Ezekiyele 7 - Livulu lya Shukulu Kalunga

Litangwa lyakukotoka lili muyehi

¹ Shukulu Kalunga wendekele kuli yange ngwendi,

² “Muna munu, evi vikevyo yange Kalunga wa Akamwa ya Vyoshe, njilinakwendeka ku lifuti lya Isalele, eci cikeco kukotoka kwa lifuti lyoshe!

³ “Isalele, kukotoka cinete. Njikaluvala nove, omwo njikakusompa a vije viwunalingi. Njikakwilwisila vilinga vyove vya vunyengwe vyoshe viwunalingi.

⁴ Nalumo lwai njikakusezao, nambe kukuzivila mema ku mbunge. Njikakunyanyamesa omwo a vyuma vya vunyengwe vije viwunalingi, ukazivuke ngeci kuma yange Kalunga.”

⁵ Evi vikevyo Shukulu Kalunga wa Akamwa ya Vyoshe alinakwendeka ngwendi, “Tuyando twakama tulinakwija ali yeni.

⁶ Kunahu. Oku kukekwo kukotoka. Unanyongo.

⁷ Kukotoka kulinakwija ali yeni vanu vaje valinakuyoya mu lifuti. Simbu ili muyehi, omo kukukakala lalo viwano vyakulisamba a minkinda yakulemesela, oloni citanga lika cikakalako.

⁸ “Ololo ukaziva vukalu vwange vwoshe. Njilinakukusompa omwo a vije viwunalingi, co njikakwilwisila vunyengwe vwove vwoshe a futisi yove.

⁹ Kunjikakusezao nambe kukuzivila mema ku mbunge. Njikakunyanyamesa omwo vyuma vya vunyengwe viwunalingi, ngeci uzivuke ngwove kuma yange Kalunga, yange muka-kuminyanyamesa.”

¹⁰ Litangwa lya tuyando twakama lilinakwija ali Isalele. Mbweti yakukupupisa ilinakujovelela. Kulyalesa kunaama manene.

¹¹ Vukalu vusholola vilinga vya kupenga-penga. Cuma nacimo cai cavo cikasalao, cuma nacimo cai ca ku vufuko vwavo, na ku vuvwa vwavo, nambe ku vumpau vwavo, cikasalao.

¹² Simbu ilinakwija. Litangwa lili muyehi, omo kulanda nakulandulula kuvikakala lalo na seo, omwo Njambi akanyanyamesa vanu voshe mu cifwa cimo.

¹³ Naumo wai muka-kulandulula akayoya simbu yakama, ngeci awane vije vyanazimbalesele, omwo vukalu vwa Njambi vukakala ali munu na munu woshe. Vaje vaka-vuvi kuvakasalao.

¹⁴ Lupembo lukaimba, co vanu voshe vakalivwaesela cimweja. Oloni naumo wai lalo akaya ku nzita, omwo vukalu vwa Njambi vukawila ali vanu voshe mu cifwa cimo.

Kunyanyamesa omwo vuvi vwa Isalele

¹⁵ Vanu valinakulwa nzita mu vitapalo, co mu vinjuvo muli mishongo na njala. Munu woshe uje ali anja ya lifuti akatsila mu nzita, co vanu voshe vali mu nganda vakakwatiwa na mushongo na njala ya lyangengela.

¹⁶ Vamo vakatewela ku minkinda ngwe tutela vaje vanatewa mu vyana. Voshe vakaziva vusiwa omwo vuvi vwavo.

¹⁷ Mavoko a munu na munu woshe akazeya, co mavuli avo akajaja.

¹⁸ Vakazala vikeleya, co mivila yoshe ikajaja. Mitwe yavo ikapwa yakuteula, co voshe vakaziva shwamwa.

¹⁹ Vakombila ngolinde yavo na siliva mu vitapalo ngwe vishwashwa vyangoco, omwo siliva nambe ngolinde kuvyasa kuvaamena ku vukalu vwa Shukulu Kalunga. Kuvakavipangesa mukujawisa mashungu avo, nambe kushulisa mafu avo. Ngolinde na siliva vyavatwamenenene ku vuvi.

²⁰ Valyalesele na vuvwa vwa mamanya avo a seo, oloni vavipangesele mukulinga tumponya twa vunyengwe. Omu mukemwo Shukulu Kalunga walingisile vufuko vwavo kupwa vunyengwe kuli vakevo.

²¹ Shukulu Kalunga alinakwendeka ngwendi, “Njikatavesa vaka-kwija kuvevila, co vaka-kupokola mashiko vakatambula vufuko vwavo vwoshe nakuvujwalesa.

²² Kunjikombuko mbunge omo Njuvo yange ya vufuko vaizilula, omo vezi vaituva nakukovelamo nakuyijwalesa.

²³ “Vyuma vyoshe vili mu citanga, lifuti linashulu na vaka-kutsiya na vinganda vinashulu na muuka.

²⁴ Njikanena miyati yaivi manene kuno nakukala mu vinjuvo vyeni. Vanu veni vakutakama kuvakasimpi lalo, omo njikatava miyati kuzilulula mitambela kuje kumwakele nakulemesela.

²⁵ Vukalu vulinakwija. Mukashakezeka kwoloka, oloni kumukaciwana.

²⁶ Tuyando twakama tukalikavasana, co muzimbu wauvi ukakavasana ukwavo. Mukalomba vaka-kwimanena ngeci vamijombolwela vya kulutwe. Vaka-kakukombelela cuma nacimo cai civakalongesa vanu, co vakulunu cuma nacimo cai civakanangula.

²⁷ Mwene akalila na vana va vimyene kuvakakala lalo na cinyangavili, co vanu vakajaja na lyova. Njikaminyanyamesa omwo a vyoshe vije vimunalingi, co njikamisompa mu ngila ije vene mwasompele nayo vakweni. Co eci cikamimwesa ngeci kuma yange Kalunga.”