Ezekiyele 44 - Livulu lya Shukulu Kalunga

Vipangi vya cikolo ca mu ngangela

¹ Co uje munalume wanjitwamenenene ku cikolo ca anja ku mutambela wa mu ngangela wa Njuvo ya Shukulu Kalunga. Cije cikolo capwile cakushoka,

² co Shukulu kalunga wendekele kuli yange ngwendi, “Cikolo eci cikapwa cakushoka, naumo wai akacishokolola. Munu naumo wai ivakatavesa ngeci acipangese, omwo yange Kalunga, Njambi ya Isalele, njakovelelelemo. Cinapande kupwa cakushoka vene.

³ Muna mwene nasa kukovelamo nakulya vyakulya vyakujela ku mesho ange. Napande kukovelamo nakutuukila mu cikolo cakuya ku mulili wakama ku shongo ya mukati.”

Mashiko akutavesa kukovela mu Njuvo ya Shukulu Kalunga

⁴ Asinoni uje munalume wanjitwalele kwita mukati ka cikolo ca ku kunto kulutwe lwa Njuvo ya Shukulu Kalunga. Njakengele, co njamwene vumpau vwa Shukulu Kalunga vwashulisile Njuvo yendi. Njawililile asi na cihanga cange cakwatele a livu,

⁵ co Shukulu Kalunga wendekele kuli yange ngwendi, “Muna munu, aka mbunge ku vyuma vyoshe umona nakuziva. Njikuleka mashiko na vilongesa vyakwendesa Njuvo yange. Nongonona mwamuvwa vanu vaje vanapande kukovela nakutuuka mu Njuvo yange, na vanu vaje kuvatavesele.

⁶ “Leka vanu va Isalele vaje vaka-kutengulukila ngwove yange Kalunga wa Akamwa ya Vyoshe, kunjikongozola lalo vyuma vya vunyengwe vije vivakele nakulinga.

⁷ Vanazilulula Njuvo yange akutava vaka-kwija vakujeneka kutuuka vaje kuvesi nakunjononoka, kukovela mu Njuvo yange, a simbu ije omo mazi na maninga valinakuvikombelela kuli yange. Ngecivene, vanu vange vanapokola cikumiiyo cange a vyuma vyoshe vya vunyengwe vije vivanalingi.

⁸ Vakevo kuvendesele mwamuvwa vilika vyakujela mu Njuvo yange, oloni munaka vaka-kwija kupwa vaka-kushika.

⁹ “Yange Kalunga wa Akamwa ya Vyoshe, njinendeka ngwange naumo wai muka-kwija wakujeneka kutuuka, nambe wakujeneka kunjononoka, akakovela mu Njuvo yange, nambe vene muka-kwija uje alinakukala akati ka vanu va Isalele.”

VaLevi vavatundisako ku vuka-kukombelela

¹⁰ Shukulu Kalunga wendekele kuli yange ngwendi, “Njikanyanyamesa vaLevi amolika na vanu voshe va Isalele vaje vanjisezele nakulemesa tumponya.

¹¹ Vasa kunjipangela mu Njuvo yange, mukunyunga vikolo nakupanga vipangi vya mu Njuvo yange. Vasa kutsiya vimuna vaje vavalinakukombelela vanu kupwa n̄ombelo ya kwenyeka, co lalo vakakala a vipangi ngeci vapangele vanu.

¹² Oloni omwo valingisile vanu va Isalele kulemesa tumponya, co mu ngila eyi vene vatwamenenene vanu mu vuvi, yange Kalunga wa Akamwa ya Vyoshe, njalikumiiya nakulisinga ngwange vanapande kuvanyanyamesa.

¹³ Kuvasa kunjipangela kupwa vaka-kukombelela embwe, nambe kuya kuyehi na cuma cimo cije cakujela kuli yange, nambe kukovela mu Mwela Wakujela Manene. Oku kukekwo kunyanyamesa kwavo omwo vyuma vya vunyengwe vije vivanalingi.

¹⁴ Njikavana vipangi vyakuundangana manene mu Njuvo yange ngeci vavilinge.”

Vaka-kukombelela

¹⁵ Shukulu Kalunga wa Akamwa ya Vyoshe wendekele ngwendi, “Vaka-kukombelela vaje vanakundama ku muyati wa Levi va ku naanga ya Zandoke, nameme ngoco, vakele nakunjipangela na kulongwa mu Njuvo yange, omo vanu va Isalele vatengulukile kutunda kuli yange. Ngecivene, ololo vakevo lika vakanjipangela nakwija ku mesho ange nakunjikombelela vin̄ombelo vya mazi na maninga.

