Hoziya 6 - Livulu lya Shukulu Kalunga

Kutenguluka kwa vanu kwa makuli

¹ Vanu vendeka ngwavo, “Ijeni twiluke kuli Shukulu Kalunga. Nameme natusanyozola vipuka-vipuka, oloni akatukangwisa lalo, nameme natutu vimbandu, oloni akatuzengao vinanga.

² Munima ya matangwa avali nambe atatu, akatwindula, ngeci tukayoye ku mesho endi.

³ Tulilongeseni kuzivuka Shukulu Kalunga. Mwa vushunga vene akaija kuli yetu ngwe kutuuka kwa litangwa, ngwe nyonzi a simbu ya ndombo ije ikajulisa livu.”

⁴ Oloni Shukulu Kalunga alinakwendeka ngwendi, “Isalele na Yunda, cuma mukajo njikalinga kuli yeni? Cizemo ceni kuli yange cilinakuhwa vwasi-vwasi ngwe mbundu ku mutondo, cinapu ngwe lime lije likatotomoka ku mutondo-tondo.

⁵ Omu mukemwo njatumu vaka-kwimanena vange kuli yeni na majwi a kusompa na akunyongesa. Vinjishaka kuli yeni vinapu vyavyasi vinalumbunuka vikevyo evi.

⁶ Njishaka cizemo ceni cije kucesi kutenguluka, kesi vin̄ombelo vyeni vya tusitu embwe. Njishaka ngeci vanu vange vanjizivuke kutuvakana vanjikombelele vin̄ombelo vya kwenyeka.

⁷ “Oloni vwasi-vwasi omo vakovelele mu lifuti ku Andama, co vapokwele cikumiiyo cije njalikumiiye navo.

⁸ Ngilyande inapu nganda ije inashulu na vanu vaka-vuvi na vaka-kutsiya.

⁹ Vaka-kukombelela vanapu ngwe munga ya vezi vaje vavandamena munu. Nameme mu tapalo yakuya ku mutambela wakujela ku Shekeme anga vene vatsiya. Co valinga vyuma evi vyavivi na cizango cavo!

¹⁰ Njinamono cuma ca vunyengwe mu Isalele, vanu vange vanalijwalesa vakevo vavenya mukulemesa tumponya.

¹¹ “Co ngeci mweni vanu va mu Yunda, njinemika simbu yakuminyanyamesa neni lalo a vije vimulinakulinga.