Ezekiyele 43 - Livulu lya Shukulu Kalunga

Shukulu Kalunga eluka ku Njuvo yendi

¹ Asinoni uje munalume wanjitwalele ku cikolo cije cakengesele mu ngangela,

² co kuje njamwene vumpau vwa Njambi ya Isalele vwatundililile mu ngangela. Co lijwi lya Njambi lyalumine ngwe cilumo ca mema a kalunga, co asi avyakumine na vumpau vwendi.

³ Cimona eci capwile ngwe cije njamwene omo Njambi wezile mukunyongesa Yelusalema, na cije njamwene ku ngenge ya Ndonga ya KeVaLe Co njawililile asi na cihanga cange cakwatele a livu.

⁴ Vumpau vwa Njambi vwetile mukati ka cikolo ca mu ngangela, co vwakovelele mu Njuvo ya Shukulu Kalunga.

⁵ Munzinzime wa Shukulu Kalunga wanjijundwile nakunjitwala mu cipango ca mbanja ca mukati, co kuje njamwene vumpau vwa Shukulu Kalunga vwashulisile Njuvo yendi.

⁶ Uje munalume wemanene kuyehi nange, co njazivile Shukulu Kalunga endeka kuli yange kutundilila mu Njuvo yendi ngwendi,

⁷ “Muna munu, eli likelyo litanda lyange. Njikakala kuno akati ka vanu va Isalele nakuvashwana ku myaka yoshe. Nameme vanu va Isalele nambe vimyene vavo vakashaula lalo lizina lyange lyakujela akulemesa vinjambi veka, nambe kutsinda vivimbi vya vimyene vavo mu mutambela uno.

⁸ Vimyene vatungile vipamba na vivuliko vya vinganda vyavo kushungama na vipamba na vivuliko vya Njuvo yange, ngeci civumbe lika catwangunwine akati ketu. Vashawile lizina lyange lyakujela akulinga vyuma vyoshe vya vunyengwe, cooni mu vukalu vwange njavanyongesele.

⁹ Ololo vanapande kulikela kulemesa vinjambi veka nakutundisa vivimbi va vimyene vavo. Nga valingamo, co yange njikakala akati kavo ku myaka yoshe.”

¹⁰ Co Shukulu Kalunga wendekele lalo ngwendi, “Muna munu, leka vanu va Isalele a Njuvo yange, vanapande kuyongola vutumbe vwayo. Vazivise shwamwa a vilinga vyavo vyavivi.

¹¹ Ngecivene, nga vanazivi shwamwa a vije vivanalingi, co vanungulwile vutumbe vwa Njuvo yange, cifwa cayo, na vukovelelo na vutuukilo vwayo, na seteko yayo, na muje muvanavwaeselamo vyuma vyoshe, na mashiko ayo oshe namukwendesa vipangi. Vasonekele vyoshe evi ngeci vamone vyuma vyoshe muvanavivwaeselamo, nakunyunga mashiko oshe.

¹² Eli likelyo lishiko lya Njuvo yange, mutambela woshe wa Njuvo yange uje uli akamwa ya munkinda unapu wakujela manene.”

Mutula

¹³ Evi vikevyo viseteko vya mutula, kupangesa seteko imo ngwe seteko ya Njuvo ya Shukulu Kalunga. Kuzengeleka citumbikilo coshe ca mutula, kwakele kapila ka masentimita makumi atanu mu kulova na masentimita makumi atanu mu vwihi, na luliva-liva lwa ku shongo ya anja lwapwile masentimita makumi avali na atanu mu vulaja.

¹⁴ Co mutambela wa kwisi ya mutula, kutunda akamwa ya vwimaneno, wapwile mita imolika mu vulaja vwa akamwa. Co mutambela ukwavo wapwile wa kunima kutunda ku shongo, co kuzengeleka kwoshe wapwile masentimita makumi atanu, co wapwile mamita avali mu vulaja vwa akamwa. Co mutambela wa kunima vawakele lalo kunima kutunda ku shongo kuzengeleka kwoshe wapwile masentimita makumi atanu.

¹⁵ Mutambela ou wa akamwa, aje akwenyekela vin̄ombelo, apwile mamita avali mu vulaja vwa akamwa. Co vyaku shongomoka vije vyakele mu vimbango viwana vyapwile vyavilaja manene kutuvakana akamwa oshe.

¹⁶ Akamwa ya mutula apwile seteko imolika nomu-nomu, yapwile mamita atanu na imo a mutambela na mutambela.

¹⁷ Mutambela wa akati wapwile seteko imolika nomu-nomu, wapwile mamita atanu na avali a mutambela na mutambela na luliva-liva lwa anja ku shongo lwapwile masentimita makumi avali na atanu mu vulaja vwa akamwa. (Co kapila kapwile masentimita makumi atanu mu vulaja.) Vindendelo vyakulondela a mutula vyakele mu ngangela.

Kujelesa mutula

¹⁸ Shukulu Kalunga wa Akamwa ya Vyoshe wendekele kuli yange ngwendi, “Muna munu, tolilila evi vinjikuleka. Omo vanatungu laja mutula, co unapande kuukundika akwenyekelao vin̄ombelo, nakushamwinao maninga a vimuna unakombelela.

¹⁹ Co vaka-kukombelela va ku muyati wa Levi, vaje vatunda kuli Zandoke vakevo lika vakaija ku mesho ange nakunjipangela. Yange Kalunga wa Akamwa ya Vyoshe, njashiki evi. Ukana vaka-kukombelela muna ngombe wa nkomba kupwa n̄ombelo ya a vuvi.

²⁰ Ukanonako maninga amo, co ukaakwita akamwa ya vyakushongomoka vije vili mu vimbango viwana vya mutula, na mu vimbango vya mutula, na mu vimbango vya mukati ka mutula, na ku shongo yawo yoshe. Mu ngila eyi vene, ukajelesa mutula nakuwambesa.

²¹ Ukambata muna ngombe wa nkomba uje vanakombelela kupwa n̄ombelo ya a vuvi, co ukamwenyekela a mutambela wakwangula anja ya Njuvo yange.

²² Co alikaki ukambata lijamba lya membe uje wakujeneka kapenga, co mukombelele kupwa n̄ombelo ya a vuvi. Jelesa mutula na maninga endi mu ngila imo vene ngwe muwalingile na ngombe wa nkomba.

²³ Omo unamanesa kulinga ngacije, ambata muna ngombe wa nkomba, na muna manga wa lijamba, voshe vakujeneka kapenga,

²⁴ vanene kuli yange. Vaka-kukombelela vakavakwita mwongwa, co vakavenyeka kupwa mulambu kuli yange.

²⁵ A litangwa na litangwa, a matangwa atanu na avali unapande kulambula membe, na ngombe wa nkomba, na manga wa lijamba kupwa n̄ombelo ya a vuvi. Voshe vanapande kupwa vakujeneka kapenga.

²⁶ A matangwa atanu na avali, vaka-kukombelela vakajelesa mutula, nakuuvwaesa ngeci vaupangese.

²⁷ Omo simano ineti, co vaka-kukombelela vakashangumuka kulambwila a mutula, milambu ya kwenyeka, na milambu ya vanu ya kulitombola. Asinoni njikavwaelela neni voshe. Munjinendeka yange Kalunga wa Akamwa ya Vyoshe.”