Ezekiyele 39 - Livulu lya Shukulu Kalunga

Ngonge vamufungulula

¹ Shukulu Kalunga wa Akamwa ya Vyoshe wendekele kuli yange ngwendi, “Muna munu, ambulwila Ngonge, muka-kushwana wakama wa miyati ya Meshake na Tuvale, muleke ngwove yange nji citozi cendi.

² Njikamutengulwila ku mutambela weka, nakumutwamenena kulyala kutunda ku kunto noo aketa ku minkinda ya Isalele.

³ Asinoni njikapokola vuta vwendi vwa lusipa vuli mu livoko lyendi lya cimoshwe nakuwisa mikili yendi ili mu livoko lyendi lya cilyo.

⁴ Ngonge na mashwalale vendi na vasamba vendi vakatsila a minkinda ya Isalele, co mivila yavo ikapwa vyakulya vya tuzila voshe na tusitu.

⁵ Vakevo vakatsila mushandangala yangoco. Munjinendeka yange Kalunga wa Akamwa ya Vyoshe.

⁶ Njikashwameka tuhya mu lifuti lya Mangonge, na ku vikuma vyoshe kuje vanu valinakukala mu kwoloka, co munu woshe akazivuka ngeci yange njapwa Kalunga.

⁷ Njikatsimanesa lizina lyange ku vanu vange va Isalele, co kunjikatava ngeci lizina lyange lyakujela lishauke. Asinoni miyati vakazivuka ngeci yange Kalunga, njapwa Njambi wakujela wa Isalele.”

⁸ Shukulu Kalunga wa Akamwa ya Vyoshe wendekele ngwendi, “Litangwa lije linjendekele mwa vushunga likaija.

⁹ Vanu vaje vali mu vinganda vya Isalele vakaya nakukungulula vitwa vije vyakuseza mwangoco, co vakavipwisa vitale. Co vakavweka tuhya twa vintelo, na mata a lusipa, na mikili, na makunga, na milamu, vakavivwekesa tuhya a myaka itanu na ivali.

¹⁰ Kuvakacava lalo vitale mu mahya, nambe kushinja miti mu shwata, omwo vakevo vakakala na vitwa vyakuseza mwangoco vyavingi vyakwota. Co vakapukula nakwivila vaje vavapukwilile nakuvevila. Munjinendeka yange Kalunga wa Akamwa ya Vyoshe.”

Ngonge vamutsinda

¹¹ Shukulu Kalunga wendekele ngwendi, “Omo vyoshe evi vikalingiwa, njikana Ngonge livu lyakumutsinda mu Isalele, mu Cimbongo ca Vaka-kwenda, mu ngangela ya ku Lishali lya Kutsa. Ngonge na mashwalale vendi voshe vakavatsinda kuje, co cimbongo cije vakacitumbula ngwavo, ‘Cimbongo ca Mashwalale va Ngonge.’

¹² Vanu va Isalele vakatsinda vivimbi evi vingonde vitanu na vivali, ngeci vajelese lifuti.

¹³ Munu woshe uje wakala mu lifuti eli akakwasa mukutsinda, co vakavasingimika a cuma eci a litangwa lyange lyakuhyana. Munjinendeka yange Kalunga wa Akamwa ya Vyoshe.

¹⁴ Omo vingonde vitanu na vivali vineti, vakaangula vanu vakaitangane mukati ka lifuti ngeci vawane mivila ije yasaleleo ngeci vaitsinde, ngeci vajelese mu lifuti.

¹⁵ Omo vaje vaka-kwitangana mu lifuti vaitangana, nga vamona vitsiya vya vanu, co vaakao cimweso ngeci vaka-kutsinda vaije nakutsinda vije vitsiya mu Cimbongo ca Mashwalale va Ngonge.

¹⁶ (Kukakala nganda kuyehi ivakaluka lizina lya mashwalale.) Ngecivene, lifuti vakalijelesa lalo.”

¹⁷ Shukulu Kalunga wa Akamwa ya Vyoshe wendekele kuli yange ngwendi, “Muna munu, sana tuzila voshe na tusitu voshe va mu shwata vakutunda ku mitambela yoshe vakunguluke nakulya n̄ombelo eyi injavavwaesela. Cikapwa ciwano cakama a minkinda ya Isalele, ngeci vakalye situ nakunwa maninga.

¹⁸ Vakalya situ ya mashwalale nakunwa maninga a vaka-kushwana va ano asi, voshe vakavatsiya ngwe majamba a vimanga, nambe ngwe vana va vimanga, nambe ngwe vimembe, nambe ngwe vingombe vakununa.

¹⁹ Omo njikatsiya vanu ava kupwa n̄ombelo, co tuzila na tusitu vakalya situ ngwe muvanasela, co vakanwa maninga noo vanapwisamo.

²⁰ Vakalya ku mesa yange ngwe muvanasela, vakalya tuvalu na vaka-kulondao na mashwalale, na vanalume vaka-kulwa. Munjinendeka yange Kalunga wa Akamwa ya Vyoshe.”

Kwiluka kwa Isalele

²¹ Shukulu Kalunga wendekele ngwendi, “Njikamwesa vumpau vwange ku miyati yoshe munjikapangeselamo nzili yange omo njivanyanyamesa.

²² VaIsalele vakazivuka simbu yoshe ngeci yange njapwa Kalunga Njambi yavo.

²³ Co miyati vakazivuka ngeci vaIsalele vaile mu vunzinda omwo vuvi vuje vuvavulumwine kuli yange. Yange njavakengesele nima, co njatavele vitozi vavo ngeci vavafungulule nakuvatsiila mu nzita.

²⁴ Njavanene vije vivashakele omwo mazilo avo na kupenga-penga kwavo, co njavakengesele nima.”

²⁵ Shukulu Kalunga wa Akamwa ya Vyoshe wendekele ngwendi, “Ololo njikazivila mema ku mbunge vatekulwila va Yakomba, vanu va Isalele, co vakavezika lalo. Njikanyunga lizina lyange lyakujela.

²⁶ Co omo vakatumbama kuluu mu lifuti lyavo, muje naumo wai akavazivisa lyova, co vakevala shwamwa na kupenga-penga kuje kuvalingile kuli yange.

²⁷ Mukumwesa miyati yaingi ngeci yange njapwa wakujela, njikanena vanu vange kuvatundisa ku mafuti oshe kuje kuvakala vitozi vavo.

²⁸ Asinoni vanu vange vakazivuka ngeci yange njapwa Kalunga Njambi yavo. Vakazivuka cuma eci omwo yange njavatwalele ku vunzinda, co ololo njikavakungulula nakuvelwisila mu lifuti lyavo vavenya, naumo wai wa ali vakevo akasala munima.

²⁹ Njikamwanyena munzinzime wange ali vanu va Isalele, co kuukatundu lalo ali vakevo. Munjinendeka yange Kalunga wa Akamwa ya Vyoshe.”