Ezekiyele 40 - Livulu lya Shukulu Kalunga

CIMONA CA NJUVO YA SHUKULU KALUNGA IJE IKAIJA KULUTWE ( 40:1—48:35 ) Ezekiyele vamutwala ku Yelusalema

¹ Lyapwile litangwa lyamulikumi lya mwaka wauha, uje wapwile mwaka wamumakumi avali na itanu, omo vanatutwala laja ku vunzinda, na mwaka wamulikumi na iwana munima yakufungulula Yelusalema. A litangwa lije vene nzili ya Shukulu Kalunga yezile ali yange, co wanjitwalele ku Yelusalema.

² Mu cimona Njambi wanjitwalele ku lifuti lya Isalele, co wakanjakele a munkinda waulaja. Njamwene kulutwe lwange vinjuvo vyavingi vyasholokele kufwa ngwe nganda.

³ Wanjishwenyeseleko kuyehi manene, co njamwene munu uje wavyazimine ngwe vunengu. Wakwatele mukole wakusetekesa wa linyu, na citi cakusetekesa, co wemanene kuyehi na cikolo.

⁴ Co wendekele kuli yange ngwendi, “Muna munu, kengelela. Tolilila mwamuvwa, aka mbunge ku vyuma vyoshe vije vinjikumwesa, omwo evi vikevyo vivanakunenela kuno. Yove ukaleke vanu va Isalele vyuma vyoshe umona.”

Cikolo ca mu ngangela

⁵ Vije vinjamwene vyapwile Njuvo ya Shukulu Kalunga, co kuje kwakele civumbe cazengelekeleko. Uje munalume wambatele citi cendi cakusetekesa, cije capwile mamita atatu mu vulaja, co wasetekele civumbe. Cije civumbe capwile mamita atatu mu vulaja vwa akamwa na mamita atatu mu kuhima.

⁶ Asinoni waile ku cikolo cije cakukengesela mu ngangela. Walondelele a vindendelo kuya akamwa, co aje akamwa wasetekele mu vukovelelo, vwapwile mamita atatu kuya kwisi.

⁷ Kulutwe lwayo kwakele ngila ya mukati, ije yakele na milili itatu yakunyungila ku mutambela wayo umo na umo. Co mulili umo naumo wapwile wakupwa mumolika, wa mamita atatu ku mutambela umo na umo, vivumbe vyakele mukati kayo mwakele mamita avali na litambelo mu kuhima. Co kulutwe lwa milili yakunyungila kwakele ngila ya mukati mamita atatu mu vulaja, ije yakengesele ku mulili wakama uje wakengesele ku Njuvo ya Shukulu Kalunga.

⁸ Co wasetekele ou mulili,

⁹ wapwile mamita awana mu vulaja vwa kwisi. Ou mulili walingile mamaneselelo a cikolo cije cakele kuyehi na Njuvo ya Shukulu Kalunga, co ku shongo ya mulili ou, vivumbe vyapwile mita imolika mu kuhima.

¹⁰ (Eyi milili yakunyungila yakele ku mutambela umo na umo wa ngila ya mukati yapwile yakulifwa, na vivumbe vya mukati kayo vyapwile vyapwile mumolika mu kuhima.)

¹¹ Uje munalume wasetekele vwihi vwa ngila ya mukati ka cikolo. Yapwile mamita atanu na limo na litambelo lyoshe amolika, co lyasa lya mukati ka vikolo vyakushongomoka lyapwile mamita atanu.

¹² Kulutwe lwa milili yakunyungila ku umo na umo, kwakele civumbe cacihi ca masentimita makumi atanu mu vulaja vwa akamwa, na masentimita makumi atanu mu kuhima. (Co milili yapwile mamita atatu akulifwa.)

¹³ Asinoni wasetekele lyasa kutunda ku civumbe ca kunima ya mulili umo, kutwala ku civumbe ca kunima ya mulili wakukikasana na ngila ya mukati, co lyapwile mamita likumi na avali na litambelo.

¹⁴ Co mulili wa ku shongo-shongo wakengesele ku cipango ca mbanja. Wasetekele uje mulili, nakuwana ngeci wapwile mamita likumi mu vwihi.

¹⁵ Vulaja vwoshe vwa ngila ya mukati kutunda ku civumbe ca anja ya cikolo nakweta ku mutambela wa mulili wakumaneselelako wapwile mamita makumi avali na atanu.

¹⁶ Kwakele vimbengwa vyavindondo mu vivumbe vya anja vya ku milili yoshe na mu vivumbe vya mukati ka milili a vivumbe vya mukati vije vyalishungamene na ngila ya mukati vatalekeleo vimweso vya miti ya mashakaVaLe

Cipango ca mbanja ya anja

¹⁷ Co uje munalume wanjitwalele nakutuvakana mu ngila ya cikolo nakweta ku cipango ca mbanja. Kwakele milili makumi atatu yakutungila ku vivumbe vya anja, co kulutwe lwayo kwakele mutambela wakujala mamanya,

¹⁸ uje wajanjavalele nakuzenguluka ku cipango ca mbanja. Eci Cipango ca mbanja ya anja cakele akunyekama kutuvakana cipango ca mbanja ya mukati.

