Hoziya 4 - Livulu lya Shukulu Kalunga

Kusompa kwa Shukulu Kalunga ali Isalele

¹ Yeni vaIsalele tolilileni ku majwi a Shukulu Kalunga, omwo Shukulu Kalunga alinakusompa vanu vaje vali mu lifuti eli. Shukulu Kalunga alinakwendeka ngwendi, “Kulongwa na cizemo vyaimo mu lifuti, co vanu kuvesi nakutava ngeci yange njapwa Njambi.

² Valinga vikulaeso, co lalo vavipokola, vendeka makuli, nakutsiya, nakwiva, nakulinga vupangala. Muuka unatumu, co lalo kutsiya kwakulikavasana kulinakutwalao simbu yoshe.

³ Ngecivene, lifuti likauma cau, co vyuma vyoshe vije vyakalamo vikatsa. Tusitu na tuzila voshe nameme visi vakatsa.”

Kusompa kwa Shukulu Kalunga ali vaka-kukombelela

⁴ Shukulu Kalunga alinakwendeka ngwendi, “Kesi mutave umo avangele vanu nambe kuvendekela, omwo kulinyenga kwange kuli ali yeni vaka-kukombelela.

⁵ Vutsiki na mutanya mukatanozoka, co lalo na vaka-kwimanena valinakutanozoka ngeci mweni. Co njikanyongesa Isalele, vanyoko.

⁶ Vanu vange vali na luvinda omwo kuvesi nakunjononoka. Yeni vaka-kukombelela munavyana kunjononoka, co lalo munavyana vilongesa vyange, ngecivene, njikamivyana, co kunjikatava vana veni kupwa vaka-kukombelela vange.

⁷ “Omwo mumunatuminamo yeni vaka-kukombelela, mukemwo lalo mumuli nakulinga vuvi vwavungi kuli yange. Co njikatengulula kasingimiko keni kupwa shwamwa.

⁸ Muli na vufuko vwakutunda a vuvi vwa vanu vange, co mushaka lalo ngeci vacitwaleo kulinga vuvi manene.

⁹ Ngecivene, vakaminyanyamesa ngeci mwa vanu voshe! Njikaminyanyamesa nakumiilwisila vuvi vuje mulinakulinga.

¹⁰ Mukalya litambelo lyeni lya vin̄ombelo, oloni kumukakuta, mukalemesa njambi wa lusemo, oloni anga kumukakala na vana, omwo munanjikengesa nima nakukava vinjambi veka.”

Shukulu Kalunga ahisa kulemesa vinjambi vangoco

¹¹ Shukulu Kalunga alinakwendeka ngwendi, “Vinyu vyalaja nevi vyaviha vijenekesa vanu vange mana!

¹² Vanu vange valomba mana ku tumponya twavo twa viti! Co viti vivaleka vije vivashaka kuzivuka! Vananjiseza. Ngeci mwa munakazi uje alipwisa cikwizi, vanu vange vanalyana vakevo vavenya ku vinjambi veka.

¹³ Co aje a mitambela yakujela akamwa ya minkinda akeo valinakukombelela vin̄ombelo, co a malundu venyekelao insense mwisi ya miti yailaja, yakujanjavala, omwo munzinze unapu wauvwa! “Omwo vyuma evi, vana veni va vanakazi vanapu vikwizi, na vanyokomweno valinakulinga vupangala.

¹⁴ Oloni kunjikavanyanyamesa a vyuma evi embwe, omwo neni mulinakulinga vukwizi na vikwizi va mu njuvo yakulemesela, co mukombelela vin̄ombelo ku vinjambi veka amolika navo. Ngwe cisimo ngwaco, ‘Vanu vakujeneka mana vakanyonga!’

¹⁵ “Nameme yeni vanu va mu Isalele munapu vakujeneka kulongwa kuli yange, ngeci vene Yunda kesi alizive ngwe ali na mulonga wa cuma eci embwe. Kesi muye ku Ngilingale nakulemeselako nambe ku Mbetele, nambe kulinga cikulaeso mu lizina lya Shukulu Kalunga wakuyoya.

¹⁶ Vanu va mu Isalele vanakaluwisa manene vimbunge vyavo ngwe ngombe wa lwavo. Vatijo njasa kuvalisa ngwe vimanga mu mwila wauvwa?

¹⁷ Vanu va mu Isalele vanaangula kulemesa tumponya. Veceleni vaye mu ngila yavo.

¹⁸ Omo vananu vinyu vyavingi, co vavwaelela mukulinga vukwizi, vazema vyuma vya shwamwa kutuvakana kasingimiko.

¹⁹ Vakavapekumwina kulyala ngwe lihunzi mulikapekumuna vishoni, co vakaziva shwamwa a vin̄ombelo vyavo vyakukombelela ku tumponya.