Ezekiyele 41 - Livulu lya Shukulu Kalunga

¹ Asinoni uje munalume wanjitwalele mu mulili wa mukati, Mwela Wakujela. Co wasetekele ngila yakuya mukati, co wapwile mamita atatu mu kulova,

² co mu vulaja yapwile mamita atanu, amo na vivumbe vya ku mutambela umo na umo vyapwile mamita avali na litambelo mu kuhima. Wasetekele mulili awo lika, wapwile mamita makumi avali mu vulaja, co mu vwihi wapwile mamita likumi.

³ Asinoni uje munalume waile ku mulili wa mukati-kati. Co wasetekele ngila yaile ku mulili uje, wapwile mita imo mu kulova, co mu vulaja vwawo wapwile mamita atatu, amo na vivumbe vya ku mutambela umo na umo vyapwile mamita atatu na litambelo mu kuhima.

⁴ Wasetekele mulili uje wakele ku shongo ya Mwela Wakujela, wapwile mamita likumi mwoshe nomu-nomu. Asinoni uje munalume wendekele kuli yange ngwendi, “Ou ukewo Mwela Wakujela Manene.”

Milili ivatungile ku vivumbe vya Njuvo ya Shukulu Kalunga

⁵ Uje munalume wasetekele civumbe ca mukati ka Njuvo ya Shukulu Kalunga, co capwile mamita atatu. Ku civumbe eci, kuzengeleka ku Njuvo ya Shukulu Kalunga, kwakele tumilili twatundondo twa mamita avali mu vulaja.

⁶ Milili eyi yakele mu mindando itatu. Co a mundando umo na umo akele milili makumi atatu. Milili eyi yakele na vikwateso vije vyazengelekele civumbe ca vinjuvo vya kumukulo, oloni vikwateso vije kuvavikwatesele ku civumbe ca Njuvo ya Shukulu Kalunga.

⁷ Ngecivene, vivumbe vya Njuvo ya Shukulu Kalunga, omo vaikengeselele anja, yasholokele cifwa cimolika ca kuhima kwayo kutunda kwisi kweta na akamwa. Kukikasana civumbe ca anja ya Njuvo ya Shukulu Kalunga, na anja ya milili, vatungilileko vindendelo vivali vyakama, ngeci capwile cacasi kutunda ku vinjuvo vya kwisi nakuya ku vije vyakele akati, nakweta ku vinjuvo vya akamwa.

⁸ Njamwene vwimaneno vwazengelekele Njuvo ya Shukulu Kalunga yoshe. Seteko yavwo yapwile mamita avali na litambelo mu vulaja.

⁹ Co civumbe ca anja ya milili ya kumukulo capwile mamita atatu.

¹⁰ Kwakele mutambela umo wakujanjavala wa mamita likumi wakikasanene kuzengeleka Njuvo ya Shukulu Kalunga mukati ka vivumbe na vinjuvo muje muvakele nakupangela vaka-kukombelela.

¹¹ Mapito a ku milili ya kumukulo yakengele ku mitambela ije yasaleleo, lipito limo lyakengele ku kunto, likwavo ku mbwela. Co mwela umo wakujanjavala wapwile mamita likumi.

Njuvo ya mu kangombe ka yambi

¹² Ku shongo-shongo ya mutambela wakujanjavala, mu kangombe ka yambi ku Njuvo ya Shukulu Kalunga, kwakele njuvo ya mamita makumi awana na atanu mu vulaja, co mu vwihi yapwile mamita makumi atatu na atanu, co vivumbe vyakwo vyapwile mamita avali na litambelo kuzengelekako.

Seteko yoshe ya Njuvo ya Shukulu Kalunga

¹³ Co uje munalume wasetekele anja ya Njuvo ya Shukulu Kalunga, co yapwile mamita makumi atanu mu vulaja. Co kunima ya Njuvo ya Shukulu Kalunga, kukikasana mutambela wakujanjavala ku shongo-shongo ya njuvo ije yakele mu kangombe ka yambi, co lyasa lije lyapwile lalo mamita makumi atanu.

¹⁴ Co lyasa lyakukikasana kulutwe lya Njuvo ya Shukulu Kalunga, amo na mutambela wakujanjavala ku mitambela yoshe noku-noku, lyapwile mamita makumi atanu.

¹⁵ Co wasetekele vulaja vwa Njuvo ya Shukulu Kalunga mu kangombe ka yambi, amo na mitambela yakuvatozola-vatozola ku mitambela yoshe noku-noku, yapwile lalo mamita makumi atanu. Mulili wa vukovelelo vwa Njuvo ya Shukulu Kalunga, na Mwela Wakujela, na Mwela Wakujela Manene,

Kulumbununa Njuvo ya Shukulu Kalunga

¹⁶ vyoshe vavipangesele na mamanya kutunda asi nakweta ku vinjanena. Vinjanena evi vyoshe vasele kuvifwika.

¹⁷ Co vivumbe vya mukati ka Njuvo ya Shukulu Kalunga, vije vyapwile vyavilaja kweta na akamwa ya mapito, vyoshe vyapwile vyakutaleka

¹⁸ na vimweso vya miti ya mashakavale na vakelumbi. Co miti ya mashakavale yakele akati ka kelumbi umo na umo ngeci vashungame mu mikana yoshe kuzengeleka mulili. Co kelumbi umo na umo wakele na vihanga vivali,

¹⁹ cihanga ca munu cije cakengele kulutwe lwa muti wa mashakavale ku mutambela umo, na cihanga ca ndumba cije cakengesele kulutwe lwa muti wa mashakavale ku mutambela ukwavo. Cafwile muje lika kuzengeleka civumbe coshe,

²⁰ kutunda asi kweta na akamwa ya mapito.

²¹ Vivuliko vya Mwela Wakujela vyapwile mumolika mwoshe nomu-nomu. Kulutwe lwakukovelela ku Mwela Wakujela Manene, kwakele cuma cimo cije cakulifwa ngwe

Mutula wa viti

²² mutula wa viti. Ukewo wapwile mamita avali na litambelo mu vulaja, na mita imo mu vwihi. Co vimanda vyawo vya mu vimbango, na nsina yawo, na mu mitambela yawo mwoshe vaupangele na viti. Co uje munalume wendekele kuli yange ngwendi, “Eyi ikeyo mesa ikakala ku mesho a Shukulu Kalunga.”

Mapito

²³ Kwakele lipito ku shongo ya ngila yakuya ku Mwela Wakujela, co kwakele lalo cikolo cikwavo ku shongo ya ngila yakuya ku Mwela Wakujela Manene.

²⁴ Apwile mapito avali aje alyangunukile mukati akuwashokolola.

²⁵ Co a mapito a mu Mwela Wakujela vatalekeleo vimweso vya miti ya mashakavale na vakelumbi, ngwe muje vene muvalingile a vivumbe. Co kwakele cifwiko ca viti anja ya cikolo cakuya ku mulili.

²⁶ Ku mitambela ya mulili ou kwakele vinjanena, co vivumbe vavitalekele na vimweso vya miti ya mashakaVaLe