Ezela 1 - Livulu lya Shukulu Kalunga

Siluse ashika vaYunda veluke

¹ Mu mwaka wakulivanga omo Siluse wapwile mwene wa Pelesha, Shukulu Kalunga walingisile vije vyendekele muli Njelemiya muka-kwimanena ngeci vipwe vya vushunga. Shukulu Kalunga walingisile Mwene Siluse kusoneka lishiko nakulituma ngeci valilave nakulitambeka kwoshe-ikwoshe mu vumwene vwendi ngwavo,

² “Eli likelyo lishiko lya Siluse, mwene wa Pelesha. Shukulu Kalunga, Njambi wa Mwilu, ikeye nanjipwisa muka-kushwana kaye koshe, co nanjana moko yakumutungila Njuvo mu Yelusalema mu Yunda.

³ Ngecivene, ololo, yeni voshe vaje munapu vanu va Njambi, yeniko, co Shukulu Kalunga Njambi ya Isalele, Njambi uje ivalemesa mu Yelusalema akale amo neni.

⁴ Nga vanu vendi vamo vaje vali mu vunzinda vashaka vukwasi ngeci veluke, co vandambo vavo vanapande kuvakwasa siliva, na ngolinde, na vivala, na vimuna vakwambata vivala, na vin̄ombelo vya kulitombola vya mu Njuvo ya Shukulu Kalunga Njambi ili mu Yelusalema.”

⁵ Asinoni vakulunu va vikota vya miyati ya Yunda na Mbenjemani, na vaka-kukombelela, na vaLevi, na vanu voshe vaje wakasumwisile Njambi vimbunge vyavo, vaile nakutungulula Njuvo ya Shukulu Kalunga mu Yelusalema.

⁶ Vandambo vavo voshe vavakwasele, co vavaanene vyuma vyavingi, malonga a siliva, na ngolinde, na vivala, na vimuna vakwambata vivala, na vyuma vikwavo lalo vya seo, na vin̄ombelo vya mu Njuvo ya Shukulu Kalunga.

⁷ Mwene Siluse wavelwisilile malonga na vinganja vije vyambatele Mwene Nevukaneza kuvitundisa mu Njuvo ya Shukulu Kalunga mu Yelusalema nakukavyaka mu njuvo ya vinjambi vendi.

⁸ Co wavyanene kuli Mitelendate, mukulunu wakunyunga vufuko vwa vumwene, uje wavilavelele kuli Sheshevazale, nguvulu wa mu Yunda.

⁹ Ovu vukevwo vungi vwavyo, vimbashiya vya ngolinde vya vin̄ombelo vyapwile 30, vimbashiya vya siliva vya vin̄ombelo vyapwile 1,000, malonga akwavo apwile 29,

¹⁰ malonga amandondo a ngolinde apwile 30, malonga amandondo a siliva apwile 410, vivala vikwavo vyapwile 1,000.

¹¹ Vyoshe vyapwile 5,400 malonga a ngolinde, na malonga a siliva, na vivala vikwavo vyambatele Sheshevazale na vinzinda vakwavo omo vatundile ku Mbambilone nakuya ku Yelusalema.