Ezekiyele 42 - Livulu lya Shukulu Kalunga

Vinjuvo vivali kuyehi na Njuvo ya Shukulu Kalunga

¹ Co uje munalume wanjitwalele mu cipango ca mbanja ya anja, nakunjitwamenena ku njuvo ya ku mutambela wa ku kunto wa Njuvo ya Shukulu Kalunga, kuyehi na njuvo ya ku shongo ya mu kangombe ka yambi ka Njuvo ya Shukulu Kalunga.

² Njuvo eyi yapwile mamita makumi atanu mu vulaja na mamita makumi avali na atanu mu vwihi.

³ Co mutambela wayo umo walishungamene na lyasa lya mamita likumi mu vwihi lije lyashwangesele Njuvo ya Shukulu Kalunga, co mutambela wayo ukwavo walishungamene na mwela wakushalama wa ku mbanja ya anja. Vaitungile mu mikana itatu yakushalama, co imo na imo yakele kulyala kunima kutuvakana imo ya kwisi yayo.

⁴ Co akushwangesa ku mutambela wa ku kunto wa njuvo eyi, kwakele ngila ya mukati ya mamita atanu mu vwihi mukushwangesako, na mamita makumi atanu mu vulaja, na vikolo ku mutambela uje.

⁵ Milili ya akamwa yapwile yakulishwata kutuvakana ije ya akati neyi ya kwisi, omwo vayakele kunima manene.

⁶ Milili itatu yoshe yakushalama yakele a vutenda, co kuvavikundikile ku vimanda ngwe vinjuvo vikwavo vya cipango ca mbanja.

⁷ Co kuje kwakele civumbe ca anja kumukulo wa milili, na kumukulo wa mbanja ya anja kulutwe lwa milili, co vulaja vwaco vwapwile mamita makumi avali na atanu na litambelo.

⁸ Omwo milili ije yakele anja ya mbanja yapwile mamita makumi atanu na litambelo mu vulaja, co kulutwe lwa Njuvo ya Shukulu Kalunga yapwile mamita makumi atatu na litambelo.

⁹ Kushongo ya milili ya kwisi kwakele cikolo ku mutambela wa mu kangombe ka yambi cakukovela mu cipango ca mbanja ya anja.

¹⁰ Ku mutambela wa mu mbwela wa Njuvo ya Shukulu Kalunga, kwakele vinjuvo vyakulifwa kuyehi na njuvo yaku shongo ya Njuvo ya Shukulu Kalunga mu kangombe ka yambi.

¹¹ Kulutwe lwa milili kwakele ngila ya mukati ngwe ije ya ku mutambela wa ku kunto. Yapwile ya seteko yakulifwa, na vutumbe vumolika, na vikolo vyakulifwa.

¹² Kwakele cikolo kwisi ya milili ku mutambela wa mu mbwela wa njuvo, ku shongo ya mutambela wa mu kangombe ka yambi.

¹³ Co uje munalume wendekele kuli yange ngwendi, “Vinjuvo vyoshe evi vivali vinapu vyakujela. Mukemwo vaka-kukombelela vaje vakakovela ku mesho a Shukulu Kalunga vakalilamo milambu yakujela manene. Omwo milili yapwa yakujela, co vaka-kukombelela vakakamo milambu yakujela, milambu ya vimbuto vya vinona, na vin̄ombelo vyakukombelela a vuvi, nambe vin̄ombelo vyakuliilwisila.

¹⁴ Omo vaka-kukombelela vali mu Njuvo ya Shukulu Kalunga, co vashaka kuya ku cipango ca mbanja ya anja, vanapande kuseza vuzalo vwakujela mu milili eyi vuje vanazalele oku vapangela Shukulu Kalunga. Co vanapande kuzala vuzalo vweka omo kanda vaye anja ku mutambela kuje kuvanakungulukila vanu.”

Seteko ya mutambela wa Njuvo ya Shukulu Kalunga

¹⁵ Omo uje munalume wamanesele kuseteka mutambela wa mukati ka Njuvo ya Shukulu Kalunga, co wanjitwalele anja kutuukila ku cikolo ca mu ngangela, asinoni wasetekele mutambela wa anja.

¹⁶ Wanonele citi cakusetekesa, co wasetekele mutambela wa mu ngangela, wapwile mamita 250.

¹⁷ Co wasetekele mutambela wa ku kunto, wapwile mamita 250.

¹⁸ Co wasetekele lalo mutambela wa mu mbwela, wapwile lalo mamita 250.

¹⁹ Asinoni watengulukilile ku mutambela wa mu kangombe ka yambi wausetekele, co wapwile mamita 250.

²⁰ Ngecivene, wasetekele mitambela yoshe iwana. Co kwakele civumbe cazengelekeleko, capwile mamita 250 mwoshe mu vwihi na mu vulaja, mukwangununa kuje kwakujela na kuje kwakujeneka kujela.