Ezekiyele 37 - Livulu lya Shukulu Kalunga

Cimbongo ca vitsiya vyakuma

¹ Nzili ya Shukulu Kalunga yezile ali yange, co Munzinzime wendi wanjitwalele ku cimbongo cije cashulile na vitsiya.

² Co wanjitisile nakunjitengulwisa mu cimbongo, co njamwene ngeci vije vitsiya vyapwile vyavingi manene, vyapwile vyakuminina manene cau.

³ Asinoni Shukulu Kalunga wanjihwile ngwendi, “Muna munu, vitsiya evi vyasa kuyoya lalo ndi?” Co njakumbulwile ngwange, “Yove Shukulu Kalunga wa Akamwa ya Vyoshe, yove lika uzivuka evi!”

⁴ Co wendekele ngwendi, “Ambulula vuka-kwimanena ku vitsiya. Leka vitsiya evi vyakuma kutolilila ku lijwi lya Shukulu Kalunga.

⁵ Vileke vije yange Kalunga njendeka kuli vikevyo ngwove, ‘Yange Kalunga wa Akamwa ya Vyoshe, njikashokwela muku muli yeni, co mukakala na mwonyo.

⁶ Njikamyaka mishisha na mishuni, co njikamifwika na cikonde. Njikashokwela muku muli yeni, co mukakala na mwonyo. Asinoni mukazivuka ngeci yange njapwa Kalunga.’ ”

⁷ Ngecivene, njambulwile vuka-kwimanena ngwe muje muvanjilekele. Omo njakele nakwambulula vuka-kwimanena, vwasi-vwasi njazivile muyoyo ngwenjenge-ngwenjenge, co vitsiya vyashangumukile kulinungasana amolika.

⁸ Omo njakengele, njamwene vitsiya vyashangumukile kulifwika na mishisha na mishuni, asinoni cikonde cavifwikile akamwa. Oloni mu mivila yavyo kumwakele mwonyo.

⁹ Njambi wendekele kuli yange ngwendi, “Muna munu, ambulula vuka-kwimanena ku lihunzi. Leka lihunzi ngwove, Shukulu Kalunga wa Akamwa ya Vyoshe nashiki lihunzi litunde ku mitambela yoshe iwana, ngeci lishokwele muku mu mivila eyi ya kutsa, ngeci ikale na mwonyo.”

¹⁰ Ngecivene, njambulwile vuka-kwimanena ngwe muvanjishikile. Co mwonyo wakovelele mu mivila, co vakele na mwonyo vemanene. Vapwile vavangi manene mukupwa mbunga ya mashwalale.

¹¹ Njambi wendekele kuli yange ngwendi, “Muna munu, vanu va Isalele vanafu ngwe vitsiya evi. Vakevo vendeka ngwavo vanapu vitsiya vyakuminina cau, cinyangavili cavo cinahu, co vananyongo.

¹² Ngecivene, ambulula vuka-kwimanena kuli vanu vange va Isalele valeke ngwove yange Kalunga wa Akamwa ya Vyoshe, njikashokolola vimbumbo vyavo. Njikavatundisamo, nakuvelwisa mu lifuti lya Isalele.

¹³ Omo njikashokolola vimbumbo muje muvatsindile vanu vange, nakuvatundisamo, co vakazivuka ngeci yange njapwa Kalunga.

¹⁴ Yange njikaka muku wange muli vakevo, co vakayoya nakukala mu lifuti lyavo vene. Asinoni vakazivuka ngeci yange njapwa Kalunga. Yange njakulaesa ngwange njikalinga vyuma evi, co njikalingamo vene. Munjinendeka yange Kalunga.”

Yunda na Isalele mu vumwene vumo

¹⁵ Shukulu Kalunga wendekele kuli yange lalo ngwendi,

¹⁶ “Muna munu, nona citi, co sonekao ngwove, ‘Vumwene vwa Yunda.’ Co nona citi cikwavo, co sonekao ngwove, ‘Vumwene vwa Isalele.’

¹⁷ Asinoni nungasana vishongo vyoshe vya viti vivali mu livoko lyove vipwe ngwe citi cimolika.

¹⁸ Omo vanu vove vakakwihula ngwavo uvaleke mucinalumbunukila cuma eci,

¹⁹ co valeke ngwove yange Kalunga wa Akamwa ya Vyoshe, njikambata citi cije cinemanena Isalele, co njikacambata amo na citi cije cinemanena Yunda. Co viti vyoshe evi vivali njikavipwisa citi cimo, co njikacikwata mu livoko lyange.

²⁰ “Kwata viti vyoshe vivali mu livoko lyove, ngeci vanu vavimone.

²¹ Asinoni valeke ngwove yange Kalunga wa Akamwa ya Vyoshe, njikatundisa vanu vange voshe akati ka miyati kuje vaile, njikavakungulwila amolika, co njikavelwisila ku lifuti lyavo vavenya.

²² Yange njikavapwisa muyati umolika mu lifuti, a minkinda ya Isalele. Vakakala na mwene umolika ikeye akavashwana mu vumwene vuvali.

²³ Kuvakalijwalesa lalo na tumponya twa vunyengwe, nambe kuliviisa na vuvi. Njikavapatula ku vingila vyavo vyoshe vivakalingila vuvi nakunjenda vungungu. Njikavajelesa, co vakapwa vanu vange, nange njikapwa Njambi yavo.

²⁴ Ngamba yange Ndaviti ikeye akapwa mwene yavo. Voshe vakakala na muka-kwimanena umolika, co vakononoka mashiko ange nakuwanyunga.

²⁵ Vakakala mu lifuti lije linjanene kuli ngamba yange Yakomba, mu lifuti lije muvakele vakukulwila vavo. Vakakala muje myaka yoshe, ngecivene, vana vavo na vatekulwila vavo voshe vakakala muje myaka yoshe. Ngamba yange Ndaviti ikeye akavashwana myaka yoshe.

²⁶ Njikalikumiiya navo cikumiiyo ca kwoloka cije ca ku myaka yoshe. Njikavakolesa, co vakapwa vavangi, co njikaka Njuvo yange mu lifuti lyavo, mukemwo muyikakala ku myaka yoshe.

²⁷ Njikakala muje amo navo nakupwa Njambi yavo, co na vakevo vakapwa vanu vange.

²⁸ Omo njikaka Njuvo yange muje nakukala akati kavo ku myaka yoshe, asinoni miyati vakazivuka ngeci yange Kalunga, njinaangula vaIsalele kupwa vanu vange vene.”