Ezekiyele 38 - Livulu lya Shukulu Kalunga

Ngonge yapwile cipangeso ca Njambi

¹ Shukulu Kalunga wendekele kuli yange ngwendi,

² “Muna munu, ambulwila Ngonge, ikeye muka-kushwana wakama wa miyati ya Meshake na Tuvale mu lifuti lya Mangonge. Mwambulwile,

³ co muleke ngwove yange Kalunga wa Akamwa ya Vyoshe, njinapu nji citozi cendi.

⁴ Yange njikamutengulula, nakumwaka tulovo mu vimbange vyendi, nakumukokangeya nakumutwala kulyala amo na vanu vendi voshe. Mashwalale vendi, amo na tuvalu twavo, na vaka-kulondao vaje vaka-kuzala vuzalo vwakulifwa, vanapu vavangi, co lishwalale woshe nambata ntelo nakulilemeka mukwale.

⁵ Vanalume vakutunda ku Pelesha, na Sundane, na Limbiya vali amo nendi, co voshe vali na vintelo na vitepa.

⁶ Vanalume voshe vaka-kulwa va ku mafuti a Ngomele na Mbete Tongalama vaje vali ku kunto vali amo nendi, na vanalume va ku miyati yeka.

⁷ Muleke alivwaesele, co ashike mashwalale vendi voshe valivwaesele.

⁸ Omo myaka yaingi ineti njikamushika kukovela mu lifuti muje muvelwisilile vanu kutunda ku miyati yaingi, kuje vakele nakuyoyelako kujeneka lyova lya nzita. Co akakovelela minkinda ya Isalele, ije yapwile vingundu ivasezele simbu yakama, oloni kuje ololo vanu voshe valinakukala mwamuvwa.

⁹ Ikeye na mashwalale vendi na miyati yaingi vaje vali amo nendi vakalwa ngwe kankumba, co vakafwika lifuti ngwe lishelwa.”

¹⁰ Evi vikevyo vyalinakwendeka Shukulu Kalunga wa Akamwa ya Vyoshe kuli Ngonge ngwendi, “Omo simbu ije ikaija, co ukashangumuka kutumba vutumbe vwavuvi.

¹¹ Ukayongola kukovelela lifuti lije lyakuzeya muje vanu vamwo vakala mu kwoloka, mu vinganda kuvyesi na vivumbe vyakuvavingilikiya.

¹² Ukapukula nakwivila vanu vaje vakala mu vinganda vije vyapwile vingundu laja. Vakevo vavakungulwile ku miyati, co ololo vali na vimuna na vufuko, valinakukala ku nginga ya lifuti.

¹³ Vanu va ku Shemba, na Ndendane, na vaka-kulandulula va mu vinganda vya Sipeini vakakwihula ngwavo, ‘Unakungulula laja mashwalale vove nakulwa mukupukula ndi? Ushaka kwambata siliva na ngolinde, na vimuna na vufuko, ngeci uye navyo vyoshe ndi?’ ”

¹⁴ Ngecivene, Shukulu Kalunga wa Akamwa ya Vyoshe wanjitumine kuleka Ngonge vije vyendekele kuli ikeye ngwendi, “Ololo omo vanu vange va Isalele vali mu kwoloka, yove ukakatuka,

¹⁵ kutunda ku mutambela wove kulyala ku kunto. Yove ukatwamenena mashwalale vakama va nzili, vakutunda ku miyati yaingi, voshe vakalonda a tuvalu.

¹⁶ Ukalwisa vanu vange va Isalele ngwe kankumba kafwika lifuti. Omo simbu ikaija, njikakutuma ukakovelele lifuti lyange ngeci miyati vakanjizivuke, mukumwesa kujela kwange a vije vinjilinga muli yove.

¹⁷ Yove vene uje njatumbwile ku san̄ulu, omo njambulwile muli vangamba vange vaka-kwimanena va mu Isalele, ngwange ku matangwa aje akaija kulutwe, njikanena munu umo akulwise Isalele.” Munjinendeka yange Kalunga wa Akamwa ya Vyoshe.

Cihiso ca Njambi a lifuti lya Ngonge

¹⁸ Shukulu Kalunga wa Akamwa ya Vyoshe alinakwendeka ngwendi, “A litangwa lije omo Ngonge akakovelela Isalele, yange njikaluvala manene.

¹⁹ Yange njendeka mu vukalu vwange ngwange a litangwa lije kukakala mandunduma akama manene mu lifuti lya Isalele.

²⁰ Isi woshe na kazila woshe, na kasitu woshe wakama nou wamundondo, na munu woshe ali ano asi vakalijajela omwo lyova lyange. Minkinda ikawa, mamanya amalaja akatavozoka, co vivumbe vyoshe vikalundumukila asi.

²¹ Njikazivisa lyova Ngonge na tuyando twatukalu. Munjinendeka yange Kalunga wa Akamwa ya Vyoshe. Vanu vendi vakalitengulukila umo na mukwavo nakulilwisa vakevo vavenya na mikwale yavo.

²² Njikahisa Ngonge na mushongo wakulitambwisa na kutsa. Co njikanyokesa nyonzi ya mingole na nyonzi ya mamanya, amolika na tuhya na sulufa, co aketikila ali ikeye na a mashwalale vendi, na a miyati yaingi vaje vali ku mutambela wendi.

²³ Mu ngila eyi njikamwesa miyati yoshe ngeci yange njapwa nji wakama, co njapwa wakujela. Asinoni vakazivuka ngeci yange njapwa Kalunga.”