Ezekiyele 36 - Livulu lya Shukulu Kalunga

Vivezikiso vya Njambi ali Isalele

¹ Shukulu Kalunga wendekele ngwendi, “Muna munu, endeka ku minkinda ya Isalele, valeke vatolilile ku majwi aje yange,

² Kalunga wa Akamwa ya Vyoshe, njilinawo ali vakevo ngwange, ‘Vitozi va Isalele vashendumwine nakwendeka ngwavo malundu aje amalaja a ku san̄ulu anapu avo!’

³ “Ngecivene, ambulula vuka-kwimanena vwa vije vinjendeka yange Kalunga wa Akamwa ya Vyoshe. Omo mafuti akulyata vafungulwile nakupukula minkinda ya Isalele, co voshe vashendumwine Isalele.

⁴ Ngecivene, ololo tolilileni ku vije yange Kalunga wa Akamwa ya Vyoshe, njendeka kuli yeni minkinda na malundu, na kuli yeni vana va vindonga na vimbongo, na kuli yeni mitambela ije ivasezele mu vingundu, na kuli yeni vinganda vije vinasala mwangoco vije vivapukwile nakushendumuna ku miyati yoshe ya vanu vaje vazengelekeleko.

⁵ “Yange Kalunga wa Akamwa ya Vyoshe, njinendeka na vukalu vwange vwakulwisa miyati yavazengeleka, vunene kulwisa Endome. Mukuvwaelela na mu kashaundu kavo, vafungulwile lifuti lyange nakutambula mutambela wa vulilo vwa vimuna vange.

⁶ “Ngecivene, ambulula vuka-kwimanena ku lifuti lya Isalele, leka minkinda na malundu, na vana va vindonga, na vimbongo, vije yange Kalunga wa Akamwa ya Vyoshe, njilinakwendeka na lifuwa lya vukalu, omwo a ngila ije miyati vamishawile nakumizivisa shwamwa.

⁷ Yange Kalunga wa Akamwa ya Vyoshe, njilinakulisinga na cikulaeso ngwange miyati yoshe vaje vanamizengeleka vakavazivisa shwamwa.

⁸ Oloni a minkinda ya Isalele, miti ikajovelela maputa lalo nakwima vushuka vweni, yeni vanu vange va Isalele. Ololo-lolo mukeluka kwimbo.

⁹ Yange njili neni amo, co mwa vushunga mukalima lalo lifuti lyeni nakukunamo vimbuto.

¹⁰ Vanu veni vakatuma. Mukayoya mu vinganda nakutungulula vyuma vyoshe vije vyanyongele.

¹¹ Njikawezelela ku vanu na ku vingombe. Co mukatuma manene kutuvakana mumwapwile akulivanga, co mukakala na vana vavangi. Njikamitava kuyoyela kuje ngwe muje mumwayoyele laja, co njikamitumisa nakukala mu kwoloka kutuvakana akulivanga. Asinoni mukazivuka ngeci yange njapwa Kalunga.

¹² Yeni vanu vange va Isalele, njikamiilwisa ngeci mukayoye lalo mu lifuti lyeni. Likelyo likapwa lifuti lyeni, nalumo lwai lalo vana veni vakalanduka ku njala ya lyangengela.

¹³ “Yange Kalunga wa Akamwa ya Vyoshe, njendeka ngwange, mwa vushunga vene vanu vakatumbula lifuti eli ngwavo likakulya vanu, nakwendeka lalo ngwavo lifuti lilinakwiva vana valyo.

¹⁴ Oloni kutunda ku lelo nakutwala kulutwe, kulikapu lalo lifuti likakulya vanu, nakwiva vana veni embwe. Munjinendeka yange Kalunga wa Akamwa ya Vyoshe.

¹⁵ Lifuti kulikatwalao kutolilila ku miyati ije ilishendumuna, nambe kumona vanu vaje valinakulishaula. Lifuti kulikevi lalo vana va miyati yavo. Munjinendeka yange Kalunga wa Akamwa ya Vyoshe.”

Mwonyo wauha wa Isalele

¹⁶ Co Shukulu Kalunga wendekele kuli yange ngwendi,

¹⁷ “Muna munu, omo vaIsalele vayoyelele mu lifuti lyavo, co valijwalesele a ngila ije vayoyelelemo na a vilinga vyavo. Njakengele akuyoya kwavo ngeci kwapwile kwa futisi yakujwala, ngwe munakazi uje kakwata ku liko.

¹⁸ Ngecivene, njavaluvalelele omwo akwitila maninga mu lifuti, na omwo tumponya tuje vajwalesele natwo lifuti.

