Ezekiyele 8 - Livulu lya Shukulu Kalunga

CIMONA CAMUCIVALI CA NJAMBI KULI EZEKIYELE ( 8:1—10:22 ) Tumponya twa mu Yelusalema

¹ A litangwa lyamucitanu, ku ngonde yamucitanu na imo mu mwaka wamucitanu na umo wa vunzinda vwetu, vantwama va vinzinda vaje vatundile ku Yunda, vakele mu njuvo yange. Vwasi-vwasi nzili ya Shukulu Kalunga wa Akamwa ya Vyoshe yezile ali yange.

² Njakengele mwilu, co njamwene cimona ca cifwa ca munu wakukomokesa. Kutunda mu mbunda kutwala ku mendi endi, muvila wendi wafwile ngwe tuhya, co kutunda mu mbunda kutwala ku mutwe wendi, wavyazimine ngwe vunengu vwakukwita mufwitilo.

³ Wolwele cuma cafwile ngwe livoko, wanjikokele ku vin̄ambu. Co mu cimona eci vene, Munzinzime wa Njambi wanjijundwile mu mukambwila, wanjitwalele ku Yelusalema. Wanjitwalele mukati ka cikolo ca ku kunto ca Njuvo ya Shukulu Kalunga, kuje kwakele kamponya ka vunyengwe kaje kaluvalesele Njambi.

⁴ Co njamwene vumpau vwa Njambi ya Isalele, ngwe vuje vunjamwene omo njakele ku Ndonga ya KeVaLe

⁵ Njambi wendekele kuli yange ngwendi, “Muna munu, kenga ku kunto.” Co njakengeleko, kuje kuyehi na mutula, ku vukovelelo vwa ngila ya ku cikolo, njamwene kamponya ka vunyengwe kaje kaluvalesele Njambi.

⁶ Njambi wendekele kuli yange ngwendi, “Muna munu, wamono vije vilinakulingiwa ndi? Kenga ku vyuma vya vunyengwe vije vivalinakulinga vanu va Isalele kuje, valinakunjishekela kulyala manene kutunda ku mwela wange wakujela. Ukamona vyuma vya shwamwa manene kutuvakana evi.”

⁷ Co wanjitwalele ku vukovelelo vwa cipango ca anja, co wanjimwesele mbengwa ya mu civumbe.

⁸ Wendekele ngwendi, “Muna munu, tuva civumbe.” Njatuvile civumbe, co njawanene cikolo.

⁹ Wanjilekele ngwendi, “Kovela mukati umone vuvi, na vyuma vya vunyengwe vije vivalinakulinga kuje.”

¹⁰ Ngecivene, njakovelelemo nakumona. Vivumbe vyapwile vyakufwika na masona a manyoka na tusitu veka vakujeneka kujela, na vyuma vyeka vije vakele nakulemesa vaIsalele.

¹¹ Vantwama va vaIsalele makumi atanu na vavali vakele kuje, amo na Njazaniya muna Shafane. Munu na munu wakwatele cikango cakwenyekela insense, co vwisi vwa insense vwakele nakukakumuka.

¹² Co Njambi wanjihwile ngwendi, “Muna munu, wamono vije valinakulinga mu vushweke vantwama va vaIsalele ndi? Voshe valinakulemesela mu mulili muje munashulu na vifwa vya tumponya. Valyola malambi ngwavo, ‘Shukulu Kalunga katumono! Ikeye naseze lifuti.’ ”

¹³ Asinoni Shukulu Kalunga wendekele kuli yange ngwendi, “Ukavamona valinga vyuma vya vunyengwe manene kutuvakana evi.”

¹⁴ Ngecivene, wanjitwalele ku cikolo ca ku kunto ca mu Njuvo ya Shukulu Kalunga, wanjimwesele vanakazi vakele nakulila kutsa kwa njambi Tamuze.

¹⁵ Ikeye wehwile ngwendi, “Muna munu, unamono evi ndi? Ukamona vyuma vya vunyengwe manene.”

¹⁶ Ngecivene, wanjitwalele mukati ka cipango ca ku Njuvo ya Shukulu Kalunga. Co kuje kuyehi na cikolo ca mwela wakujela, mukati ka mutula na cikolo, mwakele vanalume makumi avali na vatanu. Vakengesele nima ku mwela wakujela, co vatsikamene a mavuli oku vanakenge mu ngangela, vakele nakulemesa litangwa omo lituuka.

¹⁷ Shukulu Kalunga wendekele kuli yange ngwendi, “Muna munu, unamono evi ndi? Ava vanu va mu Yunda kuvapwisilemo kulinga vyuma vyangoco vya vunyengwe vije viwunamono kuno, na vukalu vuje vunashandokela mu lifuti lyoshe. Embwe, vanapandele kwija nakuvilingila muno mu Njuvo yange, ngeci vanjiluvalese manene. Kenga muvali nakunjishaula akwaka minango ku majulu avo!

¹⁸ Vakaziva nzili yoshe ya vukalu vwange. Kunjikavecelela ngoco, nambe kuvazivilako mema ku mbunge. Vakalombela nakutambeka kuli yange ngwe muvasela, oloni kunjikavatolilila.”