Ezela 6 - Livulu lya Shukulu Kalunga

Mashiko a Mwene Siluse vaawana lalo

¹ Ngecivene, Mwene Ndalyuse washikile ngeci vashakezeke mu mavulu a vumwene aje avatulikile mu Mbambilone.

² Oloni livulu muvasonekele mashiko valiwanene mu nganda ya Ekevatana mu lifuti lya Mendiya mukemwo muvawanene livulu lyakuzenga, mu livulu lije vasonekelemo ngwavo,

³ “Mu mwaka wakulivanga wa kushwana kwendi, mwene Siluse washikile ngeci Njuvo ya Shukulu Kalunga mu Yelusalema vaitungulule kupwa mwela kuje vakakombelela nakwenyekela vin̄ombelo. Co Njuvo ya Shukulu Kalunga ikapwe mamita makumi avali na atanu na avali mu vulaja vwa akamwa, na mamita makumi avali na atanu na avali mu vwihi.

⁴ Vivumbe vakavitunge mu mikana itatu ya mamanya akama a mukana umo wa viti vyaviha. Co vimbongo vya fweto vikatunde mu cikasa ca vumwene.

⁵ Co lalo vivala vya ngolinde na siliva vije vyanenele Mwene Nevukaneza ku Mbambilone kuvitundisa mu Njuvo ya Shukulu Kalunga mu Yelusalema vakaviilwise mu mwela wavyo mu Njuvo ya Shukulu Kalunga mu Yelusalema.”

Mwene Ndalyuse ashika ngeci vipangi viye kulutwe

⁶ Asinoni Mwene Ndalyuse wakumbulwile ngwendi, “Kuli nguvulu Tatenai wa mu Kangombe ka Yambi ka Yufuleti, na Shetale Mbozenai, na vakweni vamyata va mu Kangombe ka Yambi ka Yufuleti. “Tundeniko oko ku Njuvo ya Shukulu Kalunga,

⁷ eceleni vapange vipangi vyoyo Njuvo ya Shukulu Kalunga. Eceleni nguvulu wa mu Yunda na vantwama va vaYunda vatungulule Njuvo ya Shukulu Kalunga Njambi muje vene mu mwela wayo muyakele laja.

⁸ Co njishika lishiko mumukakwasela vakulunu va vaYunda akutungulula oyo Njuvo ya Shukulu Kalunga. Vimbongo vyoshe vyakuyitungulwisa vakavyane kuli ovo vanu vwasi-vwasi kesi mwishwale, vimbongo ovyo vitunde mu mbango ya vumwene, vikevyo vimbongo vya lisimu vyakutunda musambwa ya mu Kangombe ka Yambi ka Yufuleti.

⁹ Co a litangwa na litangwa, kesi mwonwe, mukaana kuli vaka-kukombelela va mu Yelusalema vyuma vyoshe vivashaka vivakamileka ngeci mwaane, vana va vingombe va nkomba, na vimanga, nambe vana va vimanga vakwenyeka kupwa n̄ombelo kuli Njambi wa Mwilu, nambe tiliku, nambe mwongwa, nambe vinyu, nambe mazi a olive.

¹⁰ Evi vinapande kulingiwa ngeci vakombelele vin̄ombelo vije vyatambula Njambi wa Mwilu nakulomba vivezikiso vyendi viije ali yange na ali vana vange va vanalume.

¹¹ Co lalo njinashiki ngeci woshe avyana lishiko eli, vashomone mukambo ku njuvo yendi, co vakamujundule nakumushukika. Ngeci njuvo yendi ipwe mutumbo wa lishito-shito.

¹² Co Njambi uje waangwile Yelusalema kupwa mwela kuje kuvakamulemesela, ombile kuti mwene woshe-iwoshe, nambe muyati woshe-iwoshe uje ukaviisa lishiko eli nakunyongesa Njuvo ya Shukulu Kalunga kuje. Yange Ndalyuse, njinashiki lishiko eli. Co lishiko eli munapande kulyononoka.”

Kukundika Njuvo ya Shukulu Kalunga

¹³ Asinoni Nguvulu Tatenai, na Shetale Mbozenai, na vamyata vakwavo valingile vene ngwe muje mwashikile mwene.

¹⁴ Co vantwama va vaYunda valingile mwamuvwa akutunga Njuvo ya Shukulu Kalunga, co Hangai na Zekaliya vaka-kwimanena vavatakamesele. Co vamanesele Njuvo ya Shukulu Kalunga ngwe mwavashikile Njambi ya Isalele, na Siluse, na Ndalyuse, na Aletasheleshe, vimyene va Pelesha.

¹⁵ Vamanesele Njuvo ya Shukulu Kalunga a litangwa lyamucitatu ku ngonde ya Andale mu mwaka wamucitanu na umo wakushwana kwa mwene Ndalyuse.

¹⁶ Asinoni vanu va Isalele, na vaka-kukombelela, na vaLevi, na vanu voshe veka vaje velukile kutunda ku vunzinda, vajolelele akukundika Njuvo ya Shukulu Kalunga.

¹⁷ Akukundika Njuvo ya Shukulu Kalunga vakombelelele vingombe vakupwa 100, na vimanga vakupwa 200, na vana va vimanga vakupwa 400, na vimembe likumi na vavali kupwa vin̄ombelo vya a vuvi, membe umo na umo kwimanena muyati umo na umo wa Isalele.

¹⁸ Co lalo vaakele vaka-kukombelela na vaLevi ku vipangi vya Njuvo ya Shukulu Kalunga mu Yelusalema, ngwe ku vilongesa vije vasoneka mu livulu lya Mosesa.

Ciwano ca Pasovala

¹⁹ Vanu vaje velukile kutunda ku vunzinda valisambele Ciwano ca Pasovala ku litangwa lyamulikumi na awana ku ngonde yakulivanga ya mwaka wakwatako.

²⁰ Vaka-kukombelela voshe na vaLevi valijelesele, co voshe vajelele. VaLevi vatsiile vimanga ngeci vanu voshe vaje velukile kutunda ku vunzinda, na vaka-kukombelela, na vaLevi vakevo vavenya vakombelelele a Ciwano ca Pasovala.

²¹ Co vin̄ombelo vyoshe vavilile kuli vaIsalele voshe vaje velukile kutunda ku vunzinda, na vaje voshe vombilile vingila vya vaje vaka-kujeneka kukulaela, vaje vakele mu lifuti, oloni vezile nakulemesa Shukulu Kalunga Njambi ya Isalele.

²² A matangwa atanu na avali vajolelele nakulisamba a Ciwano ca Makende Akujeneka Musima. Vajolelele manene omwo Shukulu Kalunga walingisile mwene wa Asilya kukala na mema ku mbunge ali vakevo, ngeci wavakwasele ku vipangi vyavo vyakutungulula Njuvo ya Shukulu Kalunga Njambi ya Isalele.