Filimoni 1 - Livulu lya Shukulu Kalunga

¹ Mukanda wakutunda kuli yange Paulu, cinzinda ca Kilistu Yesu, unatundu lalo kuli ndolome yetu Timateo. Kuli Filimoni musamba wetu na mukwetu mu vipangi,

² na ku cikungulukilo cije cikakungulukila mu njuvo yove, na kuli ndokazi yetu Afiya, na kuli mukwetu lishwalale Alikipase.

³ Njambi Tatetu na Mwene Yesu Kilistu vakwane kutetela na kwoloka.

Cizemo ca Filimoni nakukulaela kwendi

⁴ Ndolome yange Filimoni, simbu yoshe omo njikalombela, njikakutumbula nakukandelela kuli Njambi yange.

⁵ Omwo njilinakuziva cizemo cove kuli vanu va Njambi voshe nakukulaela kwove ulinakwo muli Mwene Yesu,

⁶ co njilombela ngwange kulitombola kwetu amo neni akupwa vaka-kukulaela kukanena kuzivisisa kwa vivezikiso vyoshe vije tulinavyo mu mwonyo wetu muli Kilistu.

⁷ Cizemo cove, ndolome yange, cinanjinenela kuvwaelela kwakama nakunjitakamesa manene! Omwo yove unavwaelelesa vimbunge vya vanu va Njambi voshe.

Cihula ali Onesimasi

⁸ Omwo cuma eci, njinasimpi manene ngwe ndolome yove muli Kilistu, co njikushika yove ngeci ulinge vije vishakiwa.

⁹ Oloni omwo cizemo cange kuli yove, njilinakukulambelela. Njilinakulinga evi nambe yange Paulu vene, katumwa wa Kilistu Yesu na simbu ino vene njinapu cinzinda cendi omwo lizina lyendi.

¹⁰ Ngecivene, njikulambelela ali Onesimasi, uje napu munange muli Kilistu, omo njakele mu kamenga njapwile nji ishe mu munzinzime.

¹¹ A simbu ya kunima kakele na seo kuli yove, oloni ololo ali na seo kuli yove na kuli yange.

¹² Njilinakumwilwisa kuli yove ololo, co alinakwija amo na mbunge yange.

¹³ Njashakele ngwange akale nange kuno a simbu ino njili mu kamenga omwo a muzimbu, ngeci anjikwase ainge mu mwela wove.

¹⁴ Oloni kunjishaka kulinga cuma cakujeneka yove kuzivuka, njishaka yove ucilinge na cizango ca mbunge yove. Ngecivene, kunjasa kulinga cuma cimo kuvanga yove unatava.

¹⁵ Amo Onesimasi walyangunukile nove kasimbu ngeci eluke nendi simbu yoshe.

¹⁶ Co ololo ikeye kesi ndungo lalo, oloni ololo natuvakana ndungo, ikeye napu musamba wa cizemo na ndolome muli Kilistu. Oloni ololo ali na mbwase kuli yange! Co akakala na mbwase yakama lalo kuli yove, vyoshe vivali, ndungo na ndolome muli Mwene!

¹⁷ Ngecivene, nga ulinakunjiyongola ngwe njapwa nji mukweni mu vipangi, unapande kumutambula ngwe utambula yange vene.

¹⁸ Nga wakulingile mwamuvi, nambe kukumuna cuma cimo kuli yove, co cilavele ku likongo lyange.

¹⁹ Yange Paulu, njilinakusoneka evi na livoko lyange ngwange, yange Paulu, njikakwilwisilavyo. (Kunjapandele kukwanukisa lalo, mwa vushunga vene yove vene akuyoya kwove uli na likongo kuli yange.)

²⁰ Ngecivene, ndolome yange, njivwaelelese na kalemeso omwo lizina lya Mwene, kolesa mbunge yange, akupwako u ndolome muli Kilistu!

²¹ Njinakulaela, omo njilinakusoneka evi, ngwange ukalinga vyavingi kutuvakana evi njinakulombo.

²² A simbu eyi vene, njivwaesele mulili wakutulila, omwo njilinakuyongola ngwange Njambi akakumbulula malombelo eni voshe, co njikeluka lalo kuli yeni.

Viindu vyakumanesela

²³ Epafalase, uje ali nange mu kamenga omwo a lizina lya Kilistu Yesu, natumu viindu kuli yeni,

²⁴ co lalo na Mako na Alisitakase na Ndemase na Luka vakwetu mu vipangi vanatumu viindu vyavo kuli yeni.

²⁵ Kutetela kwa Mwene Yesu Kilistu kukale neni voshe.