¹⁹ Njavahisile omwo akuyoya kwavo kwakuvi, na vilinga vyavo vyavivi, co njavashandwelele akati ka miyati yeka.

²⁰ Co kwoshe kuje kuvaile, vashawisile lizina lyange lyakujela, omwo vanu vakele nakwendeka ngwavo, ‘Ava vakevo vanu va Shukulu Kalunga, oloni vasezele lifuti lije lyavanene.’

²¹ Njakele na cishota-mbunge a lizina lyange lyakujela, omwo vaIsalele valizivisile shwamwa kwoshe kuje vaile.

²² “Ngecivene, ololo, leka vaIsalele majwi awa yange Kalunga wa Akamwa ya Vyoshe, njilinawo ali vakevo ngwange, ‘Vije vinjilinga kesi vya ali yeni vaIsalele embwe, oloni omwo lizina lyange lyakujela lije limunazivisa shwamwa mu mafuti oshe kuje kwoshe mwaile.

²³ Omo njisholola kujela kwa lizina lyange lyakama, lizina lije limwazivisile shwamwa akati kavo, asinoni vakazivuka ngeci yange njapwa Kalunga.’ Munjinendeka yange Kalunga wa Akamwa ya Vyoshe. Njikamipangesa mukumwesa miyati ngeci kuma njapwa wakujela.

²⁴ Njikamiilwisa kumitundisa ku miyati yoshe na ku mafuti oshe nakumiilwisila ku lifuti lyeni lalo.

²⁵ Co njikamishamwina mema akujela, nakumijelesa ku tumponya tweni twoshe, na ku vyuma vyeka vije vinamijwalesa.

²⁶ Njikamyana vimbunge vyaviha na mana amaha. Njikatundisa vimbunge vyeni vyakukaluwa vya mamanya nakumyana vimbunge vyakwononoka.

²⁷ Njikaka Munzinzime wange muli yeni, nakumona ngeci mulinakukavangeya mashiko ange, nakunyunga mashiko oshe anjikamyana.

²⁸ Asinoni mukakala mu lifuti lije linjanene vakukulwila veni. Mukapwa vanu vange, nange njikapwa Njambi yeni.

²⁹ Njikamyamena ku vyuma vyoshe vije vikamijwalesa. Njikamenesa vimbuto ngeci vikapwe vyavingi, ngeci kesi mukakale lalo na njala ya lyangengela.

³⁰ Njikawezelela miti ya vushuka vweni na vimbuto vya mu mahya eni, ngeci kesi kukakale njala ya lyangengela lalo yakumishawisa akati ka miyati.

³¹ Mukanuka futisi ya vuvi vweni na kupenga-penga kuje mwalingile, co mukakala na vunyengwe yeni vavenya, omwo vuvi vweni na milonga yeni.

³² Isalele, njishaka muzivuke ngeci kunjesi nakulinga vyuma vyoshe evi omwo yeni embwe. Njishaka muzive shwamwa nakushauka a vije mwalingile. Munjinendeka yange Kalunga wa Akamwa ya Vyoshe.”

³³ Shukulu Kalunga wa Akamwa ya Vyoshe alinakwendeka ngwendi, “Omo njinamijelesa ku vuvi vweni vwoshe, njikamitavesa kukala mu vinganda vyeni lalo, nakumitava kutungulula vije vyaviile.

³⁴ Munu woshe uje wakele nakwenda kuyehi na mahya eni, waamwene anamene vishoni ngwe ngundu, oloni njikamitava lalo ngeci mulimemo.

³⁵ Munu woshe akasimutwiya a lifuti lije lyapwile mambo yangoco, ololo linemuka kupwa ngwe Lihya lya Endeni, na vinganda vije vyasiwukile nakuvipukula, co vyasalele mupulungwa, oloni ololo vanavikolesa na vimpaka.

³⁶ Asinoni miyati ya kulyata, vaje vacili nakuyoya, vakazivuka ngeci yange njapwa Kalunga, njikatungulula vinganda vyasiwukile nakukuna lalo mu mahya muje mwapwile mu mashokola. Yange Kalunga njakulaesele ngwange njikalinga vyuma evi, co njikalingamo vene.”

³⁷ Shukulu Kalunga wa Akamwa ya Vyoshe alinakwendeka ngwendi, “Yange njikatava lalo vaIsalele kulomba vukwasi kuli yange, co njikavatava lalo vaIsalele vakatume manene ngwe matanga a vimanga.

³⁸ Co vije vinganda vyanyongele, ololo vikapwa vyakushula vya vanu ngwe Yelusalema muyapwile laja yashulile na vimanga, vaje vavakombelelele ngwe n̄ombelo ya a litangwa lya ciwano. Asinoni vakazivuka ngeci yange njapwa Kalunga.”