Ezekiyele 6 - Livulu lya Shukulu Kalunga

Shukulu Kalunga ahisa kulemesa tumponya

¹ Shukulu Kalunga wendekele kuli yange ngwendi,

² “Muna munu, kenga ku minkinda ya Isalele uvaleke lijwi lyange.

³ Leka minkinda ya Isalele ngeci izive lijwi lya Shukulu Kalunga, izive vije yange Kalunga wa Akamwa ya Vyoshe njendeka ku minkinda, na ku malundu, na ku mingulunga, na ku vimbongo ngwange, ‘Njikatuma mukwale mukunyongesa mitambela kuje kuvakalemesa vanu tumponya.

⁴ Mitula ikasiwuka, co mitula ya insense ikapokozoka. Vanu voshe vakavatsiila kulutwe lwa tumponya twavo.

⁵ Njikashandola mivila ya vanu va Isalele, nakushandwela vitsiya vyavo ku mitula yoshe.

⁶ Vinganda vyoshe vya Isalele vikanyonga, ngecivene, mitula yavo yoshe na tumponya twavo vikasanyozoka vimbazuvwila-mbazuvwila, co mitula yavo ya insense ikasanyozoka, vyoshe vije vivalingile vikanyonga.

⁷ Vanu vakavatsiila kwoshe-ikwoshe, co vaje vakasalao vakazivuka ngeci yange njapwa Kalunga.’

⁸ “Oloni njikecela vamo vakayoye, co njikavashandwela akati ka miyati,

⁹ kuje vakakala mu vunzinda. Co kuje vakanjanuka, nakuzivuka ngeci yange njinavahisa nakuvazivisa shwamwa, omwo vimbunge vyavo vyakujeneka kukulaela vyanjisezele, co vazemene tumponya kutuvakana yange. Co vakaziva vunyengwe, omwo vuvi na vyuma vya shwamwa vije vivalingile.

¹⁰ Vakazivuka ngeci yange njapwa Kalunga, co kunangula kwange kesi kwangoco embwe.”

¹¹ Shukulu Kalunga wa Akamwa ya Vyoshe wendekele ngwendi, “Kanda vimbanda! Co lyata musindo! Lila na vusiwa omwo vuvi vwoshe, na vyuma vya vunyengwe vije vivanalingi vaIsalele. Vakatsila mu nzita, nakulanduka ku njala, na kutsa lalo ku mushongo.

¹² Vaje vali kulyala vakavinja, co vakatsa, na vaje vali muyehi vakatsila mu nzita, co vaje vakasalao vakalanduka ku njala. Vakaziva nzili ya vukalu vwange.

¹³ Mivila yavo ikashandokela mukati ka tumponya, na nakuzengeleka mitula, ikashandokela a malundu oshe amalaja, na akamwa ya minkinda yoshe, na mwisi ya minzinze ya miti, na mu miti yoshe yakama ya oke, na mu mitambela yoshe muje muvakenyekela vin̄ombelo ku tumponya twavo. Asinoni munu woshe akazivuka ngeci yange njapwa Kalunga.

¹⁴ Eyo, njikolola livoko lyange nakunyongesa lifuti lyavo. Njikalipwisa ngundu kutunda mu mambo ku mbwela nakweta ku nganda ya Limbela ku kunto, kunjikasezeo mutambela umo kuje kuvakala vaIsalele. Asinoni munu woshe akazivuka ngeci yange njapwa Kalunga.”