Ezela 3 - Livulu lya Shukulu Kalunga

Kushangumuka lalo kulemesa

¹ Ku ngonde yamucitanu na vivali vanu va Isalele voshe vatungile mu vinganda vyavo. Asinoni voshe vakungulukilile mu Yelusalema,

² co Yoshwa muna Yehozandake, na nakwavo vaka-kukombelela, na Zelumbambele muna Sheyaletiyele, amo na vavushoko vwendi, vatungulwile mutula wa Njambi ya Isalele, ngeci venyekeleo vin̄ombelo ngwe ku vilongesa vije vivasoneka mu Lishiko lya Mosesa, munu wa Njambi.

³ Nameme ngoco vinzinda vaje velukile ku Yelusalema vakele na lyova lya vanu vaje vakele muje mu lifuti, oloni vatungulwile mutula aje vene awemanene akulivanga. Asinoni vashangumukile lalo kwenyekelao vin̄ombelo vya a litangwa na litangwa mutondo na cingwezi.

⁴ Co valisambele Ciwano ca Mapapela ngwe ku mashiko, co a litangwa na litangwa vakombelelele vin̄ombelo vije vyashakiwile a litangwa lije,

⁵ co lalo vakombelelele vin̄ombelo vya kwenyeka vyamutunu a litangwa na litangwa, na vije vyakukombelela a Ciwano Cakutenema kwa Ngonde, na ku vikungulukilo vyeka lalo vije vyakulemesa Shukulu Kalunga, na vin̄ombelo vya cizango vyakwana kuli Shukulu Kalunga.

⁶ Nameme vanu te kanda vacishangumuke kutungulula Njuvo ya Shukulu Kalunga, oloni a litangwa lyakulivanga ku ngonde yamucitanu na vivali vashangumukile kukombelela vin̄ombelo vya kwenyeka kuli Shukulu Kalunga.

Kushangumuka kutungulula Njuvo ya Shukulu Kalunga

⁷ Vanu vecele vimbongo vyakufweta vaka-kushonga mamanya, na vaka-kushonga, co vaanene vyakulya, na vyakunwa, na mazi a olive kuli vanu va ku Tile, na Sindone, nakulandakana na miti ya kendale ya ku Lembanone, ngeci vavinene na mema a kalunga ku Yopa. Vyoshe evi vavilingile na lisesa lya kuli mwene Siluse wa Pelesha.

⁸ Ngecivene, ku ngonde yamucivali ya mwaka uje vene omo vaneluka ku mutambela wa Njuvo ya Shukulu Kalunga mu Yelusalema, vashangumukile vipangi. Zelumbambele, na Yoshwa, na vavushoko vwavo voshe, na vaka-kukombelela, na vaLevi, na vinzinda voshe vaje velukile ku Yelusalema, valikumbasanene kupanga vipangi. VaLevi voshe vaje vakele na myaka makumi avali nambe kutuvakana vavapwisile vantwama ku vipangi vyakutungulula Njuvo ya Shukulu Kalunga.

⁹ Co kaLevi umo lizina lyendi Njeshuwa na vana vendi na vavushoko vwendi, na Kandimyele na vana vendi va ku cikota ca Hondaviya ikeye Yunda valipandakanene amo mukwendesa vipangi vyakutungulula Njuvo ya Shukulu Kalunga. Vavakwasele kuli vaLevi va ku cikota ca Henandande.

¹⁰ Omo vaka-kutunga vashangumukile kwinda luvula lwa Njuvo ya Shukulu Kalunga, vaka-kukombelela vazalele vikoveyo vyavo vyavilaja vemanene mu mitambela yavo oku vanakwata malupembo mu mavoko avo, co na vaLevi va ku cikota ca Asafe vemanene oku vanakwata vingenjo. Vashangazalele Shukulu Kalunga ngwe ku vilongesa vije vivavaanene tunde ku simbu ya Mwene Ndaviti.

¹¹ Vembile nakushangazala Shukulu Kalunga, nakumukandelela ngwavo, “Shukulu Kalunga wapwa wamuvwa, cizemo cendi kuli Isalele capwa ca ku myaka yoshe.” Munu na munu watambekele manene na nzili yendi yoshe, mukushangazala Shukulu Kalunga, omwo vipangi vyakwinda luvula lwa Njuvo ya Shukulu Kalunga vyashangumukile.

¹² Vungi vwa vaka-kukombelela va vakulunu, na vaLevi, na vakulunu va vikota vaje vamwene Njuvo ya Shukulu Kalunga yakulivanga, vatendekele nakulila. Oloni veka vaje vakele kuje omo vamwene luvula lwa Njuvo ya Shukulu Kalunga valinakulwinda vatambekele manene nakujolela.

¹³ Naumo wai wasele kutepesa mutambi wakuvwaelela na mutambi wakulila, omwo muyoyo uvalingile wapwile wakama manene vasele kuuziva kulyala manene.