Filipu 2 - Livulu lya Shukulu Kalunga

Kulikeesa kwa Kilistu na vukama vwendi

¹ Myonyo yeni muli Kilistu ilinakumyana nzili, na cizemo cendi cilinakumizembeleka. Muli na kulitombola na Munzinzime, co muli na mbunge ya ngozi nakulitetela umo na mukwavo.

² Ngecivene, njimilambelela munjivwaelelese akukala na viyongola vimo nakulipangela cizemo cimo, nakupwa cuma cimo mu mwonyo na mu mana.

³ Kesi mulinge cuma cimo na viyongola vya cipululu, nambe na mashungu akulishasha; oloni likeeseni ku mesho a umo na umo, simbu yoshe yongoleni vakweni ngwe vanapu vavavwa kumihyana yeni.

⁴ Simbu yoshe shakezekeni vije vyasa kuvwaelelesa vakweni veka lalo, kesi mulivwaelelese yeni vavenya.

⁵ Akati keni kaleni na mbunge ya cifwa cije cakele naco Kilistu Yesu.

⁶ Ikeye simbu yoshe wakele na cifwa ca Njambi, oloni kayongwele kupwa amo na Njambi, cuma cakukakateya.

⁷ Oloni, a cizango cendi vavenya wecelele vyoshe wakele navyo, co watambwile cifwa ca ngamba vene. Wasemukile vene ngwe mwakasemuka munu woshe, washolokele mu cifwa ca vunu.

⁸ Co walikeesele nakwenda mu ngila yakwononoka kutwala ku kutsa kwendi, kutsa kwendi a cilindakano.

⁹ Omwo a cuma eci Njambi wamwimikile nakumwaka a mwela wa akama, nakumwana lizina lyakama kuhyana lizina lyoshe.

¹⁰ Ngecivene, vyuma vyoshe vili mwilu, nevi vili ano asi, nevi vili mwisi ya kaye, vikatsikama a mavuli, mukwana kalemeso lizina lya Yesu,

¹¹ co voshe vakambulula ngwavo Yesu Kilistu ikeye Mwene, ku vumpau vwa Njambi Tatetu.

Tweni ceke muno mu kaye

¹² Ngecivene, vasamba vange, ngwe simbu yoshe mwanjononokele omo njakele neni amo, mukemwo vene cuma cakama munapande kunjononoka nambe yange njiwaiko. Kakateyeni mu vipangi na lyova nakujaja ngeci mumanese kwovoka kweni,

¹³ omwo simbu yoshe Njambi alinakupanga muli yeni ngeci mukale na cizango, co ngeci mwase kwononoka vutumbe vwendi vavenya.

¹⁴ Lingeni vyuma vyoshe kujeneka kulinyenyeta nambe kulikanangana,

¹⁵ ngeci mupwe vaka-kujeneka mulonga na vaka-kujeneka kapayo ngwe muvanapande kupwa vana va Njambi, vaje valinakuyoya mu kaye ka kupenga-penga na akati ka vanu vaka-vuvi. Yeni munapande kutwa ceke akati kavo ngwe vingongonosi vitwa ceke mwilu,

¹⁶ omo muvambulwila lijwi lya mwonyo. Nga mulinga ngacije, njikakala na cuma cakulyalesela ali yeni a Litangwa lya Kilistu, omwo eci cikasholoka ngeci nzili yange yoshe na vipangi vyange kuvyaile mwangoco embwe.

¹⁷ Nambe nga vetila maninga ange ngwe mulambu wa a n̄ombelo ije yakukulaela kweni kuli Njambi, njivwaelela nakujolela amo neni voshe.

¹⁸ Mu ngila eyi vene, neni lalo munapande kuvwaelela na kujolela amo nange.

Timateo na Epafolonditu

¹⁹ Nga cinapu cizango ca Mwene, njili na cinyangavili cakutuma Timateo vwasi kuli yeni, ngeci akunjitakamese na vin̄anda vyakutunda kuli yeni.

²⁰ Kunjesi na munu wakulifwa nendi, uje ali na cizango ngwe cange, co uje ali na cishota-mbunge ali yeni.

²¹ Munu na munu alinakulimwena vyendi vavenya, kesi a vin̄anda vya Yesu Kilistu.

²² Oloni yeni vavenya mwazivuka vatijo Timateo nasholola vukaleo vwendi, ikeye napu ngwe mwana alinakupanga amo na ishe a muzimbu wauvwa.

²³ Ngecivene, njilinakuyongola kumutuma kuli yeni vwasi-vwasi, omwo njimona vati vyuma muvyendela kuno kuli yange.

²⁴ Co njakulaela kuli Mwene ngeci yange vavenya njikasa kwija kuli yeni ololo vene.

²⁵ Njayongola ngwange cinapande ngeci njitume ndolome yetu Epafolonditu, uje wapangele nakulwila ku mutambela wange, co napanga ngwe ngamba yeni mukunjikwasa.

²⁶ Ikeye ashaka manene kumimona yeni voshe, co ali na cishota-mbunge cakama manene omwo mwazivile ngeci ikeye wakele nakuvinja.

²⁷ Mwa vushunga vene wakele nakuvinja nakushaka kutsa vene. Oloni Njambi wamuzivilileko mema ku mbunge, kesi lika ikeye oloni nange lalo, nakunjitetela ku vusiwa vwakama manene.

²⁸ Njili na cishota-mbunge cakumutuma vwasi kuli yeni, ngeci mwakujolele lalo omo mwakumumona, co vusiwa vwange vukahwa.

²⁹ Ngecivene, mutambuleni nakujolela, ngwe muka-kukulaela muli Mwene. Shololeni kalemeso kuli voshe vanu va cifwa cangacije ngwe ikeye,

³⁰ omwo waanene mwonyo wendi, co washakele kutsa omwo a vipangi vya Kilistu, ngeci anjikwase kuli vije yeni kumwasele kunjana.