene vwa Mbambilone vwapwa vwavuvwa manene na nzili kutuvakana vumwene vwoshe, vavenya vumwene valyaleselavwo. Oloni yange Kalunga, njikanyongesa Mbambilone ngwe munjanyongesele Sondoma na Ngomola!

²⁰ Naumo wai akakalamo lalo. Kukwesi kaAlavya muka-kwendangana akashimbikamo mbalaka yendi, nambe kanyungi kakanyungilamo vutanga vwendi vwa vimanga.

²¹ Ukapwa mutambela wa tusitu va mu mambo, muje muvakatungila makun̄ulu mashwa avo. Vainavilanda vakakalamo, na makunda vakeela mu vingundu.

²² Minguli vakohyela mu tuposhi twavo, co vimbanje vakavwozela mu mapela amavwa. Simbu ya Mbambilone inete! Matangwa ayo anahu laja.”