Ezekiyele 9 - Livulu lya Shukulu Kalunga

Cihiso ca Yelusalema

¹ Asinoni njazivile Njambi atambeka ngwendi, “Ijeni kuno, yeni vanalume vavanaangula mukuhisa nganda. Ijeni na vitwa vyeni.”

² Co vwasi-vwasi vanalume vatanu na umo vezile kutundilila ku cikolo ca ku kunto ca ku Njuvo ya Shukulu Kalunga, umo na umo wambatele citwa cendi ca vushungu. Akati kavo akele munalume umo wazalele vuzalo vwa linyu, wambatele cisonekeso. Voshe vakovelele mu Njuvo ya Shukulu Kalunga vemanene kuyehi na mutula wa vunengu.

³ Co vumpau vwa Njambi ya Isalele vwatuukile ku vakelumbi, vwezile ku cikolo ca Njuvo ya Shukulu Kalunga. Co Shukulu Kalunga watambekele kuli munalume uje wazalele nanga ya linyu ngwendi,

⁴ “Ya wite mu nganda yoshe ya Yelusalema, nakwaka cizivukiso a luholo lwa munu na munu uje alinyenga, co ali na vusiwa, omwo a vyuma vya vunyengwe vije vilinakulingiwa mu nganda.”

⁵ Co njazivile Njambi endeka lalo kuli vaje vanalume vakwavo ngwendi, “Mukaveni mu nganda, co tsiyeni. Kesi musezeo munu, kesi muzivileo munu umo mema ku mbunge.

⁶ Tsiyeni vakulunu, na vakwenje, na vambanda, na vainavo, na vana. Oloni kesi mukwate uje ali na cizivukiso a luholo lwendi. Shangumukileni vene kuno ku Njuvo yange.” Ngecivene, vashangumukilile kuli vantwama vaje vemanene ku Njuvo ya Shukulu Kalunga.

⁷ Njambi wendekele kuli vakevo ngwendi, “Jwaleseni Njuvo yange. Shuliseni vipango na mivila ya vanu. Pangeni vipangi!” Ngecivene, vashangumukile kutsiya vanu vaje vakele mu nganda.

⁸ Omo vakele nakutsiya vanu, njasalele ange lika. Co njakulamene asi nakutambeka ngwange, “Yove Shukulu Kalunga wa Akamwa ya Vyoshe, kuma unaluvala na Yelusalema ngeci ulinakutsiya munu woshe uje nasalao mu Isalele ndi?”

⁹ Njambi wakumbulwile ngwendi, “Vanu va mu Isalele na vanu va mu Yunda vali na mulonga wa vuvi vwakukomokesa. Vali na mulonga wakutsiya mu lifuti mwoshe, co mu Yelusalema munashulu na mulonga wakutsiya. Valinakwendeka ngwavo yange Kalunga, njinaseze lifuti lyavo, co kunjesi nakuvamona.

¹⁰ Oloni kunjikavazivilako mema ku mbunge, njikalinga kuli vakevo ngwe vije vivanalingi kuli vakwavo.”

¹¹ Asinoni munu uje wazalele nanga ya linyu, waile nakwambulula kuli Shukulu Kalunga ngwendi, “Njinalingi ngwe muwanjishikile.”