Hambakuke 2 - Livulu lya Shukulu Kalunga

Shukulu Kalunga akumbulula Hambakuke

¹ Njikalonda a kaposhi kange nakuvandamena njimone vije vyanjileka Shukulu Kalunga ngeci njivyendeke, nakukumbulula kwendi akulinyenga kwange kuli ikeye.

² Co Shukulu Kalunga wanjikumbulwile ngwendi, “Soneka mwamuvwa cimona eci a vitale vya vuma, ngecivene, cikapwe cacasi kuli uje acilava.

³ Cisoneke, omwo simbu kanda yete ngeci vyuma evi vikalingiwe. Oloni simbu ilinakwija vwasi omo vyuma evi njilinakukumwesa vikalingiwa. Nameme vene vikevyo vinambata simbu ngeci vilingiwe, vandamena lika, vikevyo vikalingiwa a simbu injemika, kuvikeshwala embwe.

⁴ Co awa akewo majwi, ‘Vaka-vuvi vakatsa, oloni vaka-vushunga vakayoya omwo vakonononoka kuli Njambi!’ ”

Luvinda ali vaka-kujeneka vushunga

⁵ Vufuko vukakwisa. Vanu vaka-linyanyamena vapwa vaka-kulyalesa, co kuvesi kujuka, ngwe kutsa nakwo kukwesi kujuka. Omu mukemwo vakafungulula muyati na muyati wa vanu.

⁶ Vanu vaje lifuti lyavo vaMbambilone vanalitambula na nzili vakayeluwisa nakushendumuna vaMbambilone ngwavo, “Yeni mukambata vije kuvyapwile vyeni, oloni Njambi akaminyanyamesa! Mukafuka visimbu vingaijo akusindiya vanu vaje mwakumwisile vimbongo ngeci vamifwete?”

⁷ Oloni simbu kanda mucizivuke cuma eci, yeni mwafungulwile vakweni mukakala na likongo yeni vavenya, co vakamisindiya ngeci mufwete kakondweso. Vitozi vakaija nakumizivisa lyova. Vakamipukula!

⁸ Yeni mwapukwile vanu va miyati yaingi, oloni ololo vaje vasaleleo vakevo vakamipukula. Eci cikalingiwa omwo mwatsiile vanu vavangi, co lalo mwalingile muuka ku vanu va lifuti na vinganda vyalyo.

⁹ Munavindama! Munafukisa naanga yeni na vije mwambatele akupanga muuka, co munatungu membo amavwa muje muli kwoloka ngeci naanga yeni kesi vakale mu vushonde!

¹⁰ Oloni matumbe eni ananena shwamwa a naanga yeni, mwalikokela n̄ole yeni vavenya akunyongesa miyati ya vanu vavangi.

¹¹ Nameme livu lya a vivumbe lilinakumililila, na mashoko alinakutava miteto eyi.

¹² Munavindama! Yeni mwajalele luvula lwa nganda na vilinga vya muuka, nakuyitunga na vilinga vyakutsiya vanu.

¹³ Miyati ya vanu vaje mwafungulwile valipakesele ngoco vipangi vyakujeneka seo, co vyoshe vije vivatungile vinenye na tuhya. Shukulu Kalunga Muka-nzili yoshe ikeye walingile vyuma evi.

¹⁴ Oloni kaye kakashula na mana a vumpau vwa Shukulu Kalunga ngwe mema a kalunga mwakajalela.

¹⁵ Munavindama! Mu vukalu vweni mwapwisile vakweni ngwe vangoco na kuvazivisa shwamwa, mwavapelyangesele ngwe vaka-kupenda.

¹⁶ Neni lalo mukaziva shwamwa nakujeneka kasingimiko. Neni vene mukanwa nakupelyangela. Shukulu Kalunga akaminwisa mu nganja yeni ya cihiso, co kasingimiko keni kakapwa shwamwa.

¹⁷ Munashinji vishwata vya Lembanone, co neni lalo vakamishinja. Mwatsiile tusitu vamwo, co ololo tusitu vamwo vakamitewesa. Eci cikalingiwa omwo mwatsiile vanu vavangi, co lalo mwalingile muuka ku vanu va lifuti na vinganda vyalyo.

¹⁸ Seo mukajo ili a kamponya? Capwa lika cuma cakupanga ku munu, kakendeka lika vyuma vya makuli. Vuvwa mukajo kakalingi kuli uje wakapangele ngeci akakulaele, njambi uje wakwonwa kwendeka?

¹⁹ Munavindama! Yeni mukendeka ku citi nambe ku limanya ngweni, “Induka!” Kuma kamponya kasa kumisholwela cuma cimo ndi? Nameme vanu vanakafwiki siliva na ngolinde, oloni kukesi na mwonyo.

²⁰ Shukulu Kalunga ali mu Njuvo yendi yakujela, ngecivene, munu woshe ali ano asi oloke kuluu ku mesho endi.