Ezela 8 - Livulu lya Shukulu Kalunga

Vanu vaje velukile kutunda ku vunzinda

¹ Ou ukewo mukana wa vikota vya vakulunu vaje vakele mu vunzinda mu Mbambilone, vaje velukile amolika na Ezela ku Yelusalema omo Aletasheleshe wapwile mwene.

² Ngeleshome, wa ku cikota ca Finehase, Ndanyele, wa ku cikota ca Itamale, Hatushe muna Shekaniya, wa ku cikota ca Ndaviti,

³ Zekaliya, wa ku cikota ca paloshe, wakele na vanalume 150 va ku cikota cendi, (vakele na vukaleo vwa vakukulwila vavo.)

⁴ Elyehoenai muna Zelahiya, wa ku cikota ca Pahate Mowavi wakele na vanalume 200,

⁵ Shekaniya muna Njaele, wa ku cikota ca Zatu wakele na vanalume 300,

⁶ Evende muna Yonatana, wa ku cikota ca Andine, wakele na vanalume makumi atanu,

⁷ Njeshaya muna Ataliya, wa ku cikota ca Elame, wakele na vanalume makumi atanu na avali,

⁸ Zevandiya muna Mikaele, wa ku cikota ca Shefatiya, wakele na vanalume makumi atanu na atatu,

⁹ Ovandiya muna Njehiyele, wa ku cikota ca Yowave, wakele na vanalume 218,

¹⁰ Shelomiti muna Njosifiya, wa ku cikota ca Mbani, wakele na vanalume 160,

¹¹ Zekaliya muna Mbevai, wa ku cikota ca Mbevai, wakele na vanalume makumi avali na vatanu na vatatu,

¹² Yohanane muna Hakatane, wa ku cikota ca Azengande, wakele na vanalume 110,

¹³ Elifelete, na Njewele, na Shemaya, va ku cikota ca Andonikame, vakele na vanalume makumi atanu na limo, (vakevo vakotokelele kwiluka.)

¹⁴ Utai na Zakule, va ku cikota ca Mbingevai, vakele na vanalume makumi atanu na avali.

Ezela emika vaLevi vapange mu Njuvo ya Shukulu Kalunga

¹⁵ Njakungulwile mbunga ku ndonga yakuya ku nganda ya Ahava, twavandamene kuje matangwa atatu. Co omo njakengezekele-kengezekele mu mbunga, njawanenemo lika vaka-kukombelela, oloni vaLevi vai.

¹⁶ Co njatumine vantwama vatanu na vawana mazina avo, Elyazale, na Alyele, na Shemaya, na Elenatane, na Njalive, na Elenatane, na Natane, na Zekaliya, na Meshulame, na valongisi vavali, Njoalive na Elenatane.

¹⁷ Njavatumine kuli Indo, mukulunu uje wakele ku Kasifiya, kwihula ikeye na vavushoko vwendi, ngeci vatutumine vanu vakupanga mu Njuvo ya Shukulu Kalunga Njambi yetu.

¹⁸ A ngozi ya Njambi, vatutuminine Sheleviya, munalume wakunyanyama, kaLevi wa ku cikota ca Maheli, amo na vana vendi na vandolome vendi voshe vapwile likumi na vatanu na vatatu.

¹⁹ Co lalo vatutuminine Hashaviya na Njeshaya va ku cikota ca Melali, amo na vavushoko vwavo makumi avali.

²⁰ Kwakele vaka-vipangi vakupanga mu Njuvo ya Shukulu Kalunga vakupwa 220 vakukulwila vavo vaje vemikile Mwene Ndaviti na vamyata vendi kukwasa vaLevi. Co voshe vavasonekele mazina.

Ezela atwamenena vanu kulikela kulya nakulombela

²¹ Co kuje vene ku ndonga ya Ahava njaanene mashiko kuli yetu voshe, akulikela kulya na kulikeesa ku mesho a Njambi yetu, nakumulomba ngeci atutwamenene ku vungenzi vwetu nakutunyunga yetu, na vana vetu, na vufuko vwetu vwoshe.