¹⁹ Kwakele cikolo a mutambela wakulunduka cije cakengesele ku cipango ca mbanja ya mukati. Co uje munalume wasetekele lyasa lya mukati ka vikolo vivali, yapwile mamita makumi atanu.

Cikolo ca ku kunto

²⁰ Asinoni uje munalume wasetekele vulaja na vwihi vwa cikolo cije cakengesele ku cipango ca mbanja ya anja.

²¹ Co milili yakunyungila itatu ije yakele ku mutambela umo na umo wa ku ngila ya mukati, na vivumbe vya mukati kavyo, na mulili wakama, vyoshe vyapwile seteko yakulifwa ngwe vije vya ku ngila ya cikolo ca mu ngangela. Vulaja vwoshe vwa cikolo vwapwile mamita makumi avali na atanu, na mamita likumi na avali na litambelo mu vwihi.

²² Co mulili wakama na vinjanena na vivumbe vyakutaleka vimweso vya miti ya mashakavale vyalifwile ngwe vije vya ku cikolo ca mu ngangela. Kuje lalo vindendelo vitanu na vivali vyakengesele ku cikolo, co mulili wakama wakele ku shongo kulishungama na cipango ca mbanja.

²³ Kukikasana cipango ca mbanja kutunda ku cikolo ca ku kunto, kwakele cikolo cikwavo cakukengesela ku cipango ca mbanja ya mukati ngwe cije cakele ku mutambela wa mu ngangela. Co uje munalume wasetekele lyasa lya mukati ka vije vikolo vivali, co vyapwile mamita makumi atanu.

Cikolo ca mu mbwela

²⁴ Asinoni uje munalume wanjitwalele ku mutambela wa mu mbwela, co kuje twamwene cikolo cikwavo. Wacisetekele, co capwile mumo ngwe vije vikwavo.

²⁵ Mwakele vinjanena mu milili ya cikolo eci, mumolika ngwe vije vikolo vikwavo. Vulaja vwoshe vwa cikolo vwapwile mamita makumi avali na atanu, co vwihi vwapwile mamita likumi na avali na litambelo.

²⁶ Co vindendelo vitanu na vivali vyakengesele kuje, na mulili wayo wakama wakele lalo ku shongo kushungama na cipango ca mbanja. Kuje kwakele vivumbe vya mukati vyakutaleka vimweso vya miti ya mashakavale vije vyalishungamene na cikolo.

²⁷ Kuno lalo kwakele cikolo cije cakengesele ku cipango ca mbanja ya mukati. Co uje munalume wasetekele lyasa lya cikolo eci camucivali, co capwile mamita makumi atanu.

Cipango ca mbanja ya mukati, cikolo ca mu mbwela

²⁸ Co uje munalume wanjitwalele nakunjiitisa mu cikolo ca mu mbwela nakweta ku cipango ku mbanja ya mukati. Wasetekele cikolo, co capwile seteko imo ngwe vikwavo.

²⁹ Milili yamwo yakunyungila, na mulili wamwo wakama na vivumbe vya mukati kayo vyapwile mumo ngwe vije vya ku vikolo vikwavo. Co kwakele vinjanena lalo ku milili ya ku cikolo cije.

³⁰ Co vulaja vwayo vwoshe vwapwile mamita makumi avali na atanu, co vwihi vwoshe vwapwile mamita likumi na avali na litambelo.

³¹ Mulili wayo wakama wakengesele ku cipango ca mbanja ikwavo, co vivumbe vyakushwangesa na cikolo, vavitalekele na vimweso vya miti ya mashakaVaLe Vindendelo vitanu na vitatu vyakengesele ku cikolo eci.

Cipango ca mbanja ya mukati, cikolo ca mu ngangela

³² Asinoni uje munalume wanjitwalele nakunjiitisa mu cikolo ca mu ngangela nakweta ku cipango ca mbanja ya mukati. Co wasetekele cikolo, capwile seteko imo ngwe vikwavo.

³³ Milili yamwo yakunyungila na mulili wakama, na vivumbe vya mukati kayo vyapwile mumo ngwe vije vya ku vikolo vikwavo, co kwakele vinjanena vyazengelekele kwoshe, na mu mulili wakama lalo. Vulaja vwayo vwoshe vwapwile mamita makumi avali na atanu, co vwihi vwoshe vwapwile mamita likumi na avali na litambelo.

³⁴ Mulili ukwavo wakama mwakukovelela walishungamene na cipango ca mbanja ya anja. Co miti ya mashakavale vaitalekele a vivumbe kushwangesa mumo na ngila ya ku cikolo. Vindendelo vitanu na vitatu vyakengesele ku cikolo cije.

