Hoziya 7 - Livulu lya Shukulu Kalunga

¹ “Oshe aje anjishakela kukangwisa vanu vange va Isalele ngeci vakale lalo mwamuvwa, vyoshe njilinakumona vinapu kupenga-penga kwavo na vuvi vuje valinakulinga. Valinakulikwisa umo na mukwavo, vatuva vinjuvo nakwiva, co vevila vanu mu vitapalo.

² Oloni kuvayongola ngeci njikanuka evi vipangi vyavo vyavivi, ololo vivi vyavo vinavazengeleka, kuvyasa kuvanda ku mesho ange.”

Vungungu mu lipela

³ Shukulu Kalunga alinakwendeka ngwendi, “Vanu valinakukwisa mwene na vamyata vendi a matumbe avo amavi.

⁴ Voshe vali na mashungu amavi vakujeneka kulongwa. Cizindo cavo cikakumuka ngwe vitale mu liko lya kwocela makende, vije kasa kushambeya muka-kwoca makende noo mukasha wa makende unafutunuka ngeci vawoce.

⁵ A litangwa lya ciwano cakulisamba ca mwene, co vapendesele mwene na vamyata vendi na vinyu kuvapwisa vikolokomba.

⁶ Eyo, vazivile voo ku vimbunge vyavo ngwe liko lyakwocela makende omwo vutumbe vwavo. Co vutsiki vwoshe kuluvala kwavo kwakakumukile ngwe vwisi, co ku mutondo kuluvala kwavo kwatuukile ngwe milangi.

⁷ “Mukushukuma kwa vukalu vwavo vatsiile vantwama vavo. Vimyene vavo vavatsiile umo na umo kulikavasana, oloni naumo wai walombelele kuli yange ngeci njivakwase.”

Isalele na miyati yeka

⁸ Shukulu Kalunga alinakwendeka ngwendi, “Vanu va mu Isalele vanapu ngwe mukasha wa likende uje kuwahile kwoca. Valinakuyoyela ali vaka-mafuti vaje vanavazengeleka,

⁹ co kuvanangukile ngeci oku kuyoyela a miyati ya mafuti eka cikeco cinavanyeke nzili yavo. Matangwa avo anapu amandondo, oloni kuvazivuka cuma eci.

¹⁰ Kulyalesa kwa vanu va mu Isalele kulinakumwesa mulonga wavo. Nameme vyoshe vije vyasholokele, vakevo kuvelukile kuli yange Kalunga Njambi yavo.

¹¹ Isalele alinakupulula ngoco ngwe liyembe wakujeneka mana, vanu vendi akulivanga valinakusana Ingito mukuvakwasa, co lalo vatewela ku Asilya!

¹² Oloni njikata linimbwa nakuvakwata ngwe tuzila omo vaya. Njikavanyanyamesa a vuvi vuje vanalingi.

¹³ “Vananyongo! Vananjiseza nakunjitengulukila. Vakavanyongesa. Njashakele kuvamena, oloni kunjilemesa kwavo kwapwile kwa makuli.

¹⁴ Kuvalombelele kuli yange na mbunge ya vushunga, oloni vakele nakulyalanga asi nakulila ngwe muvakalingi vaka-kujeneka kukulaela. Omo valombela a vimbuto na a vinyu, valinakulitwa vimbandu a mivila yavo ngwe vaka-kujeneka kukulaela. Vanapu vaka-kutengulukila!

¹⁵ Nameme njakavalelele nakuvapwisa vaka-nzili, oloni vanjitumbilile matumbe akunjilwisa.

¹⁶ Co vacili nakutwalao kutunda kuli yange nakuya kuli njambi uje wakujeneka nzili. Kuvasa kuvakulaela vanapu ngwe vuta vwa lusipa vwa kupenga-penga. Omwo vantwama vavo vendeka na kulyalesa, vakatsila mu nzita, co vaka-Ingito vakavajola.”