²² Njakele na shwamwa yakulomba kuli mwene mbunga ya mashwalale ngeci vatunyunge ku vitozi mu vungenzi vwetu, omwo njamulekele ngwange Njambi yetu avezikisa munu woshe uje amukulaela, oloni akaluvala nakuhisa munu woshe uje amukengesa nima.

²³ Ngecivene, twalikelele kulya, twalombelele kuli Njambi ngeci atunyunge, co ikeye wakumbulwile malombelo etu.

Vwana vwa ku Njuvo ya Shukulu Kalunga

²⁴ Ku vakulunu va vaka-kukombelela, njaangwileko Sheleviya, na Hashaviya, na vakwavo likumi.

²⁵ Asinoni njapeselesele siliva, na ngolinde, na vivala vije vyatwanene mwene, na vaka-kumunangula, na vamyata, na vanu va Isalele ngeci vavipangese mu Njuvo ya Shukulu Kalunga, co njavyanene kuli vaka-kukombelela.

²⁶ Evi vikevyo vinjavanene. Siliva matani akupwa 22. Vivala 100 vya siliva vulemu vwavyo makilo 70. Ngolinde vulemu vwayo makilo 3,400.

²⁷ Malonga a ngolinde makumi avali, vulemu vwao makilo 8.4. Malonga amavwa avali a vunengu, seo yao ngwe malonga a ngolinde.

²⁸ Co njendekele kuli vakevo ngwange, “Yeni munapu vakujela ku mesho a Shukulu Kalunga, Njambi ya vakukulwila veni, ngecivene, siliva yoshe na vivala vya ngolinde vinapu vyakujela, vije vivaanene kupwa vin̄ombelo vya cizango.

²⁹ Vinyungeni mwamuvwa noo muketa ku Njuvo ya Shukulu Kalunga mu Yelusalema. Co kuje ku Yelusalema mu mulili wa vaka-kukombelela, vipeseleseni, co vyaneni kuli vakulunu va vaka-kukombelela, na vakulunu va vaLevi, na kuli vantwama va vanu va Isalele.”

³⁰ Ngecivene, vaka-kukombelela na vaLevi vakele na moko yakunyunga siliva, na ngolinde, na vivala, co vavitwalele ku Njuvo ya Shukulu Kalunga mu Yelusalema.

Kwiluka ku Yelusalema

³¹ Twatundile ku Ndonga ya Ahava ku litangwa lyamulikumi na avali ku ngonde yakulivanga akuya ku Yelusalema. Njambi yetu wakele amo netu, co watunyungile ku vitozi na kuli vaka-kutuvandamena mu ngila omo twakele nakwenda.

³² Omo twetele mu Yelusalema, twahwimine matangwa atatu.

³³ Asinoni a litangwa lyamuciwana twaile ku Njuvo ya Shukulu Kalunga, twapeselesele siliva, na ngolinde, na vivala, co twavyanene kuli Melemote muka-kukombelela, muna Uliya. Ikeye wakele amo na Elyazale muna Finehase na vaLevi vavali, mazina avo, Yozavande muna Njeshuwa, na Noandiya muna Mbinui.

³⁴ Vyuma vyoshe vavilavele nakuvipeselesa, co vavisonekele simbu ije vene.

³⁵ Vanu voshe vaje velukile kutunda ku vunzinda vakombelelele vin̄ombelo vyavo vya kwenyeka kuli Njambi ya Isalele. Co vakombelelele vingombe va nkomba likumi na vavali ali Isalele yoshe, na majamba a vimanga makumi atanu na awana na atanu na limo, na vana va vimanga makumi atanu na avali na vatanu na vavali, co lalo vakombelelele vimembe likumi na vavali mukulijelesa ku vuvi. Vimuna voshe ava vavenyekele kupwa n̄ombelo ya kwenyeka kuli Shukulu Kalunga.

³⁶ Co lalo vetesele mukanda wa mashiko uje wavanene mwene, kuli vanguvulu na vantwama va mu lifuti lya mu Kangombe ka Yambi ka Yufuleti, co vakevo vakwasele vanu na Njuvo ya Shukulu Kalunga.