Isaya 10 - Livulu lya Shukulu Kalunga

¹ Ngongo yeni! Mukalingi mashiko aje kesi a vushunga, aje ayandesa vanu vange.

² Omu mukemwo mumuli nakuyandesela tuutu, nakuvavindika kulinga vushunga. Omu mukemwo mumukambatela vufuko vuje vwakundama ku vifwile na visiwa.

³ Vatijo mukalinga omo Njambi akamihisa? Vatijo mukalinga omo ikeye akanena miyati yeka ngeci vamilwise nakumihisa? Kulijo kumukatewela ngeci mukawaneko vukwasi? Vufuko vweni mukavutewesela kuli?

⁴ Vakamitsiila mu nzita, nambe kumikokangeya ngwe vinzinda. Oloni nameme ngoco vukalu vwa Shukulu Kalunga kuvukahu, anga akolola livoko lyendi mukuhisa.

Mwene wa Asilya napu ngwe cipangeso ca Njambi

⁵ Shukulu Kalunga wendekele ngwendi, “Njipangesa Asilya kupwa mulamu wakupupisa vaje vanjinaluvalela.

⁶ Njatumine Asilya nakulwisa muyati wa vaka-kujeneka kunjikulaela, vanu vaje vananjiluvalesa. Njavatumine mukupukula nakwiva nakulyatangela vanu ngwe mazilo a mu vitapalo.”

⁷ Oloni mwene wa vaAsilya ali na matumbe endi a lwozi mu mbunge. Nalivwaesela cimweja kunyongesa miyati yaingi.

⁸ Alishasha ngwendi, “Muka-kushika wange woshe napu mwene!

⁹ Njafungulwile vinganda vya Kaleno na Kalekemishe, na vinganda vya Hamate na Alepande. Njafungulwile Samaliya na Ndamasiku.

¹⁰ Njolwele livoko lyange nakuhisa vumwene vwoshe vuje vulinakulemesa tumponya, tumponya twatungi manene kutuvakana tuje twa mu Yelusalema na mu Samaliya.

¹¹ Njinanyongesa Samaliya na tumponya twamwo twoshe, co njikalinga cuma cimo lalo na Yelusalema na tumponya tuje valinakulemeselamo.”

¹² Oloni Shukulu Kalunga endeka ngwendi, “Omo njimanesa kupanga vipangi vyange vyoshe a Munkinda wa Siyone na mu Yelusalema, co njikahisa mwene wa Asilya omwo akulishasha na a kulyalesa kwendi kwoshe.”

¹³ Mwene wa Asilya alinakulishasha ngwendi, “Vyoshe evi njavilingi ange lika. Njili na nzili na mana nakunyanyama. Njinazimangana vinginga akati ka miyati, co njinambata vufuko vuje vatulikile. Ngwe ngombe wa nkomba, njalyatangela vanu vaje vakele muje.

¹⁴ Miyati ya mu kaye vafwile ngwe lishwa lya kazila, co njakungulwile vufuko vwavo mukwasiwa ngwe muvakakungulula mavunda. Kukwakele limbava lyendele nakunjizivisa lyova, kukwakele lalo kazila weshamesele kanwa kendi nakunjinyangumuna!”

¹⁵ Oloni Shukulu Kalunga endeka ngwendi, “Kuma njaviti yasa kukala na nzili kutuvakana uje munu alinakuyipangesa ndi? Kuma saha yasa kupwa ya vulemu kutuvakana munu uje alinakuyisaesa ndi? Mulamu kuwesi kujundula munu, oloni munu ikeye akajundula mulamu.”

¹⁶ Shukulu Kalunga Muka-nzili yoshe akatuma mushongo nakuhisa vaje valinakulya mwamuvwa. Mu mivila yavo mukakala tuhya tuje tukashukuma-shukuma.

¹⁷ Njambi, ceke ca Isalele, akemuka tuhya. Njambi wakujela wa Isalele, akemuka mulangi wa tuhya, uje ukenyeka vyuma vyoshe a litangwa lyangongo, nameme mambimbo na mishwena.

¹⁸ Shwata ya vwilo na shwata yakulima mahya vikanyonga, ngwe mu cifwa cije cakatsi munu ku mushongo wauvi.

¹⁹ Miti yaindondo lika ikasalao ije nameme mwanike asa kuyilava.

Vavandondo lika vakeluka

²⁰ Simbu ilinakwija omo va Isalele vaje vanasalao kuyoya kuvakakulaela a muyati uje wavayandesele. Oloni mwa vushunga vakakulaela lika kuli Shukulu Kalunga, Njambi wakujela wa Isalele.

²¹ Vanu va Isalele vavandondo likae vakeluka kuli Njambi yavo Muka-nzili yoshe.

²² Nameme ngoco ololo vanu va Isalele vanatumu manene ngwe lishen̄avu lya ku cikuma ca mema a kalunga, oloni vavandondo lika vakeluka. Kunyonga vanacitulikila vanu, co mwamuvwa vene cavapande.

²³ Eyo, mu kaye koshe Shukulu Kalunga Muka-nzili yoshe wa Akamwa ya Vyoshe, akanena kunyonga ngwe mwendekele ngwendi akalingamo.

Shukulu Kalunga akahisa Asilya

²⁴ Shukulu Kalunga Muka-nzili yoshe wa Akamwa ya Vyoshe endeka ku vanu vendi vaje vakala mu Siyone ngwendi, “Kesi muzive lyova lya vaAsilya, nameme vamiyandesa ngwe muvamiyandesele va Ingito.

²⁵ Mu kasimbu kakandondo lika, njikalikela kumihisa, asinoni njikavanyongesa.

²⁶ Yange Kalunga Muka-nzili yoshe njikavapupa na likote lyange ngwe munjapupile vanu va ku Mindyani ku Limanya lya Oleve. Njikahisa Asilya ngwe munjahisile Ingito.

²⁷ Omo simbu ije iketa, njikamipatula ku nzili ya Asilya, co mandauluwa yavo kuyikaleme lalo a vitsili vyeni.”

Muka-kulwisa aija

²⁸ Mbunga ya mashwalale va vitozi vanafungulula nganda ya Ai! Vaneti ku Mingelone! Co vanaseza vivala vyavo ku Mikemashe!

²⁹ Vanajomboka ngila, co vanakalalela ku Ngemba! Vanu va mu nganda ya Lama vali na lyova, co vanu va mu nganda ya Ngimbeya ya Mwene Saulu vanatewe.

³⁰ Tambekeni, yeni vanu va Ngalime! Tolilileni, yeni vanu va Laisha! Kumbululeni, yeni vanu va Anatote!

³¹ Vanu va ku Mandimena na ava va ku Ngembime valinakutewa ngeci vovoke.

³² Ku litangwa lya lelo vitozi vali mu limbo lya Nombe, co kuje valinakwinazeka vin̄ome ku Munkinda wa Siyone, ku nganda ya Yelusalema.

³³ Shukulu Kalunga Muka-nzili yoshe akavawisila asi ngwe minango yakushaja ku muti. Co vaka-kulyalesa na vaka-kulijundula vakevo vavenya vakavashinjila asi nakuvazivisa shwamwa.

³⁴ Shukulu Kalunga akavashinjila asi ngwe muvakashinji na njaviti miti ya mukati-kati ka shwata, ngwe muyikau miti yaivwa ya Lembanone.