Hoziya 8 - Livulu lya Shukulu Kalunga

Shukulu Kalunga ahisa Isalele akulemesa tumponya

¹ Shukulu Kalunga alinakwendeka ngwendi, “Imbeni mwondo wa nzita! Vitozi valinakucuncumukila mu lifuti lyange ngwe vingonga! Vanu vange vanapokola cikumiiyo cije njalikumiiye navo, co vanatengulukila vilongesa vyange nakuvilwisa.

² Nameme vanjitumbula ngwavo nji Njambi yavo nakutumbula ngwavo vapwa vanu vange, co lalo ngwavo vanjizivuka,

³ oloni vanavyana vije vinapu vyavivwa. Omwo a vyuma evi, vitozi vavo vakavakavangeya.

⁴ “Vanu vange vaangwile vimyene, oloni vacilingile mu cizango cavo vavenya. Vemikile vantwama, kwakujeneka vukaleo vwange. Co vambatele siliva na ngolinde yavo valingile tumponya, kulinyongesa vakevo vavenya.

⁵ Njazinda ngombe wa nkomba wa ngolinde uje ivakalemesa vanu va mu nganda ya Samaliya. Njinaluvala navo manene. Simbu mukajo vakecela kulemesa tumponya twavo?

⁶ Uje kamponya wamupangele mutongwe wa mu Isalele, co uje kamponya kesi njambi embwe! Uje ngombe wa nkomba wa ngolinde valemesa vanu va mu Samaliya vakamupujula vimbazuvwila-mbazuvwila!

⁷ Omo vakuna lihunzi, vateja kankumba! Nga vimbuto vyakulinga makende kuvihi kuvasa kulinga makende embwe. Oloni nameme vihya, vaka-kwija vakavilya vyoshe njwa!

⁸ Isalele vanemuka ngwe miyati yeka kuvesi na seo ngwe ndeo ya vuma ya kutsa.

⁹ Vanu va mu Isalele vanakaluwa ngwe vimulu vavukalu, co valinakuya mu ngila yavo vavenya. Vanai nakukashakezeka vukwasi ku Asilya, co vanafwete mafuti eka ngeci vavanyunge.

¹⁰ Oloni ololo njikavakungulula nakuvanyanyamesa. Ololo vakalikotinga mukuvinjoka omo mwene wa Asilya akavayandesa.

¹¹ “Vanu va mu Isalele vanawezelela mitula mukutundisa vuvi, oloni valinakutumisa lika mitambela yakulingila vuvi!

¹² Njisonekela vanu vilongesa vyavingi, oloni valinakuvivyana ngwavo vinapu vyakukomokesa vya vungenzi kuli vakevo.

¹³ Vakombelela vin̄ombelo kuli yange nakulya situ ya vin̄ombelo. Oloni yange Kalunga, kunjesi nakuvwaelela navo embwe, njikanuka vuvi vwavo nakuvanyanyamesa, co njikavelwisa lalo ku Ingito!

¹⁴ “Vanu va mu Isalele vanatungu mapela, oloni vanevala Muka-kuvatanga. Co vanu va mu Yunda vanatungu vinganda vya vimpaka. Oloni njikatuma tuhya mukwenyeka mapela avo na vinganda vyavo.”