Ezekiyele 45 - Livulu lya Shukulu Kalunga

Mutambela wa lifuti wa Shukulu Kalunga

¹ Omo mulitavwila lifuti kwana ku muyati umo na umo, co vangununeko mutambela umo vaukundike kuli Shukulu Kalunga. Unapande kupwa makilomita likumi na avali na litambelo mu vulaja, co mu vwihi makilomita likumi. Mutambela woshe ukapwa wakujela.

² Mu mutambela ou mukakala mwela wakupwa amo nomu-nomu aje akakala Njuvo ya Shukulu Kalunga, ukapwa mamita 250 ku mutambela umo na umo, kuje kukazengeleka mutambela wakujanjavala wa mamita akupwa makumi avali na atanu mu vwihi.

³ Co litambelo lya mutambela ou, setekenimo mutambela wakupwa makilomita likumi na avali mu vulaja, co lalo makilomita atanu mu vwihi, co mutambela ou akeo akakala Njuvo ya Shukulu Kalunga, mwela wakujela kutuvakana myela yoshe.

⁴ Ukapwa mutambela umo wakujela mu lifuti, uje vakangunwina vaka-kukombelela vaje vaka-kupangela Shukulu Kalunga mu Njuvo yendi. Mukakala lika vinjuvo vyavo na mutambela wa Njuvo ya Shukulu Kalunga.

⁵ Litambelo lya mutambela ukwavo vakalyangununa kupwa vufuko vwa vaLevi, vaje vakapanga vipangi mu Njuvo ya Shukulu Kalunga. Co mukakala vinganda muje muvakakala.

⁶ Cuma cikwavo caatele ku mutambela wakujela, capwile mutambela ukwavo, wapwile makilomita likumi na avali na litambelo mu vulaja, co mu vwihi wapwile makilomita avali na litambelo, mutambela uje vawangunwine kupwa nganda yakukala vanu va Isalele.

Mutambela wa mwene

⁷ Vakangununa lalo mutambela umo kupwa vwa muna mwene. Ukapwa kutunda ku nginga ya ku kangombe ka yambi ku mutambela wakujela, kutwala na mu kangombe ka yambi kweta ku Mema a Kalunga a Menditelenyani, co kutunda ku nginga ya mu ngangela kutwala na ku nginga ya mu ngangela ya lifuti, ngeci vulaja vwawo vukapwe amolika na vulaja vwa mutambela uje uvanene ku miyati ya Isalele.

⁸ Mutambela ou ukapwa wa mwene uje alinakushwana mu lifuti lya Isalele, ngeci kesi akayandese lalo vanu, oloni mutambela ukwavo wa lifuti ukapwe wa miyati ya Isalele.

Mashiko aali mwene

⁹ Shukulu Kalunga wa Akamwa ya Vyoshe wendekele ngwendi, “Yeni vaka-kushwana va Isalele munavulumuna simbu yakama manene! Likeleni muuka na lipakeso. Lingeni vije vyakushungama na vushunga. Kesi lalo musheke vanu vange mu lifuti lyavo embwe. Yange Kalunga wa Akamwa ya Vyoshe, njimileka evi.

¹⁰ “Munu woshe napande kupangesa vulemu na seteko ya kulongwa.

¹¹ “Seteko ya vyuma vyakuma ipwe mumo na seteko ya vyuma vyakutonola. Co seteko yapwa homele. Ngila yakuseteka inapande kupwa ngeci. “Homele imo inapu maefa likumi nambe vimbafu likumi.

¹² “Vipeseleso vyeni vipwe ngeci, mangela akupwa makumi avali apwe shekele imo, mashekele makumi atanu na limo apwe mina imo.

¹³ “Ou ukewo mulambu umukana kuli Shukulu Kalunga wa Akamwa ya Vyoshe, mutambela wamumakumi atanu na limo wa tiliku yove ya kuteja, mutambela wamumakumi atanu na limo wa mbale ya maumwa yove ya kuteja.

