Ezekiyele 5 - Livulu lya Shukulu Kalunga

Ezekiyele ateula vin̄ambu vyendi

¹ Shukulu Kalunga wendekele ngwendi, “Muna munu, nona mukwale wakuvambuka, co utewise munjezi wove na vin̄ambu vyove vyoshe. Asinoni peselesa vin̄ambu a vipeseleso nakuvyangununa mu mitambela itatu.

² Enyekela mutambela wamucitatu wa vin̄ambu mu nganda omo nzita inahu. Co nona mutambela ukwavo wamucitatu nakuutetanga na mukwale wove omo ulinakulizenga ku nganda. Umbila mutambela uje wanasalao wamucitatu mu lihunzi, co njikavakava na mukwale wange.

³ Sezako vin̄ambu vimo vyavipuzuzu, nakuvizengela ku mukundwilo wa vuzalo vwove.

⁴ Co nonao lalo twatupuzuzu, tumbile mu liko, vyesele vyenye vyoshe. Co tuhya tukatundao tukashalava nakwenyeka lifuti lyoshe lya Isalele.”

⁵ Co Shukulu Kalunga wa Akamwa ya Vyoshe wendekele ngwendi, “Kenga, Yelusalema njayaka mukati ka kaye, na mafuti oshe eka anaizengeleka.

⁶ Oloni Yelusalema vatengulukilile mashiko ange nakuwalwisa, co valingile manene vuvi kutuvakana miyati yeka, vakele na likamba lyakama kutuvakana mafuti aje avazengelekele. Yelusalema vavyanene mashiko ange nakuvyana kunyunga vizilika vyange.

⁷ Ololo Yelusalema, tolilila ku vije vinjendeka yange Kalunga wa Akamwa ya Vyoshe. Munalikokela tuyando twakama akujeneka kwononoka mashiko ange, nambe kunyunga vizilika vyange, kutuvakana miyati ije inamizengeleka. Munakava futisi ya miyati yeka.

⁸ Ngecivene, yange Kalunga wa Akamwa ya Vyoshe, njikuleka ngwange yange njinapu nji citozi cove. Njikakuhisa oku miyati yoshe inakumono.

⁹ Omwo a vyuma vyoshe vije viwulinakulinga vije vinjazinda, njikahisa Yelusalema, oloni nalumo lwai njalingilemo simbu ya kunima, co lalo nalumo lwai njikalingamo simbu ya kulutwe.

¹⁰ Mu ngila eyi, visemi va mu Yelusalema vakalya vana vavo, na vana lalo vakalya visemi vavo. Njikaminyanyamesa, co vaje vakasalao na myonyo njikavashandwela ku mitambela yoshe.

¹¹ “Ngecivene, ngwe omo njapwa Njambi wakuyoya, eli likelyo lijwi lya Shukulu Kalunga wa Akamwa ya Vyoshe, omwo mwajwalesele Njuvo yange na vuvi vwoshe, na vyuma vya vunyengwe vije vimwalingile, njikamikengesa nima kujeneka kumizivila mema ku mbunge.

¹² Co vanu vove vamucitatu vakatsa ku mushongo nakulanduka ku njala ya lyangengela mu nganda, vamucitatu vakavatapa na mikwale anja ya nganda, co vamucitatu va mamaneselelo njikavashandwela mu lihunzi nakuvakava na mukwale wange.

¹³ “Mukaziva vukalu vwange nakuluvala kwange, noo njikalikela. Omo vyoshe evi vikalingiwa, co mukatava ngweni yange Kalunga, njinendeka kuli yeni, omwo yange njaluvala akujeneka kulongwa kweni.

¹⁴ Co vanu voshe vakutunda ku mafuti aje anamizengeleka, vakamiyeluwisa nakumishondoloka.

¹⁵ “Omo njiluvala na litoto lyakama nakuminyanyamesa, co miyati yoshe vaje vanamizengeleka vakalishoshomwena. Vakamikenga na vunyengwe nakumishendumuna.

¹⁶ Njikatepulula ku vyakulya vyeni, co mukalanduka ku njala ya lyangengela. Mukaziva muyavavala njala, ngwe vanamyasha mikili yakuvambuka mukuminyongesa.

¹⁷ Njikatuma njala na vikashama mukutsiya vana veni, co njikatuma lalo mishongo na vukalu na nzita mukumitsiya. Munjinendeka yange Kalunga.”