Isaya 1 - Livulu lya Shukulu Kalunga

¹ Cimona ca Isaya muna Amoze, cije camwene ca a Yunda na Yelusalema simbu ije omo Uziya, na Yotame, na Ahaze, na Hezekiya vapwile vimyene va mu Yunda.

Njambi aluvalesa vanu vendi

² Shukulu Kalunga wendekele ngwendi, “Lilu na asi, tolilileni ku vije njendeka! Vana vaje njalelele vananjitengulukila.

³ Vingombe vazivuka uje wavafuka, na vimulu vazivuka kuje akavalisila shukwainavo. Oloni vanu vange va Isalele kuvazivuka Shukulu yavo. Vanu vange kuvazivuka uje akavalisa.”

⁴ Ngongo yeni, yeni muyati wakuvulumuna, yeni vanu vakulemuwa na vuvi! Yeni naanga ya vaka-kulinga vuvi, vanu vaje vaka-kulinga vyangoco. Munaseza Shukulu Kalunga, Njambi wakujela wa Isalele, co munamukengesa nima.

⁵ Omwo vikajo mulinakunjitengulukila? Mushaka ngeci njimihise lalo manene ndi? Isalele, ku mutwe wove kulilaja vimbandu, co mbunge yove na viyongola vyove vinazeye.

⁶ Kutunda ku mutwe wove kweta ku mendi naamo ali mwamuvwa ai kuli lika mikiki, na tuvimbandu twatundondo na vimbandu vyakama. Vimbandu vyove kuvavikushile nambe kuzengao. Kuvaakeleo mazi.

⁷ Lifuti lyeni linemuka mambo, co vinganda vyeni vanavyenyeka. Vaka-kwija vanamitambula lifuti lyeni oku munavakengelela.

⁸ Yelusalema lika ivanazengeleka vitozi, inapu ngwe cipundo ca muka-kunyunga citungu ca mikolovozi ya vushuka vwa vinyu, nambe ngwe cipundo ca muka-kunyunga lihya lya vinende.

⁹ Nga Shukulu Kalunga Muka-nzili yoshe kasezeleo vanu vamo, nga Yelusalema yoshe yanyongele, ngwe muvyanyongele vinganda vya Sondoma na Ngomola.

¹⁰ Yove Yelusalema, vaka-kushwana vove na vanu vove, vanafu ngwe vanu va mu Sondoma na Ngomola. Tolilila kuli vije vyendeka Shukulu Kalunga. Tolilila vije vyakulongesa Njambi yetu.

¹¹ Ikeye alinakwendeka ngwendi, “Kuma yeni munayongola ngweni njishaka vin̄ombelo vyoshe evi mulinakukombelela kuli yange ndi? Yange njinapwisamo na vin̄ombelo vya kwenyeka vya vimanga, na mazi a vimuna veni vakununa. Yange kunjivwaelela na maninga a vingombe va nkomba, na maninga a vimanga, naa a vimembe.

¹² Iyajo namishika ngeci munjinenele vyuma vyoshe evi omo mwija nakunjilemesa? Iyajo namileka ngeci mulyatangele mu Njuvo yange?

¹³ Cinapu cangoco kunena vin̄ombelo vyeni. Njilinakuziva vunyengwe a insense muli nakwenyeka. Viwano vyeni vya Kutenama kwa Ngonde, na Matangwa Akuhwima eni, na viwano vyeni vya vuNjambi, vyoshe vinaviya na vuvi vweni.

¹⁴ Yange njazinda Viwano vyeni vya Kutenama kwa Ngonde na matangwa eni akujela, vinapu vyuma vije vinanjipese manene.

¹⁵ “Omo mujundula mavoko eni mukulombela, kunjikamikenge embwe, nambe mulombela malombelo amangi-mangi, kunjikamizivi, omwo mavoko eni anashulu na maninga.

¹⁶ Lijweleseni yeni vavenya ngeci mujele. Likeleni vuvi vwoshe ovu njilinakumona vumulinakulinga. Eyo, likeleni kulinga vuvi,

¹⁷ lilongeseni kuyoya mwamuvwa. Moneni ngeci vushunga vulinakulingiwa, kwaseni vaje valinakuyanda, aneni visiwa vije vyavapande, co nyungeni vifwile.”

¹⁸ Shukulu Kalunga alinakwendeka ngwendi, “Ijeni tulizivasane. Nambe vuvi vweni vuvenga ngengu, oloni vukatoka too ngwe mema akukonda. Nambe vuvi vweni vuvenga ngengu, oloni vukatoka too ngwe memba.

¹⁹ Nga mukanjononoka, co mukalya vyuma vyavivwa vije vikamena mu lifuti.

²⁰ Oloni nga munjivyana nakunjikengesa nima, co vitozi vakaminyongesa. Yange Kalunga, njinendekamo.”

Nganda ya vuvi

²¹ Nganda ije yapwile ya kulongwa ololo inalifu ngwe cikwizi! A simbu yalaja, mu nganda omu mwakele vanu vaka-vushunga, oloni ololo munasala lika vanu vaka-kutsiya.

²² Yelusalema simbu yalaja wafwile ngwe siliva oloni ololo unapu uwangoco, wapwile ngwe vinyu vyavivwa oloni ololo unapu u mema lika.

²³ Vantwama vove vananjiyengula, co vanalikwata vusamba na vanu va muuka, simbu yoshe valinakutambula wana vwavungi na mazika-kanwa. Kuvesi kwamena visiwa mu vimbanja nambe kutolilila omo vifwile vambulula milonga yavo.

²⁴ Ngecivene, ololo tolilila kuli vije vyendeka Shukulu Kalunga Muka-nzili yoshe, Njambi ya Isalele muka-kushwana wa nzili ngwendi, “Njikalinga shambandinga ali yeni vitozi vange, co kumukanjinenela lalo tuyando.

²⁵ Njikakunyanyamesa nakukujelesa ngwe muvakavwaesa vutale, co njikatundisa vuvi vweni vwoshe.

²⁶ Yelusalema njikakwana vaka-kushwana na vaka-kunangula ngwe vaje vawakele navo ku san̄ulu. Asinoni lizina lyove lyaliha likapwa ‘Nganda yakushungama na kulongwa.’ ”

²⁷ Omwo Shukulu Kalunga wapwa wa vushunga, akamena Yelusalema na vanu voshe vaje valimo vaje vatenguluka.

²⁸ Oloni vaka-kutengulukila na vaka-vuvi vakavanyongesa voshe, na vaje vavyana Shukulu Kalunga vakavanyongesa.

²⁹ Ukaziva shwamwa omwo walemesele miti nakukuna vitungu vyakujela.

³⁰ Ukapwa ngwe muti wa oke wakujujwama, nambe ngwe citungu cakwona kutukumwina mema.

³¹ Ngwe vulimu vwenya na tuhya twa vishashe, ngecivene, vantwama vove vaka-nzili vilinga vyavo vya vuvi vikavanyongesa, co naumo wai akavakwasa omo vanyonga.