Hoziya 10 - Livulu lya Shukulu Kalunga

¹ Vanu va mu Isalele vapwile ngwe mukolovozi wa vushuka vwa vinyu uje wakele na vushuka vwavungi. Omo vakele mwamuvwa manene, co lalo vatungile mitula yaingi manene. Omo lifuti lyavo lyakele na vwilo manene, co lalo valingile vimanda vyavivwa manene vyakujela vije valinakulemesa.

² Vanu vaje vimbunge vyavo vinapu vya makuli ololo vanapande kuyanda a vivi vyavo. Njambi akasiwula mitula yavo nakupokozola vimanda vyavo vyakujela.

³ Vanu ava ololo vendeka ngwavo, “Kutwesi na mwene omwo kutwakomokele Shukulu Kalunga. Oloni cuma mukajo lalo napande kutulingila mwene?”

⁴ Vendeka majwi angoco nakulikumiiya vikumiiyo vya makuli nakulinga vusamba vwa makuli. Co vushunga vunemuka vuvi, vulinakukula ngwe shaku ya vushungu mu lihya livanalimi.

⁵ Vanu vaje vali mu nganda ya Samaliya vakaziva lyova, co vakalila a uje ngombe wa ngolinde wa ku Mbetele. Co vakevo na vaka-kukombelela vaje vapangela uje kamponya vakakalilila. Vakalila omo vakamona valinakukatundisa vuvwa vwako vwa ngolinde.

⁶ Co kaje kamponya vakakatwala ku Asilya kupwa kalambu kuli mwene wakama wakuje. Co Isalele vakamushaula nakumuzivisa shwamwa omwo kunangula kuje wakavele.

⁷ Mwene wa mu Samaliya vakamwambata, ngwe citi cilinakuungumuka na mema.

⁸ Mitula ya akamwa ya malundu a Avene kuje vakele nakulemesela vaIsalele tumponya vakainyongesa. Co mambimbo na shaku vikamena akamwa ya mitula yavo. Co vanu vakatambeka ku minkinda ngwavo, “Tushwekeni!” Na ku malundu lalo ngwavo, “Tuwileni!”

Shukulu Kalunga endeka vyakusompa Isalele

⁹ Shukulu Kalunga alinakwendeka ngwendi, “Vanu va Isalele kuvalikelele kulinga vuvi ku mesho ange tunde a simbu ije valingile vuvi ku Ngimbeya. Ngecivene, nzita ikavawana ku Ngimbeya.

¹⁰ Njikalwisa vaje vanu vaka-vuvi nakuvanyanyamesa. Co vaka-mafuti vakalipandakana amo mukuvalwisa, co vakavanyanyamesa a vuvi vwavo vwavungi-vungi.

¹¹ “Isalele wapwile ngwe ngombe wa lwavo wakulongesa mwamuvwa, uje wazema kujungula vimbuto. Oloni njayongwele kumwaka mandauluwa a mukoshi wendi wauvwa manene, ngeci apange vipangi vyakukaluwa nakumulemuwisa. Njalingisile Yunda kukoka litemo, co Isalele wakavele munima nakuvujula masinde.

¹² Njendekele ngwange, ‘Limeni kwoloka, nakukuna vushunga, co mukateja vivezikiso vije vikasholoka akulikundika kweni kuli yange. Simbu yeni yakwiluka kuli yange Kalunga keni inete, co njikaija nakumivezikisa!’

¹³ Oloni mwakunine vuvi na kuteja vuvi lalo. Munali ku vushuka vuje vwatundu ku makuli eni. “Omo mwakulaelele a matemba eni a nzita, na a vungi vwa mashwalale veni,

¹⁴ nzita ikaija ali vanu veni, co vimpaka vyeni vyoshe vakavinyongesa. Cikafwa ngwe a litangwa lije omo Mwene Shalamane wanyongesele nganda ya Mbetelavele mu nzita, co vainavo na vana vavo vavatsiilile mu nzita.

¹⁵ Omu mukemwo mucikapwa kuli yeni vanu va ku Mbetele, omwo vuvi vuje vwakama vumunalingi. Omo nzita ikashangumuka, co mwene wa Isalele akatsa.”