Ezela 5 - Livulu lya Shukulu Kalunga

¹ A simbu ije Hangai na Zekaliya muna Indo vaka-kwimanena vavali, vambulwile vuka-kwimanena mu lizina lya Njambi ya Isalele kuli vaYunda vaje vakele mu Yunda na mu Yelusalema.

² Omo Zelumbambele muna Sheyaletiyele, na Yoshwa muna Yehozandake vazivile majwi avo, co vashangumukile kutungulula Njuvo ya Shukulu Kalunga mu Yelusalema, co vaje vaka-kwimanena vavali vavakwasele.

³ A simbu ije vene Nguvulu Tatenai wa mu Kangombe ka Yambi ka Yufuleti, na Shetale Mbozenai, na vamyata vakwavo vezile ku Yelusalema, vehwile ngwavo, “Iyajo namitavesa kutungulula Njuvo ya Shukulu Kalunga nakumanesa civumbe?”

⁴ Co lalo vehwile mazina a vanu voshe vaje vavakwasele kutunga Njuvo ya Shukulu Kalunga.

⁵ Oloni mesho a Njambi yavo akele ali vantwama va vaYunda, co vamyata va vaPelesha kuvavavindikile noo vasonekelele mukanda kuli Mwene Ndalyuse, co wavakumbulwile.

⁶ Ou ukewo mukanda uvasonekelele kuli Mwene Ndalyuse.

⁷ “Kuli Mwene Ndalyuse, shwana mu kwoloka ku myaka yoshe.

⁸ “Yove shukulu zivuka ngeci yetu twaile ku lifuti lya Yunda, co twawanene Njuvo ya Shukulu Kalunga, Njambi uje wakuhyana vanaitungulula na vimbazuvwila vya mamanya akama, co vanaaka laja mikambo mu vivumbe. Vipangi evi valinakuvipanga na vutongwe, co vilinakuya kulutwe mwamuvwa.

⁹ “Twehwile vantwama vavo ngeci vatuleke veyajo vanavaana moko yakutungulula Njuvo ya Shukulu Kalunga nakuyivwaesa mwamuvwa ngacije.

¹⁰ Co lalo twavehwile mazina avo ngeci tukuleke vantwama va vipangi evi.

¹¹ “Vakevo vatukumbulwile ngwavo, ‘Yetu tu vangamba va Njambi wa mwilu na asi, tulinakutungulula Njuvo ya Shukulu Kalunga ije ivatungile laja nakuyivwaesa kuli mwene wakama wa Isalele.

¹² Oloni omwo vakukulwila vetu valuvalesele Njambi wa mwilu, co ikeye wavanene mu mavoko a Mwene Nevukaneza wa Mbambilone, mwene wa vumwene vwa vaKalendeya. Ikeye wanyongesele Njuvo ya Shukulu Kalunga eyi, co vanu vavatwalele ku vunzinda ku Mbambilone.

¹³ Asinoni mu mwaka wakulivanga wakushwana kwa Mwene Siluse mwene wa Mbambilone, Siluse waanene mashiko akutungulula Njuvo ya Shukulu Kalunga.

¹⁴ Co welwisile vivala vya ngolinde na siliva vije vyambatele Nevukaneza mu Njuvo ya Shukulu Kalunga mu Yelusalema, nakukavyaka mu njuvo yendi yakulemesela mu Mbambilone. Mwene Siluse waanene vivala evi kuli munalume umo lizina lyendi Sheshevazale, uje yemikile kupwa nguvulu wa mu Yunda.

¹⁵ Co mwene wamulekele ngeci avyambate nakuviilwisa ku Njuvo ya Shukulu Kalunga ku Yelusalema, nakutungulula Njuvo ya Shukulu Kalunga ku mwela uje vene kuyakele laja.

¹⁶ Ngecivene, Sheshevazale wezile, wendile luvula lwa Njuvo ya Shukulu Kalunga, co kutunda aje vipangi vyaile kulutwe noo ku simbu ino, oloni Njuvo ya Shukulu Kalunga kanda ihwe.’

¹⁷ “Co ololo, shukulu, nga ushaka, unapande kushakezeka mu mavulu a vumwene aje ali mu Mbambilone ngeci uwane nga Siluse waanene mashiko a Njuvo ya Shukulu Kalunga ya mu Yelusalema ngeci vaitungulule, cooni utuleke cizango cove a vipangi evi.”