Hoziya 12 - Livulu lya Shukulu Kalunga

¹ “Vyuma vyoshe vije vivakalingi vanu va mu Isalele kutunda ku mutondo nakweta ku vutsiki kuvyesi na seo, co vinapu vyakunyongesa. Makuli na vilinga vya muuka vinatumu akati kavo. Co valinakulikumiiya cikumiiyo na vaAsilya, nakulinga nganyo na vaka-Ingito.”

² Shukulu Kalunga nawana mulonga ku vanu va mu Yunda, co lalo akanyanyamesa Isalele a vyuma vije vanu vendi valinakulinga. Akavalinga shambandinga a vije vivanalingi.

³ Kukulwila yavo Yakomba walwile na munaina simbu vacili mwimo lya vaina, co omo Yakomba wakolele, walwile na Njambi.

⁴ Walwile na kangelo, co wamuhyanene. Yakomba walilile nakulomba civezikiso. Co Njambi wezile kuli kukulwila yetu Yakomba ku Mbetele, co wendekele nendi.

⁵ Ou ikeye Shukulu Kalunga Njambi Muka-nzili yoshe, Shukulu Kalunga lyapwa lizina lije vakamulemesa nalyo.

⁶ Ngecivene, ololo yeni vatekulwila va Yakomba, kulaeleni kuli Njambi yeni nakwiluka kuli ikeye. Pweni vaka-kulongwa nakupwa vanu va vushunga, co vandameneni nakusimpa ngeci Njambi yeni apange.

Majwi akwavo akusompa

⁷ Shukulu Kalunga alinakwendeka ngwendi, “Vanu va mu Isalele vanapu ngwe vaka-Kanana vakujeneka kwononoka, vazema kukwisa vanu vaje vaija mukulanda kuli vakevo na vipeseleso vya makuli.

⁸ Vendeka ngwavo, ‘Tunapu vaka-kufuka. Tunavezika. Co naumo wai akatwana mulonga a vufuko ovu vwoshe tunawana mu ngila ya makuli.’

⁹ Oloni yange Kalunga Njambi yeni, uje wamitundisile mu Ingito, njikamilingisa ngeci mukakale mu vimbalaka lalo, ngwe muje mumwakele omo njezile kuli yeni muje mu mambo.

¹⁰ “Njendekele kuli vaka-kwimanena, co njavasholwelele vimona vyavingi. Co njanangwile vanu vange ali vaka-kwimanena.

¹¹ Oloni tumponya valinakutulemesa mu Ngilyande, co vaje vatulemesa vakatsa. Co vingombe va nkomba vavakombelela kupwa vin̄ombelo ku Ngilingale, mitula ikapwa ngwe mitumbo ya mamanya akuvujuka.”

¹² Co kukulwila yetu Yakomba watewelele ku lifuti lya Alame, kuje wakanyungile vimanga ngeci awane munakazi ambate.

¹³ Co Shukulu Kalunga watumine muka-kwimanena mukupatula vanu va mu Isalele ku vundungo mu Ingito, nakuvanyunga mwamuvwa.

¹⁴ Vanu va mu Isalele vanaluvalesa manene Shukulu Kalunga, co vanapande kutsa a milonga yavo. Co Shukulu Kalunga akavanyanyamesa a shwamwa ije vamuzivisile.