Hangai 2 - Livulu lya Shukulu Kalunga

Vuvwa vwa Njuvo ya Shukulu Kalunga yaiha

¹ A litangwa lyamumakumi avali na limo ku ngonde yamucitanu na vivali mu mwaka uje vene, Shukulu Kalunga wendekele lalo kuli Hangai muka-kwimanena.

² Shukulu Kalunga walekele Hangai kwendeka kuli Zelumbambele, nguvulu wa mu Yunda, na kuli Yoshwa Muka-kukombelela Wakama, na kuli vanu, ngwendi,

³ “Kwali umo akati keni uje acili nakwanuka vuvwa vwa Njuvo yange yalaja ndi? Vatijo munaimono muyinafu ololo? Inapu vene ngwe vyangoco.

⁴ Oloni ololo kesi muzeye yeni voshe, pangeni vipangi, yange njili amo neni.

⁵ Omo mwatundile mu Ingito, njamikulaesele ngwange njikakala amo neni simbu yoshe. Co anga vene njili amo neni, ngecivene, kesi muzive lyova embwe.

⁶ “Mu kasimbu lika kakandondo njikajajesa lilu na asi, na lifuti, na mema a kalunga.

⁷ Co njikatundisa miyati yoshe ya vanu, na vyuma vyavo vyoshe vya seo vikaija kuno, co Njuvo yange ikashula na vufuko.

⁸ Siliva yoshe na ngolinde yoshe ya mu lifuti vyapwa vyange.

⁹ Njuvo yange yaiha ikapwa yaivwa manene kutuvakana ije yakulivanga. Co njikana vanu vange vuvwa na kwoloka.” Mwanendeka Shukulu Kalunga, Muka-nzili yoshe.

Muka-kwimanena ehula vaka-kukombelela

¹⁰ A litangwa lyamumakumi avali na awana ku ngonde yamucitanu na viwana mu mwaka wamucivali omo Ndalyuse wapwile mwene, co Shukulu Kalunga wendekele lalo kuli Hangai muka-kwimanena ngwendi,

¹¹ “Ihula vaka-kukombelela cihula eci ngwove,

¹² ‘Nga munu umo ambata cipuka ca situ yakujela a cikoveyo cendi, co omo enda cikoveyo cendi cimbola ku likende, nambe kuvyakulya vya kuteleka, nambe ku vinyu, nambe ku mazi a olive, nambe ku vyakulya vya muyati weka, co vyakulya vije vikajela ndi?’ ” Omo vaka-kukombelela vavehwile, co vakumbulwile ngwavo, “Embwe.”

¹³ Asinoni Hangai wehwile ngwendi, “Nga munu umo nalijwalesa omo nakwatele a civimbi. Co nga akwata lalo a vyakulya, co vije vyakulya vikajwala ndi?” Co vaka-kukombelela vakumbulwile ngwavo, “Eyo.”

¹⁴ Asinoni Hangai wendekele ngwendi, Shukulu Kalunga alinakwendeka ngwendi, “Cuma eci vene cinalifu na vanu va muyati ou, na vyuma vyoshe vivalinga, ngecivene, vyuma vyoshe vivakombelela a mutula vinapu vyakujwala.”

Shukulu Kalunga akulaesa vivezikiso vyendi

¹⁵ Shukulu Kalunga alinakwendeka ngwendi, “Kumwamwene vije vinalingiwa kuli yeni? Simbu kanda mushangumuke kutungulula Njuvo yange,

¹⁶ mwaile ku mutumbo wa vimbuto ngeci mukashakeko makilo 200, oloni mwakawaneneko lika makilo 100. Mwaile mukutekula malita 100 a vinyu vyakutunda mu shuwa yakama, oloni mwawanene lika malita makumi awana.

¹⁷ Njatumine litanya na nyonzi ya mamanya mukuviisa vyuma vyoshe vije mwakunine, oloni nameme ngoco kumwatengulukile.

¹⁸ Lelo linapu litangwa lyamumakumi avali na awana ku ngonde yamucitanu na viwana, likelyo litangwa munamanesa luvula lwa Njuvo yange. Kengeni vije vikalingiwa lelo nakuya kulutwe.

¹⁹ Nameme kukwesi vimbuto vyasalao, na mikolovozi ya vushuka vwa vinyu, na miti ya mikuyu, na mapomingilanete, na miti ya olive kanda iciime, oloni kutunda ku lelo na kulutwe njikamivezikisa.”

Cikulaeso ca Shukulu Kalunga kuli Zelumbambele

²⁰ A litangwa lije vene, litangwa lyamumakumi avali na awana ku ngonde ije vene, Shukulu Kalunga wendekele kuli Hangai simbu yamucivali ngwendi,

²¹ “Leka Zelumbambele, nguvulu wa mu Yunda ngwove, njikajajesa lilu na asi,

²² nakutundisa vumwene nakushika kwavwo. Njikafulumika matemba na vaka-kuwendesa, tuvalu vakatsa, co vaka-kulondao vakalitsiya umo na mukwavo.

²³ A litangwa lije vene njikakwambata yove Zelumbambele ngamba yange, co ukashwana mu lizina lyange. Yove vene injinaangula.” Mukemwo mwanendeka Shukulu Kalunga, Muka-nzili yoshe.