Cipango ca mbanja ya mukati, cikolo ca ku kunto

³⁵ Asinoni uje munalume wanjitwalele ku cikolo ca ku kunto. Wasetekele, co capwile mumolika na vikwavo.

³⁶ Ngeci mwa vikwavo, naco lalo cakele na milili yakunyungila, na vivumbe vya mukati vyakutaleka, na mulili wakama, na vinjanena vije vyazengelekele kwoshe. Vulaja vwayo vwoshe vwapwile mamita makumi avali na atanu, co vwihi vwapwile mamita likumi na avali na litambelo.

³⁷ Co mulili wakama wakengesele ku cipango ca mbanja ya anja. Co vivumbe kushwangesa na cikolo, vavitalekele na vimweso vya miti ya mashakaVaLe Vindendelo vitanu na vitatu vyakengesele ku cikolo eci.

Vinjuvo vya kuyehi na cikolo ca ku kunto

³⁸ Muje mu cipango ca mbanja ya anja kwakele mulili wakele kuyehi na cikolo ca mukati ku mutambela wa ku kunto. Cikolo eci cakovelele mu mulili wakama uje wakengesele ku cipango ca mbanja kuje kuvakele nakukushila tusitu va n̄ombelo ya kwenyeka.

³⁹ Mu mulili ou wakama mwakele vimesa viwana, vivali ku mutambela umo na umo wa mulili. A vimesa vije vene akeo vakele nakutsiila vimuna vakukombelela vin̄ombelo nambe vakwenyeka voshe vamutunu, nambe vakukombelela a vuvi, nameme va vin̄ombelo vyakuliilwisila.

⁴⁰ Co anja ya uje mulili kwakele vimesa viwana vyakulifwa, vivali ku mutambela wa vukovelelo vwa cikolo ca ku kunto.

⁴¹ Vyoshe amolika vyapwile vimesa vitanu na vitatu aje vakele nakutsiila vimuna vakukombelela, viwana mukati ka mulili, co viwana lalo anja mu cipango ca mbanja.

⁴² Vije vimesa viwana vyakulyata, vyakele muje mu mulili vapangesele mukuvwaesela n̄ombelo ya kwenyeka yoshe, vyapwile vya mamanya akutavozola. Vyapwile masentimita makumi atanu mu vulaja vwa akamwa, co akamwa yavyo vyapwile masentimita makumi atanu na avali na atanu akupwa mumo. Vyakupangesa vyoshe vije vapangesele mukutsiya vimuna vakukombelela, vakele nakuvyaka a vimesa.

⁴³ Co vulaja vwa tulovo twakulyeteka noku-noku ngwe mu vwihi vwa livoko, twa mamilimita makumi atanu na avali twazengelekele kumukulo wa mesa imo na imo. Situ yoshe vakele nakukombelela vayakele aje a vimesa.

⁴⁴ Asinoni wanjinenele mukati ka cipango ca mbanja. Co kuje kwakele milili ivali yakukengesela mukati ka cipango ca mbanja, umo wakengesele ku mutambela wa mu mbwela ku cikolo ca ku kunto, co ukwavo wakengesele ku mutambela wa ku kunto ku cikolo ca mu mbwela.

⁴⁵ Co uje munalume wanjilekele ngwendi uje mulili wakengesele mu mbwela wapwile wa vaka-kukombelela vaje vapangele mu Njuvo ya Shukulu Kalunga,

⁴⁶ co uje mulili wakengesele ku kunto wapwile wa vaka-kukombelela vaje vapangele ku mutula. Vaka-kukombelela vakutunda ku naanga ya Zandoke, vapwa muyati wa Levi lika, vaje vavanatavesa kupangela Shukulu Kalunga.

Cipango ca mbanja ya mukati na Njuvo ya Shukulu Kalunga

⁴⁷ Co uje munalume wasetekele mukati ka cipango ca mbanja, co capwile mamita makumi atanu akupwa mumo mwoshe nomu-nomu. Njuvo ya Shukulu Kalunga yakele ku mutambela wa mu kangombe ka yambi, co kulutwe lwayo kwakele mutula.

⁴⁸ Asinoni wanjitwalele ku mulili wakama wa Njuvo ya Shukulu Kalunga. Wasetekele mu cikolo, co capwile mamita avali na litambelo mu vulaja vwa kwisi, na mamita atanu na avali mu vukama vwayo, na vivumbe kuhima kwavyo vyapwile mita imo na litambelo ku mutambela na mutambela.

⁴⁹ Co vindendelo vyalondele ku vukovelelo vwa mulili, wapwile mamita likumi mu vulaja, na mamita atanu na imo mu vwihi. Co kwakele vimanda vivali, imo na imo ku mutambela wa vukovelelo.