Filipu 1 - Livulu lya Shukulu Kalunga

¹ Mukanda wakutunda kuli yange Paulu na Timateo, vangamba va Yesu Kilistu. Kuli voshe vanu va Njambi mu Filipu vaje vali muli Kilistu Yesu, amo na vantwama va cikungulukilo na vakwasi.

² Njambi Tatetu na Mwene Yesu Kilistu vamyane kutetela na kwoloka.

Lilombelo lya Paulu

³ Njikakandelela kuli Njambi yange omwo ali yeni simbu yoshe njikamiyongola,

⁴ co simbu yoshe njikamilombelela yeni voshe, njikalombela nakujolela,

⁵ omwo a ngila ije munanjikwasa mu vipangi vya muzimbu wauvwa, tunde a litangwa lyakulivanga nakweta ku lelo.

⁶ Ngecivene, njazivuka ngwange Njambi, uje washangumukile cipangi eci cacivwa muli yeni, akatwalao noo nacimanesa a Litangwa lya Yesu Kilistu.

⁷ Simbu yoshe yeni kumwatundile mu mbunge yange! Ngecivene, cinapu cacivwa kuli yange kukala na mbunge yangacije ali yeni voshe. Omwo yeni voshe mu vaka-kupanga amo nange mu vipangi vyananjana Njambi, nambe ololo omo njili mu kamenga nambe lalo omo njapwile wakupatuka mukwamena muzimbu wauvwa nakuukolesa mbe.

⁸ Omwo Njambi napu mukaleo wange nazivuka ngwendi njendeka vushunga omo njendeka ngwange vizango vyange vyakulova ali yeni vilinakutunda ku mbunge ya Yesu Kilistu ikeye vavenya.

⁹ Njilombela ngwange cizemo ceni citwaleo mukukola manene, amo na mana a vushunga amo nakwangula kwa vushunga,

¹⁰ ngeci mwase kwangula vyavivwa. Asinoni mukapwe vaka-kupatuka ku mazilo oshe nakujeneka mulonga Litangwa lya Kilistu.

¹¹ Kuyoya kweni kupwe kwakushula na vushunga vwavuvwa vyuma vije Yesu Kilistu lika asa kusholola, ku vumpau nakushangazala kwa Njambi.

Kuyoya kwange kwapwa Kilistu

¹² Njishaka muzivuke, vakwetu, ngwange vyuma evi vinalingiwa kuli yange vinakwasa kutwala muzimbu wauvwa kulutwe.

¹³ A cuma eci, vaka-kunyunga lipela voshe na voshe veka lalo kuno vazivuka ngwavo yange njili mu kamenga omwo njapwa nji ngamba ya Kilistu.

¹⁴ Co kukala kwange mu kamenga cinakwasa manene vaka-kukulaela kukulaela manene muli Mwene, ngeci vapwe vaka-kusimpa simbu yoshe mukwambulula lijwi kujeneka lyova.

¹⁵ Mwa vushunga vene kuli vamo vambulula Kilistu omwo vali na lifuwa na vimata, oloni veka vambulula na cizango cacivwa.

¹⁶ Ava vamucivali vacilinga omwo cizemo, omwo vanazivuka ngwavo Njambi nanjana vipangi vyakwamena muzimbu wauvwa.

¹⁷ Ava vakulivanga kuvasa kwambulula Kilistu mwa vushunga, oloni cakutunda kuli munzinzime wa kulyalesa, valinakuyongola ngeci vawezeleleko manene ku tuyando twange omo njili mu kamenga.

¹⁸ Kukwesi mulonga! Njilinakujolela a vyuma evi, nameme ngoco Kilistu valinakumwambulula mweka na mweka, nambe na cizango cacivi nambe na cizango cacivwa. Co njilinakutwalao kujolela,

¹⁹ omwo njinazivuka ngwange a malombelo eni naakukwasa kuje kutunda ku Munzinzime wa Yesu Kilistu vakanjipatula.

²⁰ Cizango cange cakama na cinyangavili cange ngeci kunjikajuka mu vipangi vyange, oloni ku visimbu vyoshe, vunene vene a simbu ino, njikashula nakusimpa kwoshe, ngeci muvutunu vwange vwoshe njikane kasingimiko kuli Kilistu, nambe njitsa nambe njiyoya.

²¹ Omwo mwonyo unapu vikajo? Kuli yange unapu Kilistu! Ngecivene, kutsa cikapwa nganyo kuli yange.

²² Oloni nga mukuyoya njasa kuwezelelako ku vipangi vyavivwa, co kunjasa kuzivuka cuma muka njinapande kwangula.

²³ Vananjikokela mu mitambela yoshe eyi ivali. Njishaka manene kuseza mwonyo ou njikakale amo na Kilistu, eci cikeco cinahyana manene,

²⁴ oloni cakama manene omo yeni, nga kunjaciyoya tai.

²⁵ Njazivuka mwamuvwa cuma eci, ngecivene, njazivuka ngwange njikakala neni. Njikakala amolika neni voshe, mukuwezelelako akuya kweni kulutwe namukujolela mukukulaela,

²⁶ ngeci omo njili neni lalo, mukakala naa mukasa kulyaleselao ali yange mu mwonyo weni muli Kilistu Yesu.

²⁷ Ngecivene, cuma cakama manene eci, myonyo yeni iyoye ngwe muushaka muzimbu wauvwa wa Kilistu, ngeci nambe njasa kwija nakumimona nambe embwe, njakuziva ngeci munemana mbe a vutumbe vuno, co na cizango cimolika mulinakulwa amolika akukulaela a muzimbu wauvwa.

²⁸ Kesi mukale na lyova lya vitozi veni, oloni simpeni simbu yoshe, eci cikavasholwela vukaleo ngeci vakevo kuvakahyana oloni yeni mukahyana, omwo Njambi ikeye akamihyanesa.

²⁹ Omwo vanamyana vwana vwakupangela Kilistu, kesi lika akumukulaela, oloni nakumuyandela lalo.

³⁰ Ololo mwasa kuwana mutambela wakulwa amo nange. Inapu nzita imolika ngeci ije mwamwene njilinakulwa ku simbu ya kunima, co ngwe mumwazivi, anga vene njilinakulwa ololo.