Ezela 7 - Livulu lya Shukulu Kalunga

Ezela na vakwavo vaija ku Yelusalema kutunda ku Mbambilone

¹ Munima yevi, omo Aletasheleshe wapwile mwene wa Pelesha, kwakele munalume umo lizina lyendi Ezela. Ikeye wazivukile vakukulwila vendi va kunima kweta kuli Alone Muka-kukombelela Wakama, vakevo ava, Ezela wapwile muna Selaya, Selaya wapwile muna Azaliya, Azaliya wapwile muna Hilikiya,

² Hilikiya wapwile muna Shalume, Shalume wapwile muna Zandoke, Zandoke wapwile muna Ahituve,

³ Ahituve wapwile muna Amaliya, Amaliya wapwile muna Azaliya, Azaliya wapwile muna Melayote,

⁴ Melayote wapwile muna Zelahiya, Zelahiya wapwile muna Uzi, Uzi wapwile muna Mbuki,

⁵ Mbuki wapwile muna Avishwa, Avishwa wapwile muna Finehase, Finehase wapwile muna Elyazale, Elyazale wapwile muna Alone Muka-kukombelela Wakama.

⁶ Ezela watundile ku Mbambilone. Ikeye wapwile muka-kusoneka uje wazivukile mwamuvwa Lishiko lya Mosesa, lije lyamwanene Shukulu Kalunga, Njambi ya Isalele. Omwo Ezela wakele na vivezikiso vya kuli Shukulu Kalunga Njambi yendi, co mwene wamwanene vyuma vyoshe vije vyalombele.

⁷ Mu mwaka wamucitanu na ivali wakushwana kwa Aletasheleshe, Ezela watundile ku Mbambilone kuya ku Yelusalema amo na mbunga ya vaIsalele, na vaka-kukombelela, na vaLevi, na vaka-kwimba mu Njuvo ya Shukulu Kalunga, na vaka-kunyunga ku Njuvo ya Shukulu Kalunga, na vaka-vipangi.

⁸ Vatundile ku Mbambilone a litangwa lyakulivanga ku ngonde.

⁹ Omwo kukwasa kwa Njambi, vetele ku Yelusalema a litangwa lyakulivanga lya ngonde yamucitanu.

¹⁰ Ezela waakele mbunge yendi mukulilongesa Mashiko a Shukulu Kalunga, nakuwalinga, nakulongesa vizilika na vilongesa vya Shukulu Kalunga kuli vanu vaIsalele.

Mwene Aletasheleshe aana Ezela mukanda

¹¹ Evi vikevyo vin̄anda vyakele mu mukanda uje waanene Mwene Aletasheleshe kuli Ezela, muka-kukombelela na muka-kusoneka, uje wakele manene na mana akusoneka majwi a Mashiko a Shukulu Kalunga na vizilika vyendi vije vyaanene kuli vaIsalele.

¹² “Yange Mwene Aletasheleshe njilinakusoneka mukanda ou kuli Ezela muka-kukombelela na muka-kulilongesa Mashiko a Njambi wa Mwilu.

¹³ “Yange njinashiki ngeci mu vumwene vwange vwoshe, vanu va Isalele voshe, na vaka-kukombelela, na vaLevi vaje vali na cizango cakuya amo nove ku Yelusalema vanapande kuya.

¹⁴ Yange mwene, amolika na vamyata va mu munga yange vatanu na vavali, tukutuma ku Yelusalema na ku Yunda, ngeci ukehwisise muvali nakwononokela livulu lya Mashiko a Njambi yeni, eli lili mu mavoko ove.

¹⁵ Unapande kwambata ngolinde na siliva vije yange mwene na vamyata va munga yange tunalambula na cizango ca vimbunge vyetu kuli Njambi ya Isalele, uje Njuvo yendi yakala mu Yelusalema.

¹⁶ Co lalo unapande kwambata siliva na ngolinde yoshe ije imunalambula mu lifuti lya Mbambilone na milambu ije ivakana vanu va Isalele na vaka-kukombelela vavo ku Njuvo ya Shukulu Kalunga Njambi yavo mu Yelusalema.

¹⁷ “Ngecivene, munapande kupangesa mwamuvwa vimbongo evi, co landa vingombe va nkomba, na majamba a vimanga, na vana va vimanga, na vimbuto, na vinyu nakuvikombelela a mutula wa mu Njuvo ya Shukulu Kalunga mu Yelusalema.

¹⁸ Mukapangesa siliva na ngolinde vije vikasalao mwoshe mumuyongwela yove na vavushoko vwove, ngwe ku cizango ca Njambi yeni.

¹⁹ Mukaana kuli Njambi vivala vyoshe vije vivanakwana vyakupangesa mu Njuvo ya Shukulu Kalunga mu Yelusalema.

²⁰ Co vyoshe vyeka vije vishakiwa mu Njuvo ya Shukulu Kalunga, munapande kuvitundisa mu mbango ya vumwene.

²¹ “Yange Mwene Aletasheleshe, njinashiki vamyata voshe vaka-kunyunga mbango ya vumwene mu lifuti lya mu Kangombe ka Yambi ka Yufuleti kwana vwasi Ezela, muka-kukombelela na muka-kulilongesa Mashiko a Njambi wa Mwilu, vyuma vyoshe vije vyamilomba,

²² makilo a siliva akupwa 3,400, na makilo a tiliku akupwa 10,000, na malita a vinyu akupwa 2,000, na malita a mazi a olive akupwa 2,000, na mwongwa waungi.

²³ Munapande kwana mwamuvwa vyuma vyoshe vije vyashaka Njambi wa Mwilu ku Njuvo yendi, kutewa vukalu vwendi vukaija ali yange nambe ali vaje vakashwana kulutwe lwange.

²⁴ Co lalo tunamileke ngeci, kesi mukatambule lisimu nambe mulambu kuli vaka-kukombelela, na vaLevi, na kuli vaka-kwimba, na kuli vaka-kunyunga ku Njuvo ya Shukulu Kalunga, na kuli vaka-kupanga, nambe ku munu woshe-iwoshe uje nakundama ku Njuvo ya Shukulu Kalunga eyi.

²⁵ “Yove Ezela, ngwe ku mana anakwana Njambi yove, unapande kwangula vaka-kwendesa vipangi na maako ngeci vasompe vin̄anda vya vanu voshe vaje vali mu lifuti lya mu Kangombe ka Yambi ka Yufuleti vaje vazivuka Mashiko a Njambi yove. Co lalo na vaje kuvaazivuka unapande kuvalongesawo.

²⁶ Nga munu umo kakononoka Mashiko a Njambi yove, nambe mashiko a mwene, vanapande kumuhisa vwasi, nambe kumutsiya, nambe kumusheka mu lifuti, nambe kumunyeka vufuko vwendi, nambe kumwaka mu kamenga.”

Ezela ashangazala Njambi

²⁷ Ezela wendekele ngwendi, “Vamushangazale Shukulu Kalunga, Njambi ya vakukulwila vetu! Ikeye nalingisa mwene kukala na cizango cangacije, ngeci avwaese Njuvo ya Shukulu Kalunga eyi ili mu Yelusalema.

²⁸ Omwo mema ku mbunge a Njambi njinawana ngozi ku mesho a mwene, na kuli vamyata vendi, na kuli vantwama vendi voshe va nzili, Shukulu Kalunga Njambi yange nanjisimpisa, co njinasa kusindiya vakulunu vavangi va vikota vya Isalele kwiluka amo nange ku Yelusalema.”