Hoziya 2 - Livulu lya Shukulu Kalunga

¹ Ngecivene, sana vakweni vaIsalele ngwove “Vanu va Njambi” na “Vaje Vaazema Shukulu Kalunga.”

Ngomele wakujeneka kulongwa na Isalele lalo wakujeneka kulongwa

² Vana vange, lambeleleni vanyoko, nameme vene ikeye kapwile munakazi wange, co lalo yange kesi nji munalume wendi. Mulambeleleni ngeci alikele vupangala vwendi na vukwizi vwendi.

³ Nga shendi kulikela, co njikamushulula nakumupwisa wa mushelengwa ngwe muje mwafwile a litangwa lyendi lyakusemuka. Njikamupwisa ngwe lifuti lyakuminina cau lya vimena, co akatsa ku lihwila.

⁴ Kunjikazeme vana vendi, omwo vanapu vana va cikwizi wa shwamwa.

⁵ Omwo Ngomele wendekele ngwendi, “Njikakava vaka-cizemo cange vakanjana vyakulya na mema, na vyakuzala vya maka a vimanga na nanga ya linyu, na mazi a olive, na vinyu.”

⁶ Ngecivene, njikamusitila mu cipatanga ca mishwena, nakutunga civumbe cakushoka ngila yendi.

⁷ Akakava vaka-cizemo cendi, oloni kakavawana. Akavakengezeka, oloni kakavawana. Asinoni akendeka ngwendi, “Njiiluka kuli munalume wange wakulivanga, kuje njakele mwamuvwa kutuvakana muno munjili kuno ololo.”

⁸ Kuma kanangukile ngeci yange uje njamwanene vimbuto, na vinyu, na mazi a olive, na siliva, na ngolinde yoshe vije vyakele nakupangesa mukulemesa Mbale.

⁹ Ngecivene, a simbu ya kuteja njikamunyeka vije vimbuto na vinyu vinjamwanene, co njikamunyeka lalo vije vuzalo vwa maka a vimanga na vije vinanga vya linyu vinjamwanene ngeci azale.

¹⁰ Njikamushulula akale mushelengwa ku mesho a vaka-cizemo cendi, co naumo wai akasa kumwamena ku nzili yange.

¹¹ Co njikavindika viwano vyendi vyakulisamba vyoshe, viwano vyendi vya a mwaka na mwaka, na a ngonde na ngonde na viwano vyendi vyakulisamba a Litangwa Lyakuhwima, na vikungulukilo vyendi vyoshe vyakulemesa.

¹² Njikanyongesa mikolovozi yendi ya vushuka vwa vinyu na miti yendi ya mikuyu, vije vyendekele ngwendi vaka-cizemo cendi vamwanenevyo kupwa fweto yendi omo walingile navo vupangala. Co njikatengulula vitungu vyendi vya mikolovozi ya vushuka vwa vinyu na vitungu vya miti ya vushuka kupwa mambo, co tusitu vakaviviisa.

¹³ Njikamunyanyamesa a visimbu vije vyananjivalele, omo wenyekelele insense kuli Mbale nakuzala vuzalo vwendi vwa senga mukukavangeya munima ya vaka-cizemo cendi. Mwanendeka Shukulu Kalunga.

Cizemo ca Shukulu Kalunga ali vanu vendi

¹⁴ Ngecivene, njikamutwala lalo mu mambo, co kuje njikamwilwisa lalo kuli yange na majwi akumuzembeleka a cizemo.

¹⁵ Co njikamwana lalo vitungu vyendi vya mikolovozi ya vushuka vwa vinyu vije vyakele navyo laja, nakutengulula Cana ca Tuyando kupwa cikolo ca cinyangavili. Co akanjitava ngwe muje mwalingile omo wapwile wamundondo, omo watundile ku Ingito.

¹⁶ Asinoni akanjitumbula lalo ngwendi nji munalume wendi, co lalo kakanjitumbula ngwendi nji Mbale wendi embwe.

¹⁷ Kunjikamutavesa kutumbula lizina lya Mbale lalo embwe.

¹⁸ Co a simbu ije njikalikumiiya cikumiiyo na tusitu voshe va mu shwata na tuzila, ngeci kesi vakavulumune vanu vange. Njikatundisa lalo vitwa vyoshe vya nzita mu lifuti, mikwale yoshe na mata a lusipa oshe, co njikatava vanu vange ngeci vayoye mu kwoloka na mukujeneka vushonde.

¹⁹ Isalele, njikakupwisa u munakazi wange, njikapwa wa vushunga na kulongwa, co njikakumwesa cizemo cije kucesi kutenguluka na mema ku mbunge nakukupwisa u wange ku myaka yoshe.

²⁰ Njikanyunga cikulaeso cange nakukupwisa u wange wa cikongo ca mbunge, co ukazivuka ngeci yange nji Kalunga.

²¹ A simbu ije vene njikakumbulula malombelo a vanu vange va Isalele.

²² Njikanyokesa nyonzi mu lifuti, co asi akamenesa vimbuto na mikolovozi ya vushuka vwa vinyu na mazi a olive.

²³ Njikatungisa vanu vange mu lifuti nakuvavezikisa. Co njikamwesa cizemo kuli vaje vavatumbwile ngwavo, “Vakujeneka Kuzema,” nakwendeka kuli vaje vavatumbwile ngwavo “Kesi Vanu Vange,” ngwange, “Mu vanu vange,” co vakanjikumbulula ngwavo, “Yove u Njambi yetu.”