Ezela 4 - Livulu lya Shukulu Kalunga

Kupopolola vipangi vyakutungulula Njuvo ya Shukulu Kalunga

¹ Omo vitozi va vanu va Yunda na vanu va Mbenjemani vazivile ngeci vinzinda vaje vaneluka valinakutungulula Njuvo ya Shukulu Kalunga, Njambi ya Isalele,

² ngecivene, vaile kuli Zelumbambele na kuli vakulunu va vikota vendekele ngwavo, “Tutaveni tulipandakane neni kutunga Njuvo ya Shukulu Kalunga. Yetu tukalemesa Njambi wa cifwa cimo ngwe ou imukalemesa yeni, twakele nakukombelela vin̄ombelo kuli ikeye tunde aje Mwene Esalehandone wa Asilya watunenele kuno.”

³ Oloni Zelumbambele, na Yoshwa, na vakulunu va vikota vavalekele ngwavo, “Kutushaka ngeci mutukwase kutunga Njuvo ya Shukulu Kalunga, Njambi yetu. Tukaitunga yetu vavenya, ngwe mwatushikile Siluse mwene wa Pelesha.”

⁴ Co vanu vakele muje mu lifuti vajujwisile vaYunda nakuvazivisa lyova nakuvavindika kutunga Njuvo ya Shukulu Kalunga.

⁵ Co lalo vaanene lizika-kanwa kuli vamyata va vaka-kushwana va Pelesha ngeci vavavindike. Co vakele nakulinga ngacije a simbu yakushwana kwa Siluse na a simbu yakushwana kwa Ndalyuse.

Kupopolola vipangi vyakutungulula Yelusalema

⁶ Omo Mwene Sheleshe washangumukile kushwana, vitozi va vanu vaje vakele mu Yunda na mu Yelusalema vanenele mikanda yakuvalwisa.

⁷ Co lalo omo Mwene Aletasheleshe wa ku Pelesha washwanene, Mbeshelame, na Mitelendate, na Tambele, na vimbunga vyavo vasonekele mukanda kuli mwene. Co uje mukanda vausonekele mu ciAlamaike, vaunungulwile omo vaulavelele.

⁸ Co lalo nguvulu Lehume, na muka-kusoneka wa lifuti Shimeshai, vasonekele mukanda kuli mwene Aletasheleshe omwo Yelusalema ngwavo,

⁹ “Mukanda ou utunda kuli yange nguvulu Lehume, na kuli Shimeshai muka-kusoneka wa lifuti, amo na vimbunga vyavo, na maako, na vamyata voshe, vakevo vanalume vakutunda ku Eleki, na ku Mbambilone, na ku Susa mu lifuti lya Elame,

¹⁰ amo na vanu vakwavo vaje vakwatele Ashulembanipale munalume uje wapwile wakama wa nzili ikeye wavatundisile ku membo avo, co wavaakele mu nganda ya Samaliya na mu lifuti lya mu Kangombe ka Yambi ka Yufuleti.”

¹¹ Omu mukemwo muvasonekele uje mukanda ngwavo, “Kuli Mwene Aletasheleshe, mukanda ou utunda kuli vangamba vove, vanu va ku lifuti lya mu Kangombe ka Yambi ka Yufuleti.

¹² “Yetu tushaka yove shukulu uzivuke ngeci vaYunda vaje vezile kuno kutunda ku mitambela yove yeka, vanatungu mu Yelusalema, co valinakutungulula nganda yaivi, co yapwa yakutengulukila. Vanashangumuka kutungulula vivumbe, co ololo vamanesa.

¹³ Co yove shukulu, nga nganda eyi vaitungulula na vivumbe vyayo vavimanesa, ava vanu kuvakafwete lisimu, na milambu, na mwombo, co vimbongo vya vumwene vwove vikatepuluka.

¹⁴ Ngecivene, ololo, omo tuli mwisi yove shukulu, kutushaka kumona evi vilingiwe, mukemwo tunayongola

¹⁵ ngeci utave kukale kwilula mu mikanda ije ivatulikile vakukulwila vove. Nga ulingamo, co ukawana ngeci nganda eyi visimbu vyoshe yapwa yakutengulukila, co lalo tunde ku visimbu vyalaja ikanena vukalu kuli vimyene na kuli vaka-kushwana va mu mafuti. Vanu vamwo simbu yoshe vapwa vavakalu kuvashwana. Eci cikeco cuma civanyongeselele eyi nganda.

¹⁶ Ngecivene, tukuleka ngwetu nga nganda eyi vaitungulula na vivumbe vyayo vavimanesa, co yove shukulu kuukasa lalo kutwamenena lifuti lya mu Kangombe ka Yambi ka Yufuleti.”

¹⁷ Co mwene wavakumbulwile ngwendi, “Kuli nguvulu Lehume, na kuli Shimeshai muka-kusoneka wa lifuti, amo na vimbunga vyeni vaje vali mu Samaliya na mu lifuti lya mu Kangombe ka Yambi ka Yufuleti, ngwange ciindu ceni.

¹⁸ “Mukanda mwatumine vananjilavelawo nakuunungulula.

¹⁹ Njashikile ngeci valohwelele, mukemwo vanawana ngeci, tunde ku visimbu vyalaja nganda eyi ya Yelusalema yatengulukilile vimyene, co makuli na vungungu vyakele mu nganda eyi.

²⁰ Vimyene vaka-nzili vashwanene mu Yelusalema, na lifuti lyoshe lya mu Kangombe ka Yambi ka Yufuleti, co vakele nakuvalambwila milambu nakuvafweta lisimu.

²¹ Ngecivene, munapande kushika ngeci vanu ava valikele kutungulula eyi nganda noo njikavana lisesa.

²² Lingeni eci vwasi, ngeci kesi kukale vukalu a kakondweso kange.”

²³ Omo valavelele Lehume, na Shimeshai, na vimbunga vyavo mukanda uje watundile kuli mwene Aletasheleshe, co vanalume ava vaile vwasi ku Yelusalema, vasindiiye vaYunda ngeci valikele kutungulula nganda.

Kushangumuka lalo vipangi vya Njuvo ya Shukulu Kalunga

²⁴ Co vipangi vya Njuvo ya Shukulu Kalunga vyemanene noo mu mwaka wamucivali wakushwana kwa Ndalyuse mwene wa Pelesha.