Ezekiyele 4 - Livulu lya Shukulu Kalunga

Ezekiyele alinga vimweso vyakufungulula Yelusalema

¹ Njambi wendekele ngwendi, “Muna munu, nona ndopi, nakuyaka kulutwe lwove, co sonekao cimweso ca nganda ya Yelusalema.

² Asinoni linga vingunja na mikinya na vilombo na vyuma vimo vyakulikwasesa kuwisa civumbe omo valwisa Yelusalema.

³ Nona cikango ca cikuvo citumbike ngwe civumbe mukati kove na nganda. Kenga ku nganda. Nganda valinakuyilwisa, yove ulinakuyilwisa. Eci cikapwa cimweso ku muyati wa Isalele.

⁴ “Lala asi ku mutambela wa livoko lyove lya cimoshwe, co yange njikakwana mulonga wa muyati wa Isalele. Co ukalala kuje nakwambata cihiso

⁵ ca vuvi vwa Isalele matangwa akupwa 390, litangwa limo a mwaka umo na umo wakuvanyanyamesa noo cihiso cikahwa.

⁶ Omo unamanesa kulalela ku cimoshwe, co tengulukila ku mutambela wa livoko lyove lya cilyo, nakwambata lalo cihiso ca Yunda a matangwa makumi awana, litangwa limo a mwaka umo na umo wakuvanyanyamesa.

⁷ “Kenga mesho ove ku Yelusalema ivanazengeleka. Co linga n̄ome livoko lyove nakwambulula vuka-kwimanena vwakulwisa nganda eyi.

⁸ Njikakukuta ngeci kesi utenguluke noku-noku noo matangwa akuzengeleka Yelusalema anahu.

⁹ “Nona tiliku, na mbale ya maumwa, na makunde, na vipoke, na mashangu, na luku. Vikumbasane vyoshe amolika ulinge likende. Evi vikevyo vyuukalya a matangwa 390, aje aukalala lika ku mutambela wa livoko lyove lya cimoshwe.

¹⁰ A litangwa na litangwa vakakutavesa lika kulya likende lyakupwa mu mangilamu 230, noo alikaki.

¹¹ Co ukanwa mema amandondo, a litangwa vinganja vivali lika.

¹² Ukalya makende a vunga vwa tiliku akwoca a vufwati vwakuma vwa vanu, co ukaalila kuje vene oku vanu voshe vanakukenge.”

¹³ Shukulu Kalunga wendekele ngwendi, “Eci cinemanena muje muvakalilamo vaIsalele vyakulya vije vyakujeneka kujela ngwe ku Lishiko lya Mosesa, omo njikavashandwela ku mafuti eka.”

¹⁴ Oloni njakumbulwile ngwange, “Embwe, Shukulu Kalunga wa Akamwa ya Vyoshe! Yange kunjalijwalesele. Tunde ku vwanike vwange, kunjalile situ ya kasitu wakulitsila nambe wakuliwa ku cikashama. Kunjalile vyakulya vyakujwala.”

¹⁵ Ngecivene, Njambi wendekele ngwendi, “Mwamuvwa manene. Njikakutava upangese tuzi twa vingombe, co ukocao makende ove.”

¹⁶ Co wendekele ngwendi, “Muna munu, njitepulula ku makende a Yelusalema. Vanu va mu Yelusalema vakapeselesa vyakulya vije vakalya na mema aje vakanwa.

¹⁷ Vakajeneka makende na mema, vakatumbama ngoco, co vakanyonga mu vuvi vwavo.”