¹⁶ Vakevo lika vakakovela mu Njuvo yange, nakupangela ku mutula wange, nakwendesa vipangi vyakulemesa mu Njuvo yange.

¹⁷ Omo vakovela mu cikolo ca mukati ka cipango ca mbanja ya mukati ka ku Njuvo yange, vakazala vuzalo vwa linyu. Kuvapandele kuzala vuzalo vweka vwakutunga na maka a vimanga omo vali a vipangi mu cipango ca mbanja ya mukati nambe mu Njuvo yange.

¹⁸ Ngecivene, kutewesa kutukuta, vanapande kuzala tulupusa twa linyu na twenda-mushelengwa twa linyu, oloni kesi na mwiva embwe.

¹⁹ Omo kanda vacituuke anja ya cipango ca mbanja kuje kuli vanu, akulivanga vanapande vashulule vuzalo vuje vazalele a vipangi mu Njuvo yange, co vavuseze mu milili ije yakujela. Vanapande kuzala vuzalo vweka ngeci vuje vuzalo vwavo vwakujela kesi vuvulumune vanu.

²⁰ “Vaka-kukombelela kuvapandele kuteula ku mitwe yavo, nambe kwecelela vin̄ambu vyavo kupwa vyavilaja-laja embwe. Vanapande kuvinyunga mwamuvwa ngeci vipwemo ku vulaja na vwihi.

²¹ Vaka-kukombelela kuvapandele kunwa vinyu omo kanda vaciye mu cipango ca mbanja ya mukati.

²² Naumo muka-kukombelela wai akambata munakazi wakukondola, ambate lika kaIsalele wa mumbanda uje kanda alimone na munalume, nambe fwile wa mukwavo muka-kukombelela.

²³ “Vaka-kukombelela valongese vanu vange kwangula akati ka vije vyakujela na vije vyakujeneka kujela, na futisi ya vyakujela nevi vyakujeneka kujela.

²⁴ Omo kukatuka vimata vya mulonga, co vaje vaka-kukombelela vayongole a mulonga kwesekesa na mashiko ange. Vanyunge viwano vyange kwesekesa ku mashiko ange na vilongesa vyange, co vanyunge Litangwa Lyakuhwima kupwa lyakujela.

²⁵ “Muka-kukombelela kapandele kupwa muka-futisi yakujeneka kujela akukwata a civimbi, kuvanga apwe civimbi ca umo wa visemi vendi, nambe umo wa ali vana vendi, nambe ndolome yendi, nambe umo ndokazi yendi wakushomboka.

²⁶ Co omo nalijelesa lalo, napande kuvandamena matangwa atanu na avali,

²⁷ asinoni akakovele lalo mu cipango ca mbanja ya mukati ka Njuvo yange nakukombelela n̄ombelo yakulijelesa kwendi, ngecivene, ase kupangela lalo mu Njuvo yange. Munjinendeka yange Kalunga wa Akamwa ya Vyoshe.

²⁸ “Vaka-kukombelela vali na vuka-kukombelela kupwa mutambela wa vukwasi vwavo vuje vunjinana kuli Isalele kutunda ku cisemwa cimo nakweta ku cisemwa cikwavo. Kuvapandele kukala na vufuko mu Isalele, yange njikavana vyoshe vivashaka.

²⁹ Milambu ya vimbuto vya vinona, na milambu ya a vuvi, na milambu yakuliilwisila vikapwa vyakulya vya vaka-kukombelela, co vakatambula vyuma vyoshe mu Isalele vije vivanakundika vyoshe kuli yange.

³⁰ Vaka-kukombelela vakatambula vije vyavivwa vyoshe, vya kuteja akulivanga, na vyuma vyoshe vyeka vije vivakanena kuli yange. A simbu na simbu ije vanu voca makende, vanapande kwana vaka-kukombelela likende lyakulivanga kwoca kupwa mulambu, co vivezikiso vyange vikakala a vinjuvo vyavo.

³¹ Vaka-kukombelela kuvapandele kulya kazila woshe-iwoshe wakulitsila, nambe kasitu wakulitsila, nambe wakutsiya ku mukwavo kasitu.”