Hoziya 14 - Livulu lya Shukulu Kalunga

Hoziya emanena Isalele

¹ Yeni vanu va mu Isalele, ilukeni kuli Shukulu Kalunga Njambi yeni. Vuvi vweni vunamitanukisa nakumiwisa.

² Ilukeni kuli Shukulu Kalunga, co taveni lilombelo eli kupwa n̄ombelo yeni kuli ikeye, “Tusambese ku vuvi vwetu vwoshe, nakutambula lilombelo lyetu, co yetu tukakushangazala ngwe muje twakukulaesele.

³ Vaka-Asilya kuvasa kutwamena, nameme tuvalu twa nzita kuvasa kutwamenena. Kutukendeka lalo ku tumponya twetu ngwetu, ‘Yeni munapu Njambi yetu’ embwe. Yove Shukulu Kalunga, ukazivila mema ku mbunge vaje kuvesi noku kweka vasa kuya.”

Shukulu Kalunga akulaesa mwonyo wauha kuli Isalele

⁴ Shukulu Kalunga alinakwendeka ngwendi, “Njikelwisa lalo vanu vange kuli yange vavenya. Njikavazema na mbunge yange yoshe, vukalu vwange ali vakevo vunahu.

⁵ Njikakala amo na vanu va mu Isalele ngwe nyonzi mu lifuti lyakuma. Vakashamuna ngwe vishani, co vakakola mbe ngwe mizi ya miti ya ku Lembanone.

⁶ Vakapwa ngwe kukola kwa minango, vakapwa vavavwa ngwe miti ya olive. Co vakanika lwengo lwaluvwa ngwe miti ya kendale ya ku Lembanone.

⁷ Vakakala kuli yange mu kwoloka. Co vakakola ngwe vimbuto, nakutuma manene ngwe mukolovozi wa vushuka vwa vinyu. Co vakapwa vaka-lutsimo ngwe vinyu vya ku Lembanone.

⁸ Vanu va mu Isalele kuvakalemesa lalo tumponya embwe. Njikakumbulula malombelo avo nakuvanyunga mwamuvwa. Njikavana munzinze, ngwe muti uje kuwesi kutotomoka maputa awo, yange njapwa nji nsina ya vivezikiso vyavo vyoshe.”

Mamaneselelo a visoneka

⁹ Voshe vaje vaka-kunyanyama vazivuke vije vivanasoneka muno, nakuvinyunga mu mbunge. Vingila vya Shukulu Kalunga vyapwa vya vushunga, vaka-vushunga vayoya mu vikevyo, oloni vaka-vuvi vatanuka nakuwa omwo vavivyana.