Ezekiyele 46 - Livulu lya Shukulu Kalunga

Mwene na viwano

¹ Shukulu Kalunga wa Akamwa ya Vyoshe alinakwendeka ngwendi, “Cikolo ca mu ngangela, ca cipango ca mbanja ya mukati vanapande kucishoka a matangwa atanu na limo akupanga vipangi, oloni vacishokolole lika a Litangwa Lyakuhwima na a Ciwano ca Ngonde Yaiha.

² Mwene uje alinakushwana akatunde mu cipango ca mbanja ya anja nakuya mu mulili wakama, co akemane kumukulo wa vimanda vya ku cikolo, simbu vaka-kukombelela valinakwenyeka n̄ombelo yendi yamutunu nakulambula milambu yendi ya kulitombola. Co kuje ku cikolo napande kulemesa, asinoni atuuke anja. Cikolo kuvapandele kucishoka kuvanga noo cingwezi.

³ A Litangwa Lyakuhwima lyoshe, na a Ciwano ca Kutenama kwa Ngonde, vanu voshe vakakulama nakulemesa Shukulu Kalunga kulutwe lwa cikolo.

⁴ “A Litangwa Lyakuhwima uje mwene akanene kuli Shukulu Kalunga, kupwa vin̄ombelo vya kwenyeka vyoshe vyamutunu, vana va vimanga vatanu na umo, na lijamba lya manga umo, voshe vakujeneka kapenga.

⁵ A lijamba lya manga umo na umo akanene mulambu wa vimbuto vya vinona wa malita akupwa likumi na atanu na avali na litambelo, co a muna manga na muna manga akanene vyoshe vije ashaka kwana. A mulambu woshe wa vimbuto vya vinona akanene malita atatu a mazi a olive.

⁶ A Ciwano ca Kutenama kwa Ngonde akane muna ngombe wa nkomba, na vana va vimanga vatanu na umo, na lijamba lya manga, voshe vakujeneka kapenga.

⁷ A ngombe umo na umo wa nkomba na a lijamba umo na umo, mulambu unapande kupwa vimbuto vya vinona vya malita akupwa likumi na atanu na avali na litambelo, a muna manga umo na umo, mulambu ukapwe vyoshe vije mwene ashaka kwana. Malita atatu a mazi a olive vakavyane na mulambu umo na umo wa vimbuto vya vinona.

⁸ Mwene napande kutuuka mu mulili wakama kwitila mu cikolo cakuya anja ku ngila ije vene yanakovelelele.

⁹ “Omo vanu vaija nakulemesa Shukulu Kalunga a ciwano coshe-icoshe, vaje vanakovelela ku cikolo ca ku kunto, vanapande kutuukila ku cikolo ca mu mbwela, omo vanamanesa kulemesa, co vaje lalo vanakovelela ku cikolo ca mu mbwela, vakatuukile ku cikolo ca ku kunto. Naumo wai akatuukila mu cikolo cije canakovelelele, oloni napande kutuukila ku cikolo ca mu cishunga.

¹⁰ Mwene napande kukovela mukati omo vanu vakovela mukati, co napande kutuuka omo vanu vatuuka

¹¹ A matangwa a viwano na a viwano vikevyo vavenya, mulambu wa vimbuto vya vinona ipwe malita likumi na atanu na avali na litambelo, na ngombe wa nkomba umo na umo nambe lijamba lya manga umo na umo, na vyoshe vije vyashaka uje muka-kulemesa kwana a muna manga umo na umo. Malita atatu a mazi a olive vavilambule na mulambu umo na umo wa vimbuto vya vinona.

¹² “Omo mwene uje alinakushwana ashaka kwana mulambu wa cizango kuli Shukulu Kalunga, nambe mulambu wa kwenyeka woshe wamutunu, nambe mulambu wa kulitombola, vakamushokolwele cikolo ca mu ngangela ca ku cipango ca mbanja ya mukati. Ikeye akalambule mulambu mu ngila imo, ngwe mwakalingi a Litangwa Lyakuhwima, co cikolo vakacishoke lalo omo atuuka anja.”

Mulambu wa a litangwa na litangwa

¹³ Shukulu Kalunga alinakwendeka ngwendi, “A mutondo na mutondo muna manga wa mwaka umo wakujeneka kapenga vakamwenyeke woshe wamutunu kupwa n̄ombelo kuli Shukulu Kalunga. N̄ombelo ei inapande kukalako a litangwa na litangwa.

¹⁴ Co lalo mulambu wa makilo avali a vunga vwa tiliku unapande kukalako a mutondo na mutondo, amolika na lita imo ya mazi a olive yakukumbasana na vunga vwa tiliku. Mashiko aa mulambu ou kuli Shukulu Kalunga anapande kupanga simbu yoshe.

¹⁵ Muna manga, na vunga vwa tiliku, na mazi a olive vanapande kuvikombelela kuli Shukulu Kalunga a mutondo na mutondo simbu yoshe.”

Mwene na lifuti

¹⁶ Shukulu Kalunga wa Akamwa ya Vyoshe alinakushika ngwendi, “Nga mwene uje alinakushwana aana lifuti lyendi limo kupwa vwana kuli umo wa vana vendi, co lije lifuti likakundama kuli uje mwana kupwa mutambela wa vufuko vwa naanga yendi.

¹⁷ Oloni nga mwene aana lifuti lyendi limo kuli uje alinakupanga vipangi vya mwene, co likapwa vufuko vwa uje mwene lalo omo Mwaka Wakupatuka weta. Co likapwa lyendi, ikeye lika na vana vendi vasa kulifuka kupwa lyavo ku myaka yoshe.

¹⁸ Mwene kapandele kwambata vufuko vwoshe-ivwoshe vwa vanu. Nga kuli lifuti limo ashaka kwana kuli vana vendi, linapande kupwa lifuti lije lyakundama kuli ikeye, ngeci kesi ayandese vanu vange akuvanyeka lifuti lyavo.”

Vipiko vya ku Njuvo ya Shukulu Kalunga

¹⁹ Asinoni uje munalume wanjitwalele ku cikolo ca milili ije yakengesele ku kunto kuyehi na cikolo ca ku mutambela wa mu mbwela wa cipango ca mbanja ya mukati. Eyi yapwile milili yakujela ya vaka-kukombelela. Co ikeye wenikile mwela umo uje wakele mu kangombe ka yambi ka milili,

²⁰ co wendekele ngwendi, “Ou ukewo mwela uje vaka-kukombelela vakatelekela situ ya vin̄ombelo vya a vuvi na milambu yakuliilwisila, nakwoca milambu ya vunga vwa tiliku, ngeci kesi vakatuule anja ya cipango ca mbanja cuma cimo cakujela, kutewa cikavulumuna vanu.”

²¹ Asinoni uje munalume wanjitwalele ku cipango ca mbanja ya anja, co wanjimwesele ku vimbango viwana vya cipango ca mbanja ya anja, mu mbango na mbango ya cipango mwakele kacipango kakandondo manene.

²² Co tuvipango twatundondo tuje twakele mu vimbango viwana vya cipango twapwile mamita makumi avali mu vulaja na mamita likumi na atanu mu vwihi.

²³ Kwakele vivumbe vya mamanya vyazengelekele vipango vyoshe viwana, co ku vivumbe vatungilileko meko akutelekela.

²⁴ Co uje munalume wanjilekele ngwendi, “Evi vikevyo vipiko muje vangamba va ku Njuvo ya Shukulu Kalunga vakatelelelamo vin̄ombelo vivakakombelela vanu.”