¹⁴ “Unapande kulambula mazi a olive akupwa 100 mu seteko ya mutambela umo ku vyoshe vyakwima ku miti yove. “(Visetekeni mu mbafu, vimbafu likumi vinapu homele imo, ikeyo inapu kole imo.)

¹⁵ “Akati ka vimanga vavavwa va ku vulilo vwa Isalele mukambatao umo na umo ku vimanga vakupwa 200. Munapande kunena milambu ya vimbuto vya vinona, na tusitu vakwenyeka voshe vamutunu, na tusitu va milambu ya kulitombola, ngeci vakamisambese ku vuvi vweni. Munjinashiki yange Kalunga wa Akamwa ya Vyoshe.

¹⁶ “Vanu voshe va muno mu lifuti vanapande kutwala mulambu ou kuli mwene uje alinakushwana mu Isalele.

¹⁷ Cikapwa cipangi cendi kwana tusitu vakwenyeka voshe vamutunu, na milambu ya vimbuto vya vinona, na milambu ya vinyu ya muyati woshe wa Isalele a Ciwano ca Kutenama kwa Ngonde, na a Matangwa Akuhwima, na a viwano vikwavo. Napande kwana tusitu va milambu ya a vuvi, na milambu ya vimbuto vya vinona, na milambu ya kwenyeka yoshe yamutunu, na milambu ya kulitombola, mukutundisa vuvi vwa vanu va Isalele.”

Viwano

¹⁸ Shukulu Kalunga wa Akamwa ya Vyoshe wendekele ngwendi, “A litangwa lyakulivanga ku ngonde yakulivanga, mukakombelele ngombe wa nkomba wakujeneka kapenga, co mukajelesa Njuvo yange.

¹⁹ Muka-kukombelela akambata maninga amo a n̄ombelo eyi ya a vuvi, co akaakwita a vivuliko vya Njuvo yange, na a vimbango viwana vya mutula, na a vivuliko vya vikolo vya cipango ca mbanja ca mukati.

²⁰ A litangwa lyamucitanu na avali ku ngonde ije vene, mukalinga cuma cimo kwimanena munu na munu uje alinga vuvi kesi na cizango, nambe alinga vuvi omwo kazivukile. Mu ngila eyi vene Njuvo yange ikapwa yakujela.

²¹ “A litangwa lyamulikumi na awana ku ngonde yakulivanga, mukashangumuke kulisamba Ciwano ca Pasovala. Co a matangwa atanu na avali munu na munu akalya makende akujeneka musima.

²² A litangwa lyakulivanga lya ciwano, mwene uje alinakushwana napande kukombelela ngombe wa nkomba kupwa n̄ombelo ya a vuvi vwendi na a vuvi vwa vanu voshe.

²³ A litangwa na litangwa a matangwa atanu na avali a ciwano, akakombelele kuli Shukulu Kalunga, vingombe va nkomba vatanu na vavali na majamba a vimembe vatanu na vavali vakujeneka kapenga, nakuvenyeka voshe vamutunu. Co lalo akakombelele membe wa lijamba a litangwa na litangwa kupwa n̄ombelo ya a vuvi.

²⁴ Omwo a ngombe na ngombe wa nkomba na lijamba na lijamba wa manga uje vakakombelela, kukale lalo n̄ombelo ya malita likumi na atanu na avali na litambelo lya vimbuto vya vinona na malita atatu a mazi a olive.

²⁵ “A Ciwano ca Mapapela, cije cikashangumuka a litangwa lyamulikumi na atanu ku ngonde yamucitanu na vivali, mwene akakombelela ku litangwa na litangwa a matangwa atanu na avali, n̄ombelo yakulifwa ya a vuvi, na vin̄ombelo vyakulifwa vya kwenyeka vyoshe vyamutunu, na vin̄ombelo vyakulifwa vya vimbuto, na mazi a olive.”