Isaya 11 - Livulu lya Shukulu Kalunga

Vumwene vwa kwoloka

¹ Cikota ca vumwene vwa Ndaviti cinalifu ngwe muti wakushinja, oloni minango yaiha ijovelela ku cimbundi, ngecivene, mwene wamuhwa akatunda akati ka vatekulwila va Ndaviti.

² Munzinzime wa Shukulu Kalunga ukamwana mana, nakuzivuka na kulongwa mukushwana vanu vendi. Ikeye akazivuka cizango ca Shukulu Kalunga co akamusingimika,

³ co akajolela akusingimika Shukulu Kalunga. Mwene ou kakasompo a cifwa ca munu, nambe vyakuziva lika embwe,

⁴ akasompela tuutu mwamuvwa, akaakwila mwa vushunga vaka-. Akahisa vanu na lijwi lya mu kanwa kendi, co akatsiya vaka-vuvi na muku wa mu kanwa kendi.

⁵ Akashwana vanu vendi mu vushunga na mu kulongwa.

⁶ Tungunga na vana va vimanga vakakala amolika mu kwoloka, na viingwe vakavutama amolika na vana va vimembe. Vana va vingombe na vana va vindumba vakalila amolika, co vanike vavandondo vakapwa tunyungi twavo.

⁷ Vingombe va lwavo na vambeya, vakalya amolika, co vana vavo na vana va vindumba vakavutama mu kwoloka. Vindumba vakalya vishati ngwe muvakavili vingombe.

⁸ Nameme mbututu nga ehela muyehi na linyoka wa vushungu kakavulumuka.

⁹ A Siyone, lilundu lya Njambi lyakujela, kwaakakala cuma cimo cakukuvulumuna nambe vuvi. Lifuti likashula na mana akuzivuka Shukulu Kalunga ngwe mema a kalunga mwakajalela.

Vanu vaje vakele mu vundungo vakeluka

¹⁰ Litangwa lije likaija omo mwene wamuhwa wakutunda ku vumwene vwa Ndaviti akapwa cimweso ku miyati. Miyati vakakungulukila mu nganda ya vumwene vwendi nakumwana kasingimiko.

¹¹ Omo litangwa lije likaija, Shukulu Kalunga akapangesa nzili yendi nakwilwisa vanu vendi vaje vasalele ku Asilya na ku Ingito, na ku Patelose, na ku Sundane, na ku Elame, na ku Mbambilone, na ku Hamate, na ku man̄anda ku mema a kalunga.

¹² Shukulu Kalunga akanena cimweso ku miyati, co akakungulwila lalo amo vanu va Isalele na vanu va Yunda vaje valishandokelele mu vimbango viwana vya ano asi.

¹³ Vumwene vwa Isalele kuvukazivila lalo Yunda lifuwa, co Yunda kuyikapu lalo citozi ca Isalele.

¹⁴ Co voshe amo vakalwisa vaFilisitiya vaje vakala ku mutambela wa mu kangombe ka yambi, co vakapukula vufuko vwa vanu vaje vakala mu ngangela. Vakafungulula vanu va ku Endome, na Mowavi, co vaAmoni vakavononoka.

¹⁵ Shukulu Kalunga akomisa Linema lya Suwezi, co akasana lihunzi lya ntwima kumisa cau Ndonga ya Yufuleti, kukasala lika vana va vindonga vatanu na vavali, ngecivene, munu woshe akasa kujavuka.

¹⁶ Co kukakala tapalo ya vanu vendi vaIsalele vaje vanasalao yakutunda ku Asilya, ngwe muje muyapwile tapalo ya vakukulwila vavo omo vatundile mu